Atʋloa 55 - Chahta Holisso Holitopa 1886

Tʋloa pehlichi ʋt ʋhlepah isht a tʋloa chi̱ ho̱, nan ithʋnanchi atʋloa Lewi ʋt ikbi tok.

¹ Ʋm ʋnnumpah ilbʋssha ya̱ ish hʋponaklashke, Chitokaka ma; micha nan asilhha li ka̱ chik im ile luhmo kashke.

^2-3 Is sa̱ hʋponaklo cha, is sʋm ayokpʋchashke; tʋnʋp ʋt ʋnumpuli kak o̱, micha hʋttak ik ʋlhpeso ʋt ilbʋsshali kak o̱, ik sʋm ʋlhpeso hosh ʋnumpulit hikiki̱yʋt hi̱hi̱ha lishke; nan ik ʋlhpeso ya̱ si onucchi cha, nukhubela hosh a̱ sʋnali hoka̱.

⁴ Nan illi isht a kumu̱hu̱ta yʋt si onuttula hatuk o̱ sʋ chu̱kʋsh ʋt sʋ nukhʋmmi hoke.

⁵ Kummota yosh si ompoholmo hatuk o̱, nukshopa micha wʋnni̱hi̱chi ʋt sʋ nukfokkʋshke.

⁶ Mihma̱, “Pʋchi yushoba sʋnahchi ohmi ka̱ i̱shi li hatuk okbano! hikʋt kʋnia lish, foha la he tuk oke.

⁷ “Yakeh, hupakichit pit kʋnia lish, yakni hayaka yo̱ a̱ha̱tta la he tuk oke. [Yukopa.

⁸ “Pʋlhki kʋt mahlih fopa ya̱ i̱ shʋlihchit, mahlih kʋllo ya̱ i̱ shʋlihchi hosh tu̱shpʋt i̱ kʋnʋllit ai ʋtukko ya̱ ona la he tuk oke,” achi le tuk oke.

⁹ A̱ Shahlih ma, isht ish kanchashke, isunlʋsh a̱ ish itti̱ filʋmmichashke; tʋmaha ha̱ ilbʋsshalih micha ittʋchoa kʋt aiyasha ho̱ pisa li hoka̱.

¹⁰ Nittak micha ninak aiena ka̱ hulihta chaha ya̱ o̱ hiohlit ʋpakfoiyupa hoke; mihma̱ nan ik ʋlhpeso, na̱ pʋlʋmmi aiena kʋt im ai itti̱takla ya̱ aiyasha hoke.

¹¹ Im ai itti̱takla ya̱ nan okpulot taha kʋt aiyasha hoke; mihma̱ im ai ittʋnowa ya̱ ilbʋsshali micha na̱ haksichi ʋt a mukofah keyu hoke.

¹² Tʋnʋp osh na̱ sʋ mehah keyu hoka̱; yʋmmak atuk okmʋno, ʋm ʋlhpesa he tuk: a̱ nukkilli yosh a̱ sʋnalit ile chahʋchih keyu hoka̱; yʋmmak atuk okmʋno, im ile luhmi la he tuk oke.

¹³ Amba hʋttak sʋttillawwi, ittʋpeha li, ittithana li chia háh.

¹⁴ Ʋnnumpah achukma il itti̱ mihakmʋt, oklah shʋkkapa ho̱ ʋpi̱hʋt Chitokaka im ʋboha il o̱ho̱nah beka tok áh.

¹⁵ Chekosi nan illi hʋt onuttulashke; okcha̱yah momʋt illi aiasha ya̱ ilhkolashke; aiasha ya̱ micha chu̱kʋsh anu̱kaka ya̱ nan ik achukmo ʋt aiyasha hoka̱.

¹⁶ Ʋno ʋto Chitokaka ya̱ i̱ paya la chi̱ hoke; mikma̱ Chihowa hʋt si okchalincha chi̱ hoke.

¹⁷ Opyaka, onnahinlih micha tʋbokolih aiena ka̱ ik sʋm ʋlhpesot ʋnumpulit sʋtih kucchi la chi̱ hoke; ʋm ʋnnumpah hakloh pulla chi̱ hoka̱.

¹⁸ Ʋm a sʋnali ʋt lawa hokak o̱, a̱ tʋnampi ya̱ ʋmish shilombish a̱ imi̱ hlʋkuffechi na, isht ʋm ai achukmah pulla chi̱ hoke.

¹⁹ Inlʋt ilaiyukah keyu hatuk osh Chitokaka i̱ nukshopah keyu ʋhleha ha̱, Chitokaka yʋt binnilit billia yʋt haklo cha, i̱ pʋlʋmmichashke. [Yukopa.

²⁰ Itti̱kana yatuk a̱ im a sʋnalit ibbak a̱ o̱ wielishke; nan ittim ʋpesa yatuk ʋt kubʋffishke.

²¹ Itih ha̱ kohcha kʋt pishukchi nia chohmit hʋlushkih kia, tʋnampi yosh chu̱kʋsh a̱ a foiyukka hoke: im ʋnnumpah putta kʋt lʋpushki kʋt bila i̱ shahlih kia, yʋmmʋt bʋshpo fʋlaya ʋlhtaha yoke.

²² Nan isht a chi̱ weki ya̱ Chihowa hak o̱ ish onucchashke; mikma̱ yʋmmʋt chi hʋllʋlla hi oke; ai ʋlhpiesa ya̱, ik kʋnʋllí, im ahna he keyu hoke.

²³ Amba Chitokaka chia hʋt hichukbi aiokpuloka akka isht ish ona hi oke; hʋttak issish hlʋtʋbli micha haksichi ʋhleha hʋt i̱ nittak a he tuk a̱ iklʋnnah kia onʋt a̱ha̱tta he keyu hoke; amba ʋno yokʋto chi anukchieto la chi̱ hoke.