Atʋloa 81 - Chahta Holisso Holitopa 1886

Tʋloa pehlichi ʋt Kittilh a tʋloa chi̱ ho̱, Asaf ʋt ikbi tok.

¹ Pim isht hlampko Chitokaka ya̱ chitolit hʋsh i̱ tʋloashke; Chekob i̱ Chitokaka ya̱ na̱ yokpʋt hʋsh i̱ shʋkapashke.

² Tʋloa ha̱ ʋba tʋkalichit, ʋhlepa ha̱ hʋsh ulachashke; hap olah achukma ya̱ ishit tʋllakchi a̱sha ibafohkit hʋsh ulachashke.

³ Hʋshi tʋlalih ʋmmona, hʋshi bulukta aiena, pim impah hulittopa nittakma̱ ishit pu̱fa hʋsh ulachashke.

⁴ Islael ak o̱ i̱ nan ʋlhpisa, Chekob i̱ Chitokaka yak osh nan ʋpesa yoka̱.

⁵ Echip yakni moma ka̱ hlupullit a̱yah mʋt, Chosef a̱ isht ai ʋtukkoa mak o̱ im ʋpesa tok oke. Ʋnnumpa ha̱ ak ithano hosh haklo lih achi̱nishke.

⁶ Yohmi ka̱, “Tahchi ya̱ na̱ weki ai i̱ filʋmmiche li tuk o̱, ibbak ʋt kishi ha̱ i̱ filʋmmi tok oke.

⁷ “Na̱ chi̱ pʋlʋmmi hosh ish pa̱ha̱yah ma̱, chi kohchi li tok; hilohah ai ʋlomaka ya̱ et a chim ʋnumpo̱ho̱li li tok; Melibah oka ya̱ imomaka a chi pi̱hi̱sa li tok oke. [Yukopa.

⁸ “Ʋm oklah ma, ish ha̱klo na, ʋtukkolit chi ʋnoli lashke; Islael ma, is sa̱ hʋponaklo hokbano!

⁹ “Chim ai itti̱takla ya̱ chitokaka inla yʋt iksho kashke, mikma̱ oklah inla i̱ chitokaka ya̱ hʋchik ayokpacho kashke.

¹⁰ “Ʋno ak osh Echip yakni ya̱ ai ishit hʋchi kohchi tok chi̱ Chitokaka Chihowa sia hoke; hʋch itʋkha ya̱ ʋwatʋchit hʋsh wʋkʋmmikma̱ ʋloto̱ho̱li lashke; achi le tuk kia,

¹¹ “Ʋm okla hʋt ʋm ʋnnumpa ha̱ hʋponakla he keyu ki tok, mihmʋt Islael ʋt ʋlhpesah ik sʋm ahno ki tok oke.

¹² “Mihma̱ ilap aiyahni hosh ma̱ha̱ya chi̱ ho̱, ilap chu̱kʋsh kʋllo ya̱ im issʋt tihleli li tok oke.

¹³ “Ʋm okla hʋt a̱ hʋponaklo hokbano! Islael ʋt ʋm ata̱ya putta ka̱ ai ittʋnowa hokbano!

¹⁴ “Yohmi hokmʋno chekosih mak inli ho̱ i̱ tʋnʋp ʋhleha ha̱ im ʋkahchunnoliche la he tuk, micha i̱ tʋnampi ʋhleha ha̱ sʋbbak a̱ fʋlʋmmichit onucchi la he tuk oke.

¹⁵ “Chihowa i̱ nukkilli ʋhleha hʋt im ʋkahchunnolashke; yohmikmʋt i̱ nittak ʋt abillia hi oke.

¹⁶ “Onush nia i̱ shahli ak o̱ ipetah chatuk a̱ chohmit, foi bila tʋli chito ya̱ ai ishit kohchi ka̱ chiyuhmi hosh ishit chi fehubli la he tuk oke,” achishke.