Atʋloa 76 - Chahta Holisso Holitopa 1886

Tʋloa pehlichi ʋt ʋhlepah isht a tʋloa chi̱ ho̱, hulittoblichit atʋloa Asaf ʋt ikbi tok.

¹ Chutah ya̱ Chitokaka yʋt ai ottʋni hoke, Islael a̱ hohchifo hʋt a chito hoke.

² Mikma̱ Salem ak o̱ ʋlhtipo ʋt i̱ hikkiakma̱, i̱ chukka yʋt Saion ak o̱ tʋllaya hoke.

³ Yʋmmak o̱ iti tʋnampo im uskinʋki puttah pʋlhki kʋt mʋlʋtha chohmi, telihpa, micha bʋshpo fʋlaya, micha ai ittibi aiena ka̱ a kubullichit kanchi tuk oke. [Yukopa.

⁴ Shohmʋlalit chi hʋlittopa kʋt na̱ wehpoa, nʋnih chaha puttah chiyuhmih kia, ish i̱ shaiyahlishke.

⁵ Chu̱kʋsh kʋllo ʋhleha hʋt wehpoʋshke; ilap mʋt nusishke; hʋttak chilita ʋhlehah moma kʋt ilap ibbak nan isht ai a̱hlichi ik ʋhayochoshke.

⁶ Chekob i̱ Chitokaka ma, ish im alʋmih ma̱, tʋnʋp itichʋnaha micha issubah ittʋtu̱klo kʋt nusit kʋniʋshke.

⁷ Chishno ak osh i̱ nukshopa he ʋlhpesa chia hoke; yohmi hoka̱ chi nokua hayokma̱, kʋta hosh chi tikba hikkia hinlah choh?

^8-9 Ʋba ya̱ nanah et ai ʋpesʋt ish haklochechi tok oke; Chitokaka yʋt chu̱kʋsh akka̱losi yakni paknaka aiyasha moma ka̱ okchalincha chi̱ hosh nan im apesʋt wʋkayah ma̱, yakni ʋt nukshopa cha chullosa tok oke. [Yukopa.

¹⁰ Hʋttak ishit nukhubela yʋt chi holittoblicha he bano hoka̱: nukhubela ont atampa hokʋno isht ish il ʋskuffʋchi hoke.

¹¹ Hʋchi̱ Chitokaka Chihowa ha̱ ʋnnumpah hʋsh il im onucchikmʋt, hʋsh im atobbashke; yʋmma̱ ʋfullublit aiyasha moma kʋt i̱ kummuta he ʋlhpesa ya̱ na̱ hʋlbina isht im o̱ho̱nashke.

¹² Huchitoka ʋhlchah im anukfilah chaha ya̱ tʋptulit kancha hinla hoke; mi̱ko yakni aiyasha putta kʋt i̱ nukshopa he ʋlhpiesa yoke.