Atʋloa 75 - Chahta Holisso Holitopa 1886

“Isht ish kanchin náh,” achi, tʋloa pehlichi ʋt isht a tʋloa chi̱ ho̱, hulittoblichit atʋloa Asaf ʋt ikbi tok.

¹ Yakoke e chim aiyahnishke, Chitokaka ma, chi hohchifo hʋt pi̱ bilinchi ka̱ yakoke il aiyahnishke; nanah a fehna ish yʋmi̱hi̱chi tuk a̱ oklah ʋnoli hoke.

² “Nittak ʋlhpisa ya̱ ishe likmʋt, ʋno ʋt ai ittillawwi im ʋpesa likma̱,

³ “Yakni micha hʋttak momah aiyasha kʋt bilashke; i̱ tonni̱k putta ka̱ ʋno ak osh ʋpissʋlechit hiohliche li tok oke. [Yukopa.

⁴ “Ilawʋta ʋhleha ha̱, Hʋsh ilawʋtʋn náh, im achi lih mʋt, hʋttak ik ʋlhpeso ʋhleha ha̱, Hʋchi̱ lʋpish a̱ hʋsh chahʋchin náh,

⁵ “Hʋchi̱ lʋpish a̱ chahʋchih fehnʋt hʋchik chahacho kashkeh, micha ikunla kʋllochit nukwa̱ya iksho hosh hʋchik ʋnumpolo kashkeh, im achi lishkeh,” ish achishke.

⁶ Chaha kʋt hʋshakohchaka, micha hʋshaiokʋttula, micha yakni hayaka yak o̱ a mintih keyu hoka̱.

⁷ Chitokaka yak osh nan im ʋpesa yoka̱: achʋffa ka̱ akka̱losechikmʋt, achʋffa kʋno chahʋchi hoke.

⁸ Isht ishko ʋt Chihowa ibbak a̱ foiyukka ho̱, oka pa̱kki ʋt wʋhlʋllih ma̱, nan ittaiyumah fehna hoka̱: yohmi ka̱ ilʋppak o̱ a tusholi na, hʋttak ik ʋlhpeso yakni paknaka aiyasha moma kʋt ishkot a tahlit lakchi banochih pulla hi oke.

⁹ Amba ʋno ʋto ʋno̱ho̱li li̱ billiashke; Chekob i̱ Chitokaka ya̱ nan ulachit ayokpʋche lashke.

¹⁰ Micha hʋttak haksi ʋhlehah lʋpish moma ka̱ chanlit kʋtulhi la hi oke; ai ʋlhpiesa lʋpish putta kʋto chahʋt wʋkaya hi oke.