Atʋloa 58 - Chahta Holisso Holitopa 1886

“Isht ish kanchin náh,” achi, tʋloa pehlichi ʋt isht a tʋloa chi̱ ho̱, atʋloa hulittopa Lewi ʋt ikbi tok.

¹ Hʋttak ushi ʋhlehah ma, ai ʋlhpiesa ʋnumpulit, ai ittillawwi hʋsh ʋpesa he tuk okak osh, hʋsh chullosa ho̱ mʋlhih choh?

² Yʋmmak het asha na, chu̱kʋsh ʋno nan ik ʋlhpeso hʋsh yʋmi̱hi̱chi hoke; yakni ya̱ hʋch ibbak isht hʋsh ilbʋsshali yo̱ isht hʋsh ai im apesa hoke.

³ Hʋttak ik ʋlhpeso ʋhleha hʋt ushʋto a kohchah mak inli hosh ai ʋlhpiesa i̱ filʋmmit ia hoke; ikfoka kohchah mak inli hosh ʋnnumpah hulabi ʋnumpulit yushobʋt ia hoke.

⁴ Isht illi im a̱sha kʋt sinti im isht illi ak o̱ chiyuhmi hoke: sinti chilita ik hʋponaklo yosh ilap haksubish i̱ kʋmali kʋt,

⁵ Na̱ yushpʋkʋmmi ʋhleha hʋt im punna hosh i̱ tʋlo̱ho̱wah kia, i̱ hʋponakla he keyu kak o̱ chohmi hoke.

⁶ Chitokaka ma, itih ha̱ in nuti ya̱ ish tilohlichashke; koi huchito himithoa in nuti ya̱ ish bushullichashke, Chihowa ma.

⁷ Bilʋt taha kʋt oka yosh yʋnʋllit kʋnia ka̱ chohmashke; im uskinʋki ya̱ o̱ hili̱hi̱chit hu̱ssa hoh kia, tʋptuʋt yushtumushli yak o̱ chiyuhmashke.

⁸ Yushubbi yosh bilʋt kʋnia kak o̱ chohmashke; ik ai ono ho̱ ohoyo hʋt ʋlla eshi na hʋshi a̱ ik peso ak o̱ chohmashke.

⁹ Hʋchi̱ shuti putta kʋt kʋtih lua ka̱ hʋlela he keyu ki̱sha ho̱, okcha̱ya ho̱ nukhubela hosh ʋmahlichit ishit kanchashke.

¹⁰ Ilai ukha na pisa kak osh ai ʋlhpiesa yʋt na̱ yokpashke; hʋttak ik ʋlhpeso im issish a̱ iyi isht ʋchefashke.

¹¹ Mikma̱ hʋttak ʋt, “Ai ʋlhpiesa yʋt na̱ waya im a̱sha kʋt a̱hlishke; yakni ya̱ nan ai ʋpehi̱sa yosh Chitokaka yʋt binnili kʋt a̱hlishke,” achashke.