Atʋloa 66 - Chahta Holisso Holitopa 1886

Tʋloa pehlichi immih, hulittoblichit atʋloa yoke.

¹ Yakni moma kʋt Chitokaka ya̱ hʋsh i̱ shʋkkapashke.

² Hohchifoh hulittopa ya̱ nan ulachit hʋsh ayokpʋchashke; ahulittopa hʋsh ema hosh, hʋsh hulittoblichashke.

³ “Nan ish a yʋmi̱hi̱chi ʋt na̱ pʋllʋmmih fehna hoke; chimi lhampko chinto kak o̱ chi̱ tʋnʋp putta kʋt chim ʋkahchunnolih pulla chi̱ hoke.

⁴ “Yakni moma kʋt chi ayokpachi cha, chi̱ tʋloʋt chi hohchifo ha̱ nan ulachit ayokpʋchashke,” Chitokaka ya̱ hʋsh im achashke. [Yukopa.

⁵ Intah! Chitokaka nan isht ai a̱ha̱tta ya̱, i̱ nukshopa he ʋlhpesa ho̱ hʋttak im ʋlla ʋhleha ha̱ a kʋniomi̱hi̱chih chatuk a̱ hu pesáh.

⁶ Okhʋta ha̱ yakni shila ikbi tok: okhina ya̱ akka nowʋt oklah hlupulli tok; yʋmma̱ fehna ka̱ isht il a yokpashkeh.

⁷ Nan isht im aia̱hlika yak o̱ ishit pehliechi na billia yosh, i̱ holhponayo hʋt oklushi poiyutta ka̱ ʋpesa̱ha̱chi hoke; i̱ Shahli im a sʋnali ʋhleha hʋt isht ik ilawato kashke. [Yukopa.

⁸ Oklah puttah ma, pi̱ Chitokaka ya̱ oh ayokpʋchíh; hulittobli̱hi̱chi ʋnnumpa ha̱ hʋsh haklochechashke.

⁹ Yʋmmak osh pimish shilombish a̱ ai okcha̱ya hillechi cha, piyi yʋt kʋnʋlla he ik ahno yoke.

¹⁰ Yohmi kʋt imomaka ish pi pesa tok; tʋli hʋta yʋt kʋshofa kak o̱ chomihchi hosh ish pi kashuffi tok oke.

¹¹ Nan ishit hukli ya̱ ish pi fohkichechi tok; isht il a hlampko ya̱ na̱ wekih fehna ish onucchi tok oke.

¹² Pi nushkobo ha̱ hʋttak ʋt issubah o̱ binilit pi ʋbanʋbla he ish ahni tok; luak micha oka aiena ka̱ il ibachukkoa tok oke; yohmi tuk kia nanah a lawah fehna ho̱ isht ish pi ona tuk oke.

¹³ Na̱ hukmit isht ayokpa̱ha̱chi yo̱ ieshit chim ʋboha ya̱ ona la chi̱ hoke; ʋnnumpah il ono̱ho̱cchi li yatuk ʋt chim atobbi la chi̱ hoke.

¹⁴ Yʋmma̱ nan ʋm a pʋllʋmmih mʋt, sʋttiʋlbi ʋt wʋkama na, sʋtih hʋt ʋnumpuli tuk a̱ yʋmihchi la chi̱ hoke.

¹⁵ Nia puttah hukmit isht ayokpʋchi, chukfi nakni luʋt shubulli bʋlama ibafo̱kkit chim issa la chi̱h; wak, issi kusoma iba fo̱hkit ishit chi ayokpʋche la chi̱ hoke. [Yukopa.

¹⁶ Intah! Chitokaka i̱ nukshopa ʋhlehah momah ma, hu haklóh, mikma̱ ʋmish shilombish a̱ nan im ʋtahli tuk a̱ ʋnoli lashke.

¹⁷ Yʋmmak o̱ sʋtih ha̱ isht i̱ pa̱ha̱ya le tuk; mihma̱ hulittoblichi yosh sʋ sunlʋsh a̱ fo̱kka tuk oke.

¹⁸ Sʋ chu̱kʋsh a̱ nan ik ʋlhpeso ya̱ a pisʋt ayokpa̱ha̱chi li hokma̱, a̱ Shahli ʋt a̱ hʋponakla he keyu hoke.

¹⁹ Yohmih kia Chitokaka yʋt haklo tuk ʋt a̱hlishke; ʋm ʋnnumpah ilbʋssha ʋnnumpa ha̱ a̱ hʋponaklo tuk oke.

²⁰ Chitokaka yʋt ʋm ʋnnumpah ilbʋssha ya̱ ik kancho kish, nan isht i̱ hullo ya̱ ik sʋm esho tuk okʋt, hulittopashke.