Atʋloa 77 - Chahta Holisso Holitopa 1886

Tʋloa pehlichi ʋt Chetuhlʋn chohmit a tʋloa chi̱ ho̱, atʋloa Asaf ʋt ikbi tok.

¹ Chitokaka ya̱ im ʋnumpulit i̱ tahpʋla la chi̱ hoke; Chitokaka ya̱ im ʋnumpule likma̱, a̱ hʋponakla chi̱ hoke.

² A̱ pʋllʋmmih nittak a̱ nan i̱ Shahli̱ ya̱ hoyo le tuk; ninak a̱ sʋbbak ʋt ʋshʋttapah kia, ik tikahbo ke tuk; ʋmish shilombish ʋt hupohla he keyu ke tuk oke.

³ Chitokaka ya̱ ithaiyana likmʋt, ak hi̱ho ka he keyu hoke; anukfi̱hi̱lli likmʋt, ʋmish shilombish ʋt okhlilit kʋniʋshke. [Yukopa.

⁴ Sʋ nishkin a̱ okcha̱lit ish ieshishke; ʋm anukfila hʋt fitehkʋchi kak o̱, ʋnumpule la he keyushke.

⁵ Nittak ti̱kba afʋmmih hupaki aiena ka̱ anukfi̱hi̱lli lishke.

⁶ Okhlilikma̱ a tʋloa lih beka tok ʋt ithaiyana lashke, sʋ chu̱kʋsh a̱ ittim ʋnumpule lashke; ʋmish shilombish ʋt na̱ silhhi hoka̱.

⁷ Nan i̱ Shahli yʋt kanchi na billia chi̱h choh? micha himakma̱ i̱ kana chi̱h keyuh choh?

⁸ Im isht i̱ hullo yʋt issʋt abillia chi̱h choh? nanah achi tuk ʋt ont i̱ taha na billia chi̱h choh?

⁹ Chitokaka yʋt i̱ kana kʋt im ʋhaksi tuk oh choh? keyukmʋt nukhubela hosh isht i̱ nukha̱klo ya̱ i̱ kʋtʋblih choh? [Yukopa.

¹⁰ Mihma̱, “Na̱ sʋlbʋssha yokʋto Chaha i̱ Shahli im ishtimpakimma yʋt inlʋt a̱ tuba kak oke,” achi le tuk oke.

¹¹ Chihowa hʋt na̱ yʋmi̱hi̱chi tok a̱ ʋno̱ho̱li la chi̱ hoke; nittak hupakih ma̱ na̱ fehna ish yʋmi̱hi̱chi tok a̱ ithaiyana la chi̱ hokʋt.

¹² Micha nan ish a toksʋli moma ka̱ anukfilli likmʋt, nan ish a yʋmi̱hi̱chi ya̱ isht ʋm anukfi̱hi̱la chi̱ hoke.

¹³ Chitokaka ma, nanah ish a kʋniohmi yʋt hulittopa hoke; chitokaka nantah mak osh chito kʋt Chitokaka ya̱ chiyuhmih choh?

¹⁴ Chishno ak osh na̱ fehna yʋmi̱hi̱chi Chitokaka chia hoke; oklushi puttah im ai itti̱takla yo̱ chimi lhampko ha̱ ish ottʋninchi tok oke.

¹⁵ Chekob micha Chosef ushi ʋhleha, yʋmmʋt chim okla ha̱, chish shakba isht ish hlʋkuffichi tok oke. [Yukopa.

¹⁶ Oka yʋt chi pesa tok, Chitokaka mah, oka yʋt chi pesa tok oke; wʋnni̱hi̱chi tok, ahufobi putta kak kia fayoka̱ha̱chi tok oke.

¹⁷ Hushontih putta kʋt oka et fuhobli tok, shutik ʋt ulachi tok; chim uskinʋki putta kak kia mih aiyuka kʋt pit hi̱hi̱li hak inli tok oke.

¹⁸ Chi̱ hilohah ola kʋt ʋpanukfilah chito ya̱ ibafoiyukka tok; hʋsshukmʋlli hʋt yakni paknaka ya̱ tohwikeli̱hi̱chi tok; yakni ʋt fayoka̱ha̱chi cha, wʋnni̱hi̱chi tok oke.

¹⁹ Chim ata̱ya yʋt okhʋta ha̱ a̱yah ma̱, chi̱ hina putta kʋt oka chito ya̱ a̱ya tok oke; atuk o̱ ish a no̱ho̱wa yʋt hayaka tok keyu hoke.

²⁰ Moses micha Elon ittʋtuklo ka̱ tohnot chim okla ha̱ chukfʋlhpoa chomihchit ish pehliechi tok oke.