Atʋloa 73 - Chahta Holisso Holitopa 1886

Atʋloa Asaf ʋt ikbi tok.

¹ A̱hlih, Chitokaka yʋt Islael, yʋmmʋt chu̱kʋsh kʋshofa ʋhleha ha̱, i̱ kana yoke.

² Amba ʋno ak okʋto saiyi ʋt kʋnia̱hosi tok oke; a no̱ho̱wa li kʋt sʋ shʋkkʋlʋllih naha tok oke.

³ Hʋttak ik ʋlhpeso ʋhleha hʋt isht im ai achukma ka̱ pi̱sa lih mʋt, ilefehnʋchi ʋhleha ha̱ i̱ putʋnno li tok okʋt.

⁴ Nan illi ha̱ isht a kummunta nanah kia ik im iksho hoka̱; mikmʋt imi lhampko hʋt kʋllo hoke.

⁵ Hʋttak osh nan isht ʋtaklʋmah chatuk a̱ ohmih keyuh; micha hʋttak a̱ ibafoiyukkʋt nan ik achukmo onuttulah keyu hoke.

⁶ Yʋmohmi hatuk o̱ ilefehnʋchi ʋt ishit shema yak osh innonchi yoke; ilbʋsshali ʋt na̱fohka chohmi hosh isht ompoholmo hoke.

⁷ Nia kak osh nishkin ʋt okhlibeli hoke; chu̱kʋsh nan anukfi̱hi̱lli tuk a̱ ont ia hoke.

⁸ Yʋmohmit ik ʋhobalot nan ik achukmo yo̱ anukfo̱kka hatuk osh ilbʋsshali yo̱ isht ʋnumpo̱ho̱li hoke; ilefehnʋchit ʋnumpuli hoke.

⁹ Ile chahʋchi kʋt ʋba shutik ak o̱ ai ʋnumpo̱ho̱li ka̱ ile chomihchi hatuk osh, isunlʋsh ʋto yakni yak o̱ hlupullit a̱ya hoke.

¹⁰ Yʋmohmi hatuk o̱ im okla hʋt fʋlamʋt im ona cha, oka yʋt ʋlotah achukma ho̱ i̱hi̱shko hoke.

¹¹ Mikmʋt, “Kʋtiohmi hosh Chitokaka yʋt ithana hinlah choh? micha Chaha i̱ Shahli ya̱ nan ithana yʋt nukfoiyukka hoh choh?” achi hoke.

¹² Yakeh, ilʋppʋt hʋttak ik ʋlhpeso yokak osh, nan im aiokpuloka ikshoh billia kak osh, nan immi hʋt i̱ shahlit i̱ ma̱ha̱yʋshke.

¹³ Pe pilla ho̱ sʋ chu̱kʋsh a̱ kʋshuffi lih mʋt, nan okpʋni keyu mak osh sʋbbak a̱ achefa le tuk oke.

¹⁴ Nittak moma ka̱ sʋ fa̱ha̱ma cha, onnahinli aiyukali ka̱ na̱ huttupa hʋt si onutto̱ho̱la tuk okʋt.

¹⁵ “Yakmihchit ʋnumpule lashke,” achi li hʋttok okmʋt, yakeh, chim ʋlla ʋhleha hak o̱ ak im ai a̱hlo ka he ʋttok oke.

¹⁶ Atuk osh ilʋppa̱ ʋkostininchih sʋ bʋnna hosh anukfilli lih ma̱, nan isht ʋtaklʋma yosh sʋ tikba ya̱ tʋkkali tuk o̱,

¹⁷ Pula̱ka Chitokaka im ʋboha hulittopa ya̱, im ai ishtaiyopi ka̱ ai anukfi̱hi̱lli la chi̱ hosh ona li tok oke.

¹⁸ Ahʋlʋsbi bieka ho̱ ish hiohlichi kʋt ai a̱hlishke, aiokpuloka yo̱ toblit akka pit ish pi̱hi̱lʋshke.

¹⁹ Yakosi ittita̱kla chohmi ho̱ aiokpuloka onʋshke; nanah a kummota yo̱ isht a lushomʋt kʋnniʋshke.

²⁰ Hulhpukunnʋt okcha kak o̱ chohmit, nan i̱ Shahlih ma, chi okchakmʋt, yʋmmʋt nan ʋhoba yatuk o̱ ish shittilema chi̱ hoke.

²¹ Yohmi hokak o̱ sʋ chu̱kʋsh ʋt humikmʋt, ʋm anukfila hʋt nʋhlah beka tok oke.

²² Mihmʋt nan ʋlhpoa chohmi li hatuk osh, nanah ithana la he keyu tok oke; nan ʋlhpoa chiyuhmi hosh chi takia a̱ha̱tta li tok oke.

²³ Yohmih kia chi takla a̱ha̱tta li̱ billiʋshke; chibbak ishtimpakimma ya̱ isht is sʋ hʋllʋllishke.

²⁴ Nanah ish ai anukfilli ya̱ a sʋlawet ish a̱ya chi̱ hoke, atuk osh i̱ himmak a̱ ahulittopa isht is si ona hi oke.

²⁵ Ʋba ya̱ kʋta hosh ʋm a̱ttah choh? mikmʋt yakni paknaka ya̱ inla ma̱ chibafohkit sʋ bʋnnah keyu hoke.

²⁶ Sʋn nipi micha sʋ chu̱kʋsh ʋt taha hoh kia, Chitokaka yʋt sʋ chu̱kʋsh a̱ i̱ tʋli chito, micha ʋmmih abillia yoke.

²⁷ Yakeh, chi̱ hupakichi ʋhleha hʋt aiokpulokʋt kʋnnia chi̱ hoka̱: chi̱ filʋmmit haksit ittʋnowa putta ka̱ isht ish kanchih pulla hoke.

²⁸ Amba ʋno yokʋto Chitokaka i̱ bili̱ka kak osh ʋm achukmʋshke; nanah isht ish ai a̱ha̱tta putta ka̱ ʋno̱ho̱li la chi̱ hosh a̱ Shahli Chihowa ha̱ ai ʋtukko li hoke.