Atʋloa 86 - Chahta Holisso Holitopa 1886

Ʋnnumpah ilbʋssha Lewi ʋt ikbi tok

¹ Chi haksubish a̱ awet ish wieli cha, is sʋ haklashke; sʋlbʋsshah micha nan ik sʋm iksho hoka̱.

² Chi̱ hulittopa sia hoka̱, ʋm ilhfiopak a̱ ish hʋllʋllashke; a̱ Chitokaka chia hak osh chi̱ tishuh chi anukchieto ya̱ ish okchalinchashke.

³ Is sa̱ nukha̱klashke, a̱ Shahlih ma; chishno ak o̱ nittak momah chi̱ pa̱ha̱ya li hoka̱.

⁴ Chi̱ tishuh imish shilombish a̱ ish yokpalashke; a̱ Shahli chia hak o̱ ʋmish shilombish a̱ isht chim ona li hoka̱.

⁵ A̱ Shahli chia hʋt chi̱ pa̱ha̱ya moma ka̱ i̱ kʋshuffih achukma, micha i̱ hullo chinto chia hoka̱.

⁶ Chihowa ma, ʋm ʋnnumpah ilbʋssha ya̱ ish hʋponaklo cha, nan asi̱hi̱lhha li ʋnnumpa ha̱ ish haiyaklashke.

⁷ Nanah ʋm a pʋllʋmmi nittak a̱ chi̱ pa̱ha̱ya la chi̱ hoke; is sʋ hakloh pulla chi̱ hoka̱.

⁸ A̱ Shahlih ma, chitokaka putta ka̱ chishno chohmi kʋt ikshoshke; micha nan isht ish a yʋmi̱hi̱chi chohmi kʋt ikshoshke.

⁹ Oklushi momah ish ikbi tok ʋt chi tikba ʋlʋt chi ayokpʋchashke, a̱ Shahlih ma; micha chi hohchifo ha̱ hulittoblichashke.

¹⁰ Chinto cha na̱ fehna yʋmi̱hi̱chi chia hosh, chishno ak bano hosh Chitokaka chia hoka̱.

¹¹ Chihowa ma, chi̱ hina is sʋm abachi na, nanah chim ai a̱hli ak o̱ a no̱ho̱wa lashke; chi hohchifo ha̱ i̱ nukshopa chi̱ ka̱ sʋ chu̱kʋsh a̱ ish ittibafohkashke.

¹² Sʋ chu̱kʋsh a̱ mominchi hosh ishit chi ayokpʋche lashke, a̱ Shahlih, a̱ Chitokaka ma; mikmʋt chi hohchifo ha̱ hulittobli̱hichi li̱ billiashke.

¹³ Isht ish i̱ hullo ʋt si onuttula kʋt chintoh ma̱, ʋmish shilombish a̱ illi aiasha nutaka ish a kucchi hatuk oka̱.

¹⁴ Chitokaka ma, ilefehnʋchi ʋhleha hʋt wʋkayʋt ʋm asʋnalishke; pʋllʋmmi ʋhlehah ittʋhoba yʋt ʋm ilhfiopak a̱ hoyo hoke; yohmi kʋt ilap itikba ya̱ chi helichih keyu kak oke.

¹⁵ Amba, a̱ Shahlih ma, chishno ak okʋto Chitokaka nan i̱ nukha̱klo, micha i̱ kana, i̱ nukhubelah sʋllaha, micha nan i̱ hullo, aia̱hlika ittʋtuklo kʋt a chinto chia hokʋt,

¹⁶ Ish filema cha is sa̱ kanashke; chimi lhampko ha̱ chi̱ tishuh ish ema cha, chi̱ tishuh ohoyoh ushi ya̱ ish okchalinchashke.

¹⁷ Achukma isht oktʋni ya̱ is sʋm ʋtahlashke; yohmikma̱ Chihowa chia hak osh si ʋpelʋt is sʋ hopuhlali ka̱ a̱ nukkilli ʋhleha hʋt pesa cha hufahyashke.