Atʋloa 60 - Chahta Holisso Holitopa 1886

Tʋloa pehlichi ʋt nan isht ʋtukkoa achukma, achi, ishit tʋloa̱ chi̱ ho̱, Silia Mesopotemia micha Silia Sobah ittʋtuklo ka̱ ittibit im aiyʋchih ma̱, ʋnonti Choab ʋt fʋlama cha, Hʋpih Okfa ha̱ Etom oklah hʋttak tʋhlepah sipokni awahtuklo ho̱ ai ʋbit tahlih ma̱, atʋloa hulittopa isht im abʋcha chi̱ ka̱ Lewi ʋt ikbi tok.

¹ Chitokaka ma, pi kanchit ish pitti teʋbli tuk oke; chi nukhubela tuk kia, ish pi̱ fʋlʋmmichi hokbano!

² Yakni ya̱ ish winaliche tuk; ish ittʋbokahliche tuk oke; ittʋbokahli ya̱ ish ʋpoksiachashke; fayoka̱ha̱chi hoka.

³ Chim okla ha̱ na̱ kʋllo ish pisachi tuk; oka pa̱kki ishit chukfuloha ish pishkuchechi tuk oke.

⁴ Ʋnnumpah a̱hli pulla kak o̱, ayimitʋt ʋba tʋkalicha chi̱ ka̱, chi̱ nukshopa ʋhleha ha̱ shʋpha ish ema tuk oke. [Yukopa.

⁵ Chi̱ hulittopa ʋhleha hʋt hlʋkuffa chi̱ ka̱, chibbak ishtimpakimma isht ish okchalinchi cha, ʋnnumpah ilbʋssha ish pim aia̱hlichashke.

⁶ Chitokaka yʋt hulittopa kak osh ʋnumpulishke: “Im aiyʋt na̱ sʋ yokpa chi̱ hoke; Shekem a̱ ittʋkʋshkule likmʋt, Sukkolh okfa ha̱ ʋpesʋt ittʋkashʋbli la chi̱ hoke.

⁷ “Kileat ʋt ʋmmi hokma̱, Manasseh ʋt ʋmmi hoke; mikma̱ Eflaim ʋt sʋ nushkuboh ishit hulmo yoke; Chutah ʋt ʋm ahulittopa i̱ tʋbi yoke.

⁸ “Moab ʋt ai il achefa li ampo yoke; Etom a̱ a̱ shulush pit o̱ pila la chi̱ hoke; Filistia oklah hʋchia hʋt ʋno ak o̱ hʋs sa̱ shʋkapashke,” achi tuk oke.

⁹ Kʋta hosh tʋmahah hulihta ya̱ sʋsht ia chi̱h choh? kʋta hak osh Etom a̱ sʋlawet ona hinlah choh?

¹⁰ Ish pi kanchi tuk osh pi̱ tʋshka chipota ya̱ ibafoiyukkʋt ish ia he keyu, Chitokaka chia hak keyuh choh, Chitokaka ma?

¹¹ Pi̱ tʋnampi ya̱ a kohchit ish pi ʋpelashke; hʋttak o̱ ai okcha̱ya yokʋto nanah keyu hoka̱.

¹² Chitokaka pulla ho̱ tʋnʋp chilita e tuba chi̱ hoke; mikma̱ yʋmmak osh pi̱ tʋnampi ʋhleha ha̱ yakni ʋhʋlhicha chi̱ hoke.