Atʋloa 88 - Chahta Holisso Holitopa 1886

Hulittoblichit atʋloa Kolah ushi ʋhleha ha̱ im ikbi kʋt, tʋloa pehlichi ʋt lomʋt a tʋloa chi̱ ho̱, nan ithʋnanchi yo̱ Eslah ai achʋffa hʋttak Heman ʋt ikbi tok.

¹ Ʋm ai okcha̱ya Chitokaka Chihowa ma, nittak, ninak aiena ka̱ chi tikba pa̱ha̱ya li hoke.

² Ʋm ʋnnumpah ilbʋssha yʋt chi tikba onashke; chi̱ pa̱ya li ka̱ chi haksubish a̱ awet ish i̱ wielashke.

³ Ʋmish shilombish ʋt nan ik achukmo puttah isht ai ʋlota hoka̱, ʋm ilhfiopak ʋt illi aiasha ona̱ho̱sishke.

⁴ Yakni kula ilhkoli ak o̱ iba holhtiena lishke; hʋttak imi lhampko iksho ak inli ho̱ chohmi lishke.

⁵ Illi ʋhlehah itti̱takla ittoiyula sia kʋt, nʋhlʋt illi yosh ahulluppi ma̱ya ka̱ chohmi lishke; yʋmma̱ himakma̱ ish ithaiyanah keyuh; yʋmmak osh chibbak a̱ a mukofa hoke.

⁶ Yakni kula hufobi, aiokhlileka fehna, ahufobika pilla ka̱ is sʋ bohlishke.

⁷ Chi anukhubela yʋt wekit si onuttoiyulʋshke, chim oka piakʋchi putta ka̱ isht is sʋlbʋsshalishke. [Yukopa.

⁸ Ittikhana li ʋhleha ha̱ hupakichit is sa̱ filʋmmichishke; oklah ai i̱ yuwala yo̱ is sakbi na, ʋm okshillitta cha kuccha la he keyushke.

⁹ Sʋlbʋssha kak osh sʋ nishkin ʋt iellishke; nittak aiyukali ka̱ chi̱ pa̱ha̱ya lishke, Chihowa ma; sʋbbak a̱ pit isht chim ʋshʋttapa lishke.

¹⁰ Illi ʋhleha ha̱ na̱ fehna ish i̱ yʋmihcha hinlah choh? keyukmʋt shilup ʋt wʋkaya cha, chi ayokpʋcha hinlah choh? [Yukopa.

¹¹ Ahulluppi ya̱ isht ish i̱ hullo yʋt ai ʋnno̱ho̱akmʋt, aiokpuloka ya̱ nan ish ai a̱hli achukma yʋt ai ʋnno̱ho̱a hinlah choh?

¹² Aiokhlileka ya̱ na̱ fehna ish yʋmihchi ʋt a hayakakmʋt, ai im ʋhaksi yakni ya̱ chim ai ʋlhpiesa yʋt a hayaka hinlah choh?

¹³ Yohmi ka̱ ʋno ʋto Chitokaka chia hak o̱ chi̱ pa̱ha̱ya lih chatuk oke; mikma̱ onnahinlikma̱ ʋm ʋnnumpah ilbʋssha yʋt chi tikba o̱ho̱na hoke.

¹⁴ Chihowa ma, nantihmi ho̱ ʋmish shilombish a̱ ish kanchi cha, chi nʋsshuka ya̱ is sa̱ luhmih choh?

¹⁵ Sʋ hemittah moma kʋt a̱ pʋllʋmmit sʋlla̱hosit isht awehi̱chih chatuk oke; isht ish kumuntʋchi ʋt si onuttoiyula hatuk o̱, nanah a kʋniohmi ak ithanoshke.

¹⁶ Isht chi nukhubela yʋt si o̱ wʋlʋbli tuk oke; isht ish nukshobli ʋt aiokpʋninchit sʋ kanchishke.

¹⁷ Nittak moma ka̱ oka chohmit si ʋpakfoiyupʋshke; himonna achʋffalit si afulluplishke.

¹⁸ A̱ hullo micha a̱ kana ya̱ hupakichit is sa̱ filʋmmichishke; ittikhana li ʋhleha ha̱ aiokhlileka ya̱ pit ish ʋshachishke.