Atʋloa 69 - Chahta Holisso Holitopa 1886

Tʋloa pehlichi ʋt “lili puttah,” achi, ishit tʋloa chi̱ ho̱, atʋloa Lewi ʋt ikbi tok.

¹ Oka yʋt chukkoʋt ʋmish shilombish a̱ ʋla hoka̱, is si okchalinchashke, Chitokaka ma.

² Ahikia yʋt iksho ho̱ lukchuk hufobi ya̱ okakʋnia lishke; oka ahufobi ya̱ ona lishke, mihma̱ oka chito ʋt si ompohomoshke.

³ Pa̱ha̱ya li kak osh tikambit sʋ tahʋshke; sʋn nʋlʋpi ʋt nukshilʋt tahʋshke; a̱ Chitokaka ho̱ho̱yo li kak osh, sʋ nishkin ʋt iellit tahʋshke.

⁴ Nanihmih keyu ho̱ a̱ nukkilli ʋt lawa kʋt pa̱shi sʋ nushkoboh o̱ hieli ka̱ i̱ shahlishke; nan a̱hlih keyu ho̱ isht a̱ tʋnampi sʋ tahli ʋhleha hʋt kʋlloshke: yʋmma̱ wehpule li tuk keyu hoke; yʋmmak atuk okmʋto, i̱ fʋlʋmmiche la hinla hoke.

⁵ Chitokaka ma, ʋm anukfilah iksho tuk a̱ chishno ʋt ish ithanʋshke; micha a yushoba li putta kʋt chi̱ lumah keyushke.

⁶ Chi anukchieto ʋhleha hʋt ʋno pulla kak o̱ isht ik hufahyo kashke, nan i̱ Shahli, Chihowa, nan u̱ha i̱ Chitokaka ma; chi ho̱ho̱yo putta kʋt ʋno pulla kak o̱ hufahya isht ik onuttolo kashke, Islael i̱ Chitokaka ma.

⁷ Chishno pulla kak o̱ hʋttak bi̱ka im ishit hufahya yʋt si onuttoiyula hoka̱, hufahya yʋt sʋ nʋsshuka ya̱ ompoholmoshke.

⁸ Ittibapishi lih ʋhleha ha̱ kʋnah ik ithano i̱ tuba lih mʋt, ʋnonti hʋshki im ʋlla ʋhleha ha̱ oklushi inla i̱ tuba lishke.

⁹ Chi̱ chukka i̱ hullo lih pulla kak osh tahlit sʋ kanchishke; ik si ʋhobalo ʋhleha hʋt ik ʋhobalot ʋnumpo̱ho̱li kʋt si onuttulʋshke.

¹⁰ Mihma̱ okissa hosh sʋ nishkin okchi mi̱hintit ʋmish shilombish ʋt ilbʋsshah ma̱, yʋmma̱ nan isht sʋ mehʋchi tuk oke.

¹¹ Mihma̱ bancha yosh a̱ na̱fohka yo̱ fohka le tuk oke; mihmʋt nanah isht ʋlhpisa ho̱ i̱ tuba li tuk o̱,

¹² Huliht okhisa chieya kʋt ishit si ʋnumpo̱ho̱lih ma̱, oka humi ishko ʋhleha ha̱ im ʋlhtʋloak tuba lishke.

¹³ Amba ʋno yak okʋto ish ayokpancha he nittakma̱ Chihowa chia hak o̱ ʋnnumpah ilbʋssha pit chima li hoke: Chitokaka ma, nan isht ish i̱ hullo chi̱ la̱wa hokʋt, is sʋ haklo cha, chim ai okcha̱ya ai a̱hli ya̱ is sʋmashke.

¹⁴ Ahlʋbeta ya̱ kohchit is sʋ hlakuffichikma̱, ak okakʋniyo kashke; a̱ nukkilli ʋhleha ha̱, micha oka hufobi aiena ka̱ a kohchʋt sʋ hlakuffashke.

¹⁵ Oka chito ʋt ik si ompohomo kashke; mikma̱ oka hufobi ʋt isht ik sʋ nanʋblo kashke; mikma̱ hichukbi ʋt itih ha̱ isht ik si o̱ kʋmalo kashke.

¹⁶ Nan isht ish i̱ hullo ʋt achukma hokʋt, is sʋ haklashke, Chihowa ma; nan isht ish i̱ nukha̱klo ʋt chim ʋpakna hatuk pullah mak osh, awet is sa̱ filemashke.

¹⁷ Micha chi nʋsshuka ya̱ chi̱ tishu ha̱ chik i̱ luhmo kashke; a̱ pʋllʋmmi hoka̱, tu̱shpʋt is sʋ haklashke.

¹⁸ Ʋmish shilombish a̱ awet i̱ bili̱chit ish okchalinchashke; a̱ tʋnʋp pulla kak o̱ is sʋ hlakuffichashke.

¹⁹ Nan ik si ʋhobalo ka̱, micha nan ishit sʋ hofahya, micha nan ishit sʋ kalʋkshi ka̱ ish ithanʋshke; a̱ tʋnampi ʋhleha hʋt momʋt chi tikba aiyasha hoke.

²⁰ Nan ik si ʋhobalo ak osh sʋ chu̱kʋsh a̱ kubʋffih ma̱, a̱ pʋllʋmmih fehnʋshke; mihmʋt ibanukha̱klo ya̱ ho̱ho̱yo le tuk kia, ikshoshke; mihmʋt na̱ hupohlʋli ya̱ hoyo le tuk kia, ak ʋhayochoshke.

²¹ Mihma̱ ʋm ilhpak a̱ bʋsunlʋsh ibafohkit sʋpetakmʋt, sʋtukshilakma̱, oka hawʋshko yo̱ sʋpeta hoke.

²² Im aiimpa itikba hikkia kash osh ishit hukli ik i̱ tubá; mikmʋt nuktanla putta ka̱ ayuka yosh i̱ tubashke.

²³ Nishkin ʋt im okhleli cha, ik peso kashke, micha i̱ chʋshwa ya̱ ish winali̱hi̱chi na billiashke.

²⁴ Ishit chi nokua ya̱ ish o̱ fuhoblashke, mikma̱ chi nukhubela lʋshpa yʋt sakkashke.

²⁵ I̱ tʋmahushi ʋt chukkillissashke; im ʋlhtipo putta ka̱ kʋnah a̱ha̱tta kʋt iksho kashke.

²⁶ Kʋna ho̱ chishno ak osh na̱ huttupa ish onucchi tuk a̱ ilbʋsshali hoka̱; mikmʋt chimmi hosh nʋhla tuk ʋhlehah i̱ pʋlʋmmi ka̱ isht ʋnumpo̱ho̱li hoke.

²⁷ Nan ik ʋlhpeso ʋt ittʋlbehkʋchi ho̱ ish onucchi na, chim ai ʋlhpiesa ya̱ ik ʋhʋllayo kashke.

²⁸ Ai okcha̱ya hulisso ha̱ a kʋshofashke; micha ai ʋlhpiesa ʋhleha ha̱ ai ibafo̱kkʋt ik hulisso kashke.

²⁹ Amba ʋno ʋto sʋlbʋsshʋt, sʋ nukhʋmmishke; chim ai okcha̱ya yokʋt achaha sʋ benilechashke, Chitokaka ma.

³⁰ Atʋloa yo̱ Chitokaka hohchifo ha̱ ishit hulittobliche likmʋt, yakoke im aiyahnit ishit chitoliche lashke.

³¹ Mikma̱ ilʋppak o̱ Chihowa hʋt im achukma kʋt, wak, wak nakni kia lʋpish a̱sha micha iyi chuhla ya̱ im i̱ shahla chi̱ hoke.

³² Chu̱kʋsh akka̱losi ʋhleha hʋt pisakmʋt, yokpashke; Chitokaka hoyo hʋchia hʋt hʋchi yokpa cha, hʋchi chu̱ kʋsh ʋt o̱kchashke.

³³ Chihowa hʋt nan ik im iksho ʋhleha ha̱ i̱ hʋpona̱ha̱klo hoka̱; micha immi hosh yuka ka̱ shittilemah keyu hoke.

³⁴ Ʋba micha yakni, okhʋtah puttah micha nana hosh yʋmma̱ a bʋllʋllit a̱yakmʋt, momʋt hulittoblichashke.

³⁵ Chitokaka yʋt Saion a̱ okchalincha chi̱ hoka̱; micha Chutah i̱ tʋmahah hulihta putta ka̱ ikbi na, yʋmma̱ iesha chi̱ kʋt aiyasha chi̱ hoke.

³⁶ Mikma̱ i̱ tishuh ʋhlehah ishtatiaka yʋt ieshikma̱, i̱ hohchifo ha̱ ahninchi ʋt yʋmma̱ aiyasha hi oke.