Atʋloa 85 - Chahta Holisso Holitopa 1886

Tʋloa pehlichi ʋt a tʋloa chi̱ ho̱, atʋloa Kolah ushi ʋhleha hʋt ikbi tok.

¹ Chi̱ yakni ya̱ ish i̱ kanah beka tok, Chihowa ma; Chekob ʋt yukah ma̱, ish im a̱ya tok oke.

² Chim oklah nanah a yushoba ya̱ isht ish i̱ kanchi tok; i̱ nan ʋsshʋchi moiyuma ka̱ ish im ompohomo tok oke. [Yukopa.

³ Chi anukhubela ya̱ mominchit kʋnʋllichit ish eshi tok; chi ʋnu̱koa nuklibbi ka̱ ish shʋnayʋchih beka tok oke.

⁴ Il ai okcha̱ya Chitokaka ma, fʋlamʋt ish pim ala cha, isht ish pi̱ nukkilli ya̱ ish yukobli hokbano!

⁵ Ish pim anukhubela na billia chi̱h choh? isht ai unchululi putta ka̱ isht ish i̱ nukkilli ya̱ ish i̱ fʋllayacha chi̱h choh?

⁶ Chishno ʋt fʋlʋmminchit ish pi okchali na, chim okla hʋt ishit chi a yokpa he keyuh choh?

⁷ Chihowa ma, isht ish i̱ hullo ya̱ ish pi pesʋchashke; chim ai okcha̱ya ya̱ ish pimashke.

⁸ Chitokaka Chihowa hʋt nana ho̱ ʋnumpuli ka̱ haklo lashke; i̱ kanah achukma hosh im oklah micha i̱ hulittopa ʋhleha ha̱ im ʋnumpula chi̱ hoka̱: yohmi hoka̱ ik a hupoyuksoka ya̱ fʋlamʋt oklah ik iyo kashke.

⁹ Im ai okcha̱ya yʋt i̱ nukshopa ʋhleha hak o̱ i̱ bili̱kasih pulla hoke; yʋmohmi hatuk o̱ ahulittopa yʋt pi̱ yakni ya̱ ai ittoiyula hoke.

¹⁰ Isht i̱ hullo, im aia̱hlika ittʋtuklo kʋt ittʋfama kak okma̱, isht ai ʋlhpiesa, i̱ kanah achukma ittʋtuklo kʋt itti̱ su̱ksoa kak a chi̱shke.

¹¹ Nan ai ʋlhpiesa yʋt ʋba ya̱ et a hopo̱koyo kak o̱, nan ai a̱hli ʋt yakni ya̱ a waya chi̱ hoke.

¹² Chihowa hʋt nan achukma yak kia ima chi̱ hoke; mikma̱ pi̱ yakni ʋt na̱ waya ima chi̱ hoke.

¹³ Nan ai ʋlhpiesa yʋt itikba a̱ya cha, yʋmmʋt a no̱ho̱wa ya̱ ata̱ya pim ikbashke.