Atʋloa 56 - Chahta Holisso Holitopa 1886

Tʋloa pehlichi ʋt hupakih aiyasha pʋchi yushoba chullosa isht a tʋloa yo̱ Kalh a̱ Filistin ʋt ai ishih ma̱, tʋloa hulittopa Lewi ʋt ikbi tok.

¹ Chitokaka ma, is sa̱ nukha̱klashke; hʋttak ʋt ishit sʋ nanʋblih bʋnna hoka̱: nittak moma ka̱ sʋtti̱hi̱bi hosh sʋlbʋsshali hoke.

² A̱ tʋnampi ʋhleha hʋt nittak moma ka̱ ishit sʋ nanʋblih bʋnnʋshke; ilefehnʋchi hosh sʋttibi ʋt lawa hokʋt.

³ A sʋ nukshopa he nittak oh kia, chi anukchieto la chi̱ hoke.

⁴ Chitokaka yak o̱ (im ʋnnumpa ha̱ hulittobliche la chi̱ hoke,) Chitokaka yak o̱ anukchieto li hokʋt, sʋ nukshopa he keyuh; hʋttak ʋt nanta ho̱ sʋ katimihcha hinlah choh?

⁵ Nittak moma ka̱ ʋm ʋnnumpa ha̱ shʋnayʋchi hoke; ik achukmo ho̱ a̱ sʋnalit anukfillih bieka hoke.

⁶ Oklah ittʋhobʋt lumʋt a no̱ho̱wa li ka̱ ʋpesʋchi hoke; ʋm ilhfiopak im ayi̱hi̱cchi hokʋt.

⁷ Nan ik ʋlhpeso yʋmihchi hokak osh isht a hlʋkuffi ʋt im a̱sha chi̱ hoh choh? nukhubela hosh oklah putta ka̱ akka isht ish onashke, Chitokaka ma.

⁸ Chishno ak osh a no̱ho̱wa le tuk a̱ ish hutihna tuk oke; sʋ nishkin okchi ya̱ chi̱ kutoba ish ʋnashke; chi̱ hulisso ha̱ a hulissoh keyuh choh?

⁹ Yohmi ho̱ nittak nana ho̱ chi̱ pa̱ha̱ya likma̱, a̱ tʋnʋp ʋhleha hʋt fʋlama chi̱ hoke; ilʋppak o̱ ithana lishke; Chitokaka yʋt sʋbafoiyukka hoka̱.

¹⁰ Chitokaka yak o̱ (im ʋnnumpa ha̱ hulittobliche la chi̱ hoke,) Chihowa hak o̱ (im ʋnnumpa ha̱ hulittobliche la chi̱ hoke,)

¹¹ Chitokaka yak o̱ anukchieto li hokʋt, sʋ nukshopa he keyuh; hʋttak ʋt nanta ho̱ sʋ katimihcha hinlah choh?

¹² Chitokaka ma, ʋnnumpah chim il ono̱ho̱cchi le tuk ʋt si onuttoiyula hokʋt, yakoke ahnit isht ayokpʋchi putta ka̱ chim atobbi la chi̱ hoke.

¹³ Ʋmish shilombish a̱ nan ai illi ai ishit is sʋ hlakuffichi tuk oka̱, saiyi ʋt ik akkamo ka chi̱ ka̱ is sʋ hlakuffichi tuk o̱, okcha̱ya im atohwikeli a̱ha̱ttʋt Chitokaka itikba a no̱ho̱wa lih keyuh choh?