Atʋloa 78 - Chahta Holisso Holitopa 1886

Nan ithʋnanchi atʋloa Asaf ʋt ikbi tok.

¹ Ʋm oklah ma, a̱ nan ʋlhpisa ya̱ hʋsh haklashke, sʋtih hʋt nan a̱ha̱chi ka̱ hʋchi haksubish a̱ hʋsh i̱ wielashke.

² Sʋtih ha̱ wʋkʋmmit nan isht ʋlhpisa ʋnumpule lashke; ʋnnumpah luma nittak tikba isht awihi̱chi ya̱ ʋnumpo̱ho̱li lashke.

³ Nana ka̱ pi̱ tikba ʋhleha hʋt pim ʋno̱ho̱li na, e haklo cha il ithanah chatuk ʋt

⁴ Im ʋlla ʋhleha ha̱ il i̱ luhma he keyuh, amba Chihowa hulittoblichit isht ʋnumpo̱ho̱li, micha imi lhampko, micha na̱ fehna yʋmi̱hi̱chi tok a̱ isht ai unchululi himmak mi̱hinta chi̱ ka̱ il im ʋno̱ho̱la chi̱ hoke.

⁵ Yohmi ka̱ pi̱ki ʋhleha hʋt im ʋlla ʋhlehah yʋmma̱ putta ka̱ im abʋcha hi o̱ im apesa hosh, Chekob ak o̱ nan isht ʋlhtukkoa ya̱ a hilechih mʋt, Islael ak o̱ nan ʋlhpisa im ikbi tok.

⁶ Yʋmohmi ho̱ isht ai unchululi mi̱hinti kʋt ithana tuk o̱, ʋlla im asha ʋhleha hʋt wʋkaya cha, ʋnonti ilap im ʋlla ʋhleha ha̱ im ʋnola he,

⁷ Micha Chitokaka yak o̱ anukchieto cha, Chitokaka na̱ yʋmi̱hi̱chi tok a̱ ik im ʋhakso hosh, im ʋnnumpah ʋlhpisa putta ka̱ hulittoblit iesha he,

⁸ Micha i̱ki ʋhleha hʋt isht ai unchululi ilappu̱lla, micha ila filʋmmit i̱ sʋnali, isht ai unchululi chu̱kʋsh ʋpissʋlechih keyu, micha imish shilombish ʋt Chitokaka im ai a̱hli ʋttok keyu ka̱ ik chiyuhmo ka he ak ʋttok oke.

⁹ Eflaim im ʋlla ʋhleha hʋt iti tʋnampo im ʋlhtaiyaha hayokak osh, ittibih nittakma̱ fʋlamʋt yihlepa tok oke.

¹⁰ Chitokaka nan ittim ʋpesa ya̱ ik hulittoblo kish, i̱ nan ʋlhpisa ya̱ a no̱ho̱wa he keyuh mʋt,

¹¹ Amba na̱ yʋmi̱hi̱chi tok, micha nanah inlah fehna pisa̱ha̱chi tok aiena ka̱ im ʋhaksi kak ʋttok oke.

¹² I̱ tikba ʋhlehah itikba ya̱, Echip yakni, Soan ʋbilli̱ka foka ya̱ na̱ fehna ho̱ yʋmi̱hi̱chi tuk ʋttok oke.

¹³ Okhʋta ha̱ itti̱filʋmmechi cha hlupullichi tok, micha oka ya̱ ittʋnahahchi chomihchit hilechi tok oke.

¹⁴ Mikmʋt nittak okma̱ hushonti ha̱ a̱ha̱tta hosh, micha ninak moma ka̱ luak tohwikelika a̱ha̱tta hosh, pehlichit isht a̱yah beka tok oke.

¹⁵ Yakni hayaka ya̱ tʋli huchito ya̱ mita̱ha̱ffi hosh, ahufobi ya̱ chomihchit okla ha̱ lawachit ai ishkochechi tok oke.

¹⁶ Mihmʋt oka yʋna̱ha̱lli ya̱ tʋli chito a kohchih mʋt, okhina chomihchi hosh oka ya̱ yʋnʋllichi tok oke.

¹⁷ Yohmih kia yakni shila ya̱ Chaha i̱ Shahli ya̱ i̱ filʋmmit im asʋnalit, oklah im ʋssha̱ha̱chi kʋt immoma tok oke.

¹⁸ Mihmʋt ilap chu̱kʋsh nan ahni ho̱ ilhpak ilai asilhhʋchi hosh, imi chu̱kʋsh anu̱kaka Chitokaka ya̱ isht imomaka pisa tok.

¹⁹ Mihmʋt Chitokaka ya̱ i̱ sʋnalit ʋnumpulit, “Chitokaka yʋt yakni hayaka ya̱ nan ʋpa ʋtahlit aiimpa a hilecha hinlah choh?

²⁰ “Yakeh, tʋli chito ya̱ isso na oka yʋt et mitafah ma̱, okhina putta kʋt chubohʋchit a̱ya tok: im okla ha̱ pʋska ma̱ ima hinlah choh? mikmʋt nipi im ʋtahla hinlah choh?” achi tok oke.

²¹ Yʋmohmi hatuk o̱ Chihowa hʋt hakloh mʋt, im okpulot atʋpa tok; mihma̱ Chekob a̱ luak ʋt o̱ libbih ma̱, anukhubela yʋt Islael ak kia onuttula tok.

²² Chitokaka ya̱ ik i̱ yimmoh mʋt, im aiokcha̱ya ya̱ ik anukchieto kak ʋttok.

²³ Yohmi kʋt ʋba shutik a̱ im apesa cha, ʋba okhisa ya̱ tiwwih mʋt,

²⁴ Ʋpa chi̱ ka̱ manna ya̱ et on umbʋchi hosh, ʋba tanchi yo̱ okla ha̱ et ima tuk okak ʋttok oke.

²⁵ Achʋffaiyuka kʋt huchitoka i̱ pʋska yo̱ ʋpa tok; ilhpak i̱ pilʋt kaiyʋchi tok oke.

²⁶ Hʋshakucchaka mahli ha̱ ʋba tʋkalichih mʋt, nan isht im ai a̱hli yo̱ oka mahli ha̱ isht a̱ya hosh,

²⁷ Lukfi pushi chohmi ho̱ nipi, micha okhʋtah shinuk aiyasha kak o̱ chohmi ho̱ hushi sʋnahchi a̱sha aiena ka̱ et on umbʋchih mʋt,

²⁸ I̱ binah anu̱kaka, aiasha ʋpakfoiyupa ka̱ et o̱ fuhobli tok.

²⁹ Mihma̱ impʋt kaiyah fehna tok: yʋmohmi ho̱ nan ahni tuk a̱ isht im ʋla tok.

³⁰ Nanah a bʋnna tuk ʋt ik i̱ filʋmmo hosh, im ilhpak ʋt itih ha̱ fo̱kkah immoma ho̱,

³¹ Chitokaka im anukhubela yʋt onuttola cha, nia ʋhleha ha̱ ʋbih mʋt, Islael hʋttak himithoa ya̱ akkakohli tok.

³² Ilʋppa̱ moma kʋt yʋmohmi hokak o̱, nan ʋsshʋchi kʋt immoma tok, micha nanah fehna a yʋmi̱hi̱chih kia, ik yimmo ki tok.

³³ Yʋmohmi hatuk o̱ i̱ nittak putta ka̱ nan isht ik achukmo ho̱, micha im afʋmmi ha̱ nanah a kummunta ho̱ isht aiokpʋninchit tahli tok.

³⁴ Issot kanchi hokmʋno, fʋlama cha, achunnanchit Chitokaka ya̱ ho̱ho̱yokmʋt,

³⁵ Chitokaka yʋt i̱ tʋli chito yokmʋt, ʋnonti Chitokaka Chaha i̱ Shahli ak osh okchalinchi yatuk a̱ ithaiyanah beka tok.

³⁶ Yohmih kia itih hak o̱ isht im ilahobbi cha, isunlʋsh ak o̱ isht i̱ hula̱ha̱bih beka tok.

³⁷ Micha chu̱kʋsh ʋt isht im ʋpissalih keyu ki tok, micha nan ittim ʋlhpisa ya̱ im ai a̱hlih keyu ki tok oke.

³⁸ Yohmih kia yʋmmʋt nan i̱ nukha̱klo yatuk osh, nan ʋsshʋchi ya̱ i̱ kʋshuffikmʋt, okpʋnit ʋmmomihchih keyu hosh, isht i̱ nukkilli ya̱ fʋlʋmmichit eshih fehna cha, i̱ nukhubela ya̱ mominchit wʋkayʋchih keyuh beka tok oke.

³⁹ Yohmi kʋt yʋmmʋt haknip atuk a̱ ithaiyanah mʋt, fiopa hatuk osh iakmʋt fʋlama he keyu yatuk a̱ ithaiyana kak ʋttok.

⁴⁰ Yakni hayaka ya̱ himona̱h in asʋnalikmʋt, chukushmi foka ya̱ a nukoa̱ha̱chi tok acha!

⁴¹ Yohmi kʋt ʋnonti Chitokaka ya̱ imomaka pisakmʋt, Islael i̱ Hulittopa ya̱ kʋlakshichit nukoa̱ha̱chih beka tok oke.

^42-43 Ibbak a̱ ik ithaiyanot, i̱ sʋnali ya̱ ai i̱ hlʋkuffichi kʋt, i̱ nan isht ʋtukkoa putta ka̱ Echip a̱, micha Soan ʋbilli̱ka ka̱ i̱ na̱ fehna ya̱ a hayaka̱ha̱chi tok nittak a̱ ik ithaiyano ki tok.

⁴⁴ Yakomi kak ʋttok. Im okhina putta ka̱, micha im oka yʋnʋlli puttah aiena ka̱ issish ikbi na, kʋna hosh ishka he keyu ki tok.

⁴⁵ Wʋhlana holba ya̱ o̱ pela na, okla ha̱ ʋpa tok; shukʋtti ma̱ o̱ pela na, okla ha̱ aiokpʋninchi tok.

⁴⁶ Micha nan i̱ waya ya̱ shʋkinli yo̱ im issah mʋt, atoksʋli yatuk a̱ hawa im issa tok.

⁴⁷ I̱ pa̱kkʋpi ya̱ hʋta̱ffo yo̱ isht im abi cha, i̱ bihi ʋpi putta ka̱ okti yo̱ isht im ʋbi tok.

⁴⁸ I̱ wak putta ka̱ hʋta̱ffo yo̱ im issa cha, i̱ nan ʋlhpoa ya̱ mʋlʋtha yo̱ im issa tok.

⁴⁹ Na̱ nukoa nuklibbi ka̱, na̱ nukhubela, micha nan ik ahnecho nukoa, micha nukha̱klot kummunta aiena kʋt, nan ik achukmo shali yo̱ et ono̱ho̱cchi tok oke.

⁵⁰ Ilap nukoa ya̱ hina im ʋtahli cha, yʋmma̱ imish shilombish a̱ nan illi ik im esho hosh, im ilhfiopak a̱ ililli im issah mʋt,

⁵¹ Echip a̱ ai ʋttahpi tok moiyumah, imi lhampko tuba ʋmmona Ham im ʋlhtipo puttah aiyasha ka̱ issot kanchi tok oke.

⁵² Mihmʋt ilap im okla ha̱ chukfʋlhpoa chomihchit kohchih mʋt, nan ʋlhpoa chipinta chomihchit yakni hayaka pehlichit isht a̱ya tok.

⁵³ Micha ahlʋkuffi achukma ho̱ pehlichit a̱ya hatuk o̱ ik nukshopo ki tok; amba i̱ tʋnʋp ʋhleha hokʋno okhʋta hʋt ompohomo tok.

⁵⁴ Atuk osh i̱ yakni hulittopa, ilap ibbak ishtimpakimma isht ishi tok nʋnih hak o̱ isht ʋla tok.

⁵⁵ Mihmʋt oklushi putta ka̱ itikba tihlelit kohchih mʋt, immi ha chi̱h mak o̱ yakni ya̱ ittʋkʋshkulit im issa cha, Islael apehlichi putta ka̱ im ʋlhtipo puttah ai ʋshachi tok.

⁵⁶ Yohmi tuk kia Chitokaka Chaha i̱ Shahli ya̱ imomaka pisʋt ichapah mʋt, nan isht im ai ʋlhtukkoa putta ka̱ ik hulittoblo ki tok.

⁵⁷ Yohmi kʋt i̱ki ʋhleha hak o̱ chohmit i̱ filʋmmi cha, haksichit aiyasha kʋt, iti tʋnampo ik a̱hlo ak o̱ chiyuhmit oklah shʋnayoa tok.

⁵⁸ Yohmi kʋt im achahaka ai ayokpʋchi puttah ishit nukoʋchih mʋt, i̱ na̱ holbʋt tuba putta kak o̱ ishit nuktʋhlali tok.

⁵⁹ Chitokaka yʋt hakloh mʋt, im okpuloh atapa cha, Islael a̱ shittilemah fiehna tok.

⁶⁰ Micha ilap ai ʋtta Shailoh, hʋttak im ai itti̱takla ilap im ʋlhtipo a hilechi tok ʋt issʋt kanchi tok.

⁶¹ Micha imi lhampko ai ottʋni ya̱ yuka ya chi̱ ho̱ im issa cha, im ahulittopa ya̱ i̱ tʋnampi ibbak fohki tok.

⁶² Micha im okla ha̱ bʋshpo fʋlaya im issah mʋt, nan immi hatuk a̱ i̱ nukhubelʋt atʋpa tok.

⁶³ Hʋttak i̱ himithoa ya̱ luak osh tahlih ma̱, ohoyoh i̱ himithoa ya̱ ittihalʋlli isht ik tʋlowo ki tok.

⁶⁴ I̱ na̱ huletumpa isht asha yʋt bʋshpo fʋlaya isht akkakohah ma̱, im ohoyoh ʋlhtakla ʋhleha hʋt yaya he keyu ki tok.

⁶⁵ Yʋmohmih ma̱ nan i̱ Shahli ʋt nusi yatuk o̱ chohmit, hʋttak kʋllo yosh oka pa̱kki i̱shko tuk osh yukpʋt tahpa̱ha̱la kak o̱ chohmit okchah mʋt,

⁶⁶ I̱ tʋnʋp ʋhleha ha̱ issot fʋlʋmmechi cha, ahufahya billia onucchi tok.

⁶⁷ Mihmʋt Chosef i̱ chukkachʋffa ya̱ kanchih mʋt, Eflaim apehlichi ya̱ ik ʋtokolo ki tok.

⁶⁸ Amba Chutah apehlichi ak o̱, Saion nʋnih i̱ hulittopa tuk ak osh ʋtokuli tok.

⁶⁹ Mihmʋt ʋba achahaka chomihchit, yakni ʋt tʋlayʋt billia he im apesa tok a̱ chomihchit, im ai a̱ha̱tta hulittopa ya̱ ikbi tok oke.

⁷⁰ Mihmʋt i̱ tishu ha chi̱ ho̱ Lewi ya̱ ʋtokoli cha, chukfʋlhpoa aiasha a kohchit ishi tok.

⁷¹ Chukfʋlhpoushi pishi̱chi iakkayʋt hikiki̱ya tuk o̱, im oklah Chekob, micha immi Islael a̱ ʋpesʋcha chi̱ ho̱, kucchit isht ʋla tok.

⁷² Atuk o̱ chu̱kʋsh ʋpissalih achukma hosh ʋpesʋchi tok oke; micha ibbak nan im punna hosh pehliechih beka tok oke.