Atʋloa 80 - Chahta Holisso Holitopa 1886

Tʋloa pehlichi ʋt “lili puttah” isht a tʋloa chi̱ ho̱, ai ʋtukkoa atʋloa yo̱ Asaf ʋt ikbi tok.

¹ Islael ʋpesʋchi, Chosef a̱ ʋlhpoa chipinta chomihchit pehliechit isht a̱ya chia hʋt et ish hʋponaklashke; chelubim paknaka binnili chia hʋt et ish tombashke.

² Chimi lhampko ish okchali cha, Eflaim, Benchamin micha Manasseh aiena ka̱ itikba iʋt ish pi okchalinchashke.

³ Chitokaka ma, ish pi falʋmmechi cha, chi nʋsshuka ish pi o̱ tohwikelechi na, pi okcha̱yashke.

⁴ Chitokaka Chihowa, nan u̱ha i̱ Chitokaka ma, kʋtiohmih fokka ho̱ chim oklah im ʋnnumpah ilbʋssha ya̱ chi anukhubela yʋt o̱ shubo̱ho̱lli kʋt immoma chi̱h choh?

⁵ Pʋska yo̱ chomihchit nishkin okchi ish ʋpachih mʋt, nishkin okchi lawa ho̱ ish ishkochechishke.

⁶ Oklah pi̱ bili̱ka aiyasha kʋt isht ittʋchowa he ish pikbikma̱, pi̱ tʋnʋp ʋhleha hʋt pi kalʋkshichit itti̱ yukpa hoke.

⁷ Chitokaka, nan u̱ha i̱ Chitokaka ma, ish pi falʋmmechi cha chi nʋsshuka ya̱ ish pi o̱ tohwikelechi na, pi okcha̱yashke.

⁸ Echip a̱ pa̱kkʋpi a lubbit isht ish a̱ya tuk osh oklushi putta ka̱ tihlelit ish kohchi cha, ish hokchi tok oke.

⁹ Itikba ya̱ ish i̱ shahbichih ma, akshish tubah fehna cha, yakni ya̱ ʋlota tok oke.

¹⁰ Nʋnih chaha putta kʋt hushontika isht ompoholmoh ma̱, i̱ naksish filamoli yʋt Chitokaka i̱ chuahla putta ka̱ chohmi tok.

¹¹ I̱ naksish filamoli putta ka̱ pit uffochit okhʋta ha̱ isht onah mʋt, ʋpatʋt uffo putta ka̱ Okhina Chito a̱ isht ona tok oke.

¹² Nantihmi ho̱ i̱ hulihta ya̱ ish kinʋffi tuk o̱, hina ya̱ ai ittʋnowa moma kʋt ʋmoh choh?

¹³ Shukha nakni iti foka aiyasha kʋt okpʋni hoke; mikma̱ yakni hayaka nampoa aiyasha kʋt ai impa hoke.

¹⁴ Chitokaka, nan u̱ha i̱ Chitokaka ma, awet ish fillemashke; ʋba et a hopo̱koyot ish pisah pulla cha, pa̱kkʋpi ilʋppa̱ ish im a̱yashke.

¹⁵ Micha nana ho̱ chibbak ishtimpakimma yʋt hokche tuk, micha ushi ish ili̱ hufantiche tuk aiena ka̱ ish ʋtonashke.

¹⁶ Luak o̱ ishit luʋshke, tʋptuʋt tahʋshke; chi nʋsshuka yʋt ik ayokpachot im olʋbikma̱, oklah aiokpuloka hoke.

¹⁷ Chim ishtimpakimma yʋt ikbe tuk, hʋttak ushi ish ili̱ hufantiche tuk ak o̱ chibbak ʋt ompohomashke.

¹⁸ Yohmikmʋno chi̱ fillʋmmit e fʋlama he keyuh; ish pi okchalinchikma̱, chi hohchifo hak o̱ il i̱ pa̱ha̱yashke.

¹⁹ Chitokaka Chihowa, nan u̱ha i̱ Chitokaka ma, ish pi falʋmmichashke; chi nʋsshuka ya̱ ish tohwikelechi na, pi okcha̱yashke.