Atʋloa 71 - Chahta Holisso Holitopa 1886

¹ Chihowa ma, chishno ak o̱ chi ai ʋtukko li hokʋt, ik sʋ hofahyo ho̱ billiashke.

² Chi ai ʋlhpiesa kak osh is sʋ kohchechi cha, is sʋ hlakuffichashke; chi haksubish a̱ awet is sa̱ wieli cha, is si okchalinchashke.

³ Ai a̱ha̱tta tʋli chito ya̱ is sa̱ toba na, nittak moiyuma ka̱ o̱ho̱na lashke; a̱ tʋli chito micha a̱ hulihta kʋllo chia hokʋt, si okcha̱ya he ish ʋpesa tuk oke.

⁴ A̱ Chitokaka ma, hʋttak haksi ibbak, nan ik ʋlhpeso yʋmihchi micha chu̱kʋsh humi ibbak putta ka̱ is si a hlʋkuffichashke.

⁵ Sʋ hemi̱ttah mak inli hosh i̱ yimmit anukchieto li chia hokʋt, a̱ Shahli Chihowa ma.

⁶ Im ushʋto a kohcha li hak inli ho̱ is sʋ hʋllʋllih chatuk oke; hʋshki ikfoka a kohcha li tok taiyakla ka̱, chishno ak osh nan is sʋm atahli yoka̱, chi holittobli̱hi̱chi lih billiʋshke.

⁷ Lawa ka̱ nan inlah fehna im ittillawwi li yoke; yohmih kia ʋm ai ʋtukko kʋllo chia hoke.

⁸ Nittak moma ka̱ isht chi holittoblichi ʋt sʋtih ha̱ ʋluttoakma̱, isht chi a hulittopa yʋt ʋluttoa chi̱ hoke.

⁹ Sipoknit sʋ taiyahakma̱, chik sʋ kancho kashke; ʋmi lhampko hʋt a̱ tahakma̱, issʋt chik sa̱ filʋmmo kashke.

¹⁰ A̱ tʋnʋp ʋhleha hʋt nana ka̱ si achih mʋt, ʋm ilhfiopak a̱ im ayicchi ʋt isht ittim ʋnumpuli hosh,

¹¹ “Chitokaka yʋt issʋt kanchi tuk o̱, hlʋkuffichi ʋt iksho hoka̱, hliohlit oh ishíh,” achi hoke.

¹² Chitokaka ma, is sa̱ mishema̱hchin náh; a̱ Chitokaka ma, tu̱shpʋt ant is si ʋpelashke.

¹³ Ʋmish shilombish a̱ i̱ tʋnampi ʋhleha hʋt hufahyashke, ont tahashke; si aiokpuloka he hoyo ʋhleha hʋt na̱ mihachi micha kʋllakshi yosh isht onuttulashke.

¹⁴ Amba ʋno ʋto chi̱ yi̱hi̱mmi li̱ billiakmʋt, chi holittoblichi moma ka̱ ʋlbillit chi ayokpa̱ha̱chi la chi̱ hoke.

¹⁵ Chim ai ʋlhpiesa, chim ai okcha̱ya aiena kʋt holhtina ka̱ ak ithano hokʋt, nittak moma ka̱ sʋtih hʋt ʋno̱ho̱la chi̱ hoke.

¹⁶ Nan i̱ Shahli Chihowa hʋt na̱ chinto yʋmihchi putta ka̱ ieshi hosh ona la chi̱ hoke; chim ai ʋlhpiesa, chimmi hak illa ho̱ ʋno̱ho̱li la chi̱ hoke.

¹⁷ Chitokaka ma, sʋ hemi̱tta tok ai ʋlhit mi̱hi̱ti ka̱ nan is sʋm aba̱ha̱chi na ant himmʋkka ho̱ nanah a fehna ish yʋmi̱hi̱chi ka̱ ʋno̱ho̱li lih chatuk oke.

¹⁸ Mikmʋt sipokni, pa̱shi tohbit taiyaha ka̱ ona lih kia, chik sʋ kancho ho̱, isht ai unchululi himmak minti ka̱ chish shakba yʋt na̱ yʋmi̱hi̱chi tuk a̱ im ʋnoli likmʋt, nan isht chim aia̱hlika ya̱ himak pillah aiyasha he moma ka̱ im ʋnoli lashke.

¹⁹ Yohmi ka̱ chim ai ʋlhpiesa yʋt achahaka ya̱ ona kak oke, na̱ chinto ish yʋmi̱hi̱chih chatuk Chitokaka chiah ma; kʋta hosh chishno ya̱ chiyuhmih choh, Chitokaka ma?

²⁰ Nan ilbʋssha lawah micha pʋllʋmmi ho̱ ish pi pesa̱ha̱chi tuk ʋt fʋlʋmminchit ish pi okchʋlashke; mikmʋt yakni ahufobi putta ka̱ fʋlʋmminchit ish pi a kucchashke.

²¹ Nanah a fehna is sa̱ yʋmi̱hi̱chi kʋt i̱ shʋlihchit isht ish ma̱ha̱ya cha, fʋlamʋt ant is sʋ hopuhlʋlashke.

²² A̱ Chitokaka ma, ʋno ak kia chim aia̱hlika ya̱ ʋhlepa ho̱ isht ayokpa̱ha̱chi la chi̱ hoke; hap o̱ ulachit isht chi ayokpʋche la chi̱ hoke, Islael i̱ hulittopa ma.

²³ Nan ulachit chi ayokpʋche likma̱, sʋttiʋlbi, micha ʋmish shilombish ish okchalinchi tuk ittʋtuklo kʋt na̱ yokpʋt tʋloa chi̱ hoke.

²⁴ Mikma̱ si aiokpuloka he ho̱ho̱yo ʋhleha hʋt hufahyah fehna kak o̱, sʋ sunlʋsh mʋt nittak moma ka̱ isht chim ai ʋlhpiesa ya̱ isht ʋnumpo̱ho̱la chi̱ hoke.