Atʋloa 79 - Chahta Holisso Holitopa 1886

Atʋloa Asaf ʋt ikbi tok.

¹ Chitokaka ma, oklushi putta kʋt chi̱ yakni ya̱ ibachukkoʋshke; chi̱ tempel hulittopa ya̱ litehlishke; Chelusalem a̱ aiokpʋninchit chifehkuchishke.

² Chi̱ tishuh illi ʋhlehah haknip a̱ ʋba hushi puttah, micha chi̱ hulittopa ʋhlehah nipi ya̱ nampoa yakni aiyasha ya̱ im ilhpak a chi̱h mak o̱ ima tuk oke.

³ Chelusalem ʋpakfoiyupa ka̱ oka chomihchit im issish a̱ hlʋtʋblih ma̱, kʋna hʋt huppa hi ʋt iksho ke tuk oke.

⁴ Oklah pi̱ bili̱ka aiyasha kʋt ik ʋhobalo, micha pi ʋfullublit aiyasha kʋt shittilemʋt i̱ yukpa yo̱ e tuba tuk oke.

⁵ Hupakih kʋtiohmih fokkah mak o̱, Chihowa ma, chi nokuah billia hosh, chi nukhubela kʋt luak chohmit lua chi̱h choh?

⁶ Oklushi puttah ik chithano ak o̱, micha apehlichika puttah chi hohchifo ha̱ i̱ tahpʋla keyu ak o̱ isht chi anukhubela ya̱ ish o̱ fuhoblashke.

⁷ Chekob im okla ha̱ okpʋnit tahli cha, ai a̱ha̱tta ya̱ oklah chukkillissʋchi tuk oka̱.

⁸ Pi̱ tikba ʋhlehah nan ʋssha̱ha̱chi ya̱ ithaiyanʋt chik pi̱ sʋnalo kashke; tu̱shpʋt nan isht ish i̱ nukha̱klo ʋt pi ʋfamashke; ik pi hlampkoh fehna hoka̱.

⁹ Chitokaka il ai okcha̱ya ma, chi hohchifo hulittopa pulla hatuk mak o̱, ish pi ʋpelʋchashke; mikmʋt chi hohchifo hatuk pullah mak o̱ ish pi kohchi cha, il aiʋsshʋchika putta ka̱ ish pi̱ kʋshuffashke.

¹⁰ Nantihmi ho̱ oklushi putta kʋt, “I̱ Chitokaka mʋto?” acha hinlah choh? chi̱ tishuh ʋhlehah im issish hlʋtapa tuk a̱ e pisa ho̱ aiukha tuk a̱, oklushi puttah im ai itti̱takla ya̱ oklah ithanashke.

¹¹ Hʋttak yuka kiffa̱ha̱ha kʋt chi tikba onashke; chish shakba hlampko chintoh pulla hatuk mak o̱, illa he im ʋlhpisa ʋhleha ha̱ ish okchalinchashke.

¹² Micha oklah pi̱ bili̱ka aiyasha kʋt nan ik ʋhobalo isht ik chi ʋhobalo tuk a̱, mihinlohmi untuklo ho̱ ilap ikkishi ha̱ ish i̱ fʋlʋmminchashke, nan i̱ Shahlih ma.

¹³ Yohmikma̱ chim oklah, micha ʋlhpoa chipinta ish ʋpesʋchih chatuk pia hʋt yakoke e chim aiyahni na billia chi̱ hoke; isht ai unchululi ma̱ha̱ya ka̱ a chi holittopa ya̱ il im ʋno̱ho̱la chi̱ hoke.