Atʋloa 83 - Chahta Holisso Holitopa 1886

Hulittoblichit atʋloa Asaf ʋt ikbi tok.

¹ Chitokaka ma, nan ik acho ʋt ik chim iksho kashke; kinnet iksho hosh lummʋt chik binilo kashke, Chitokaka ma.

² Yakeh, chi̱ tʋnʋp ʋhleha hʋt shʋkapah ma̱, chi̱ nukkilli ʋhleha hʋt nushkobo ha̱ ʋba wʋkeli hoka̱.

³ Ish luhmi ʋhleha ha̱ i̱ sʋnalit isht ittim ʋnumpula chi̱ hosh, chim okla ha̱ im asʋnalit i̱ kostinit isht ittʋfama hoke.

⁴ “Intah! oklushi hieli tuk a̱ isht e kanchi na, kʋna hosh Islael hohchifo ha̱ himakma̱ ik ithano kashke,” oklah achishke.

⁵ Chu̱kʋsh ittibaiachʋffʋt isht ittim ʋnumpuli hoka̱: chim asʋnalit oklah nan ittim ʋpesa kʋt,

⁶ Etom micha Ishmael oklah im ʋlhtipo puttah, Moab micha Hakalin oklah,

⁷ Chebul micha Ammon, micha Amalek, Filistia, Taia oklah aiyasha ai ittʋpehah aiena kak oke.

⁸ Assilia mʋt oklah ibafohka kʋt, Lat ushi ʋhleha ha̱ shakba i̱ tuba tuk oke. [Yukopa.

⁹ Mitian, Sisela, Chebin aiena ka̱ Kaishon okfa ha̱ ish a yʋmihchi tok ʋt ish chomihchashke.

¹⁰ Ento ya̱ ai ishit kanchi tok, yakni niachi tuba tok.

¹¹ I̱ hulittopa ʋhleha ha̱ Oleb micha Seeb ittʋtuklo ka̱ ish chomihchashke; mikmʋt ʋhamʋt im ʋlhtoka moma ka̱ Seba micha Salmʋnna ittʋtuklo ka̱ ish chomihchashke.

¹² Yʋmmʋt, “Chitokaka yʋt ai ʋtta putta ka̱ pimmi ha chi̱ hosh il eshashke,” achishke.

¹³ A̱ Chitokaka ma, ʋpanukfilah chomihchit, na̱ hakhlupish osh mahlih itikba a̱ya kak o̱ ish chomihchashke.

¹⁴ Luak osh iti foka hukmit kanchih chatuk, mikmʋt luak libbi hosh nʋnih chaha ai o̱ libbih chatuk a̱ chohmit,

¹⁵ Yʋmohmi hosh chi̱ mahlih kʋllo isht ish hliohlikmʋt, chim ʋpeli isht ish kumuntʋchashke.

¹⁶ Nʋsshuka ya̱ hufahya ish ʋlotoli na, chi hohchifo ha̱ oklah hoyashke, Chihowa ma.

¹⁷ Hufahya cha kummuntʋt billiashke, micha nanah ai ahni tuk ʋt ik im a̱hlo kish aiokpulokashke.

¹⁸ Mikma̱ chishno chi hohchifo hʋt Chihowa, chishno ak illa hosh chi chaha kʋt yakni momah i̱ Shahli chia hatuk a̱ oklah ithanashke.