Atʋloa 65 - Chahta Holisso Holitopa 1886

Tʋloa pehlichi ʋt a tʋloa chi̱ ho̱, hulittoblichit atʋloa Lewi ʋt ikbi tok.

¹ Saion a̱ nuktaiyalʋt a hulittoblichi ʋt a chimmi hoke, Chitokaka ma, mikma̱ chishno ak o̱ ʋnnumpah chim il onucchi tuk ʋt chim atobba hi ak osh ʋlhpesa hoke.

² Ʋnnumpah ilbʋssha haklo ma, chishno ak o̱ hʋttak moma kʋt chim ʋla he ʋlhpesa hoke.

³ Nan ik ʋlhpeso ʋnnumpah putta kʋt kʋllo kʋt ʋm atampa hoke; nan ʋlhpisa e kubʋffi putta kak okʋno ish pi̱ kʋshuffashke.

⁴ Kʋna ho̱ ʋtokulit chi̱ bilika isht ish la na chi̱ wanuta puttah a̱ha̱tta kʋt na̱ yokpa hoke; chim ʋboha, chi̱ tempel hulittopa nan isht a yokpa aiyasha ka̱ ishit pim ʋlhpiesashke.

⁵ Ai ʋlhpiesa na̱ pʋllʋmmi putta ho̱ isht ish pim ʋfalʋmmichi hoke, pim ai okcha̱ya Chitokaka, yakni ont ʋlhih momah, micha okhʋtah hupakih i̱ shahli kak kia anukchieto ma.

⁶ Nan isht im aia̱hlika isht ʋskuffaiyachi hosh, imi lhampko hak o̱ nʋnih chaha putta ka̱ kʋllochit ishit tʋlohli chia hoke.

⁷ Okhʋtah fopa, oka bʋnʋtha fopa, oklushi puttah shʋkapa ka̱ chulosʋchi chia hoke.

⁸ Yohmi hatuk o̱ ont ai ʋlhi puttah aiyasha kʋt nan isht chi ai ottʋni putta ka̱ i̱ nukshopah chatuk oke; onnahinli a kuccha, micha opyaka a kuccha ittʋtu̱klo ka̱ yokpalichit ish tʋloʋchi hoke.

⁹ Yakni ya̱ ish im a̱ya cha ish lʋchali hosh, ish niachih fehna hoke; Chitokaka im okhina yʋt oka ʋlota hoke; yakni ya̱ yakmihchit ish ʋtahli hosh, tanchi ya̱ ish im ʋtahli hoke.

¹⁰ I̱ hina putta ka̱ lʋchalih fehnʋt, i̱ bʋnaiya putta ka̱ ittilawwichit, u̱hu̱ba kak o̱ isht ish shufoblichi hosh, i̱ nan uffo ya̱ isht ish yokpali hoke.

¹¹ A chi achukma afʋmmi ha̱ isht ish iachukolichishke; mihma̱ ish ata̱ya putta kʋt na̱ nia yo̱ et akkakohli hoke.

¹² Yakni hayaka ʋlhpoa aiasha puttah kia awet ono̱ho̱cchi hoke; mikma̱ nʋnih putta kʋt na̱ yokpa yo̱ ishit shema hoke.

¹³ Ʋlhpoa ai impa putta ka̱ ʋlhpoa chipinta yʋt ompoholmo hoke; mikma̱ okfah putta kʋt onush o̱ isht ompoholmo hoke; ittiba yokpʋt shʋkkapa hoke; tʋloah aiena hoke.