Atʋloa 8 - Chahta Holisso Holitopa 1886

Tʋloa pehlichi ʋt Kittilh a̱ isht a tʋloa chi̱ ho̱, atʋloa Lewi ʋt ikbi tok.

¹ Pi̱ Shahlih Chihowa ma, chi hohchifo hʋt yakni moma ka̱ a hulittopah fehna hoka̱, chim ahulittopa yʋmma̱ ʋba shutik a̱ misha yo̱ ish tʋkalichashke.

² Chi̱ tʋnampi ak atuk mak o̱, tʋnʋp micha ilaiukha ya̱ isht ish chulosʋla chi̱ hosh, ʋllo̱si micha pishi puttah itih ha̱ isht a hlampko ish ikbi tuk oke.

³ Chim ʋba shutik a̱ chibbakushi ʋt ʋtahli tok, hʋsh ninak a̱ya micha fuchik puttah aiena ka̱ ish tʋkohlichi tok, yʋmma̱ pisa likmʋt,

⁴ Hʋttak ʋt nanta hatuk o̱ ish anukfillih choh? micha hʋttak ushi ʋt nanta hatuk o̱ ish im a̱yah choh?

⁵ Yohmi kʋt chitokaka yo̱ lohmʋt ik lawwo ho̱ ish ikbi tuk osh, isht ʋnnoa achukma micha isht a hulittopa isht iachukolichit,

⁶ Chibbak ʋt nan ʋtahli tok putta ka̱ pehlichi yo̱ ish ikbi hoke.

⁷ Ʋlhpoa chipinta, micha wak a moiyumah, micha na poa hayaka aiyasha aienah,

⁸ Ʋba hushi, micha nʋni okhʋtah aiyasha yosh okhʋta ha̱ ai ittʋnnowa aienah ma̱, mominchit iyi nutaka ish ʋshachi tok oke.

⁹ Pi̱ Shahlih Chihowah ma, chi hohchifo hʋt yakni moma ka̱ a hulittopah fehnʋshke.