Atʋloa 52 - Chahta Holisso Holitopa 1886

Etom hʋttak Toek ʋt ona cha, Sal a̱ im ʋnolit, “Lewi ʋt Ahimelek i̱ chukka ya̱ ona kʋmo,” im achi hatuk o̱, tʋloa pehlichi ʋt atʋloa chi̱ ho̱, nan ithʋnanchi atʋloa Lewi ʋt ikbi tok.

¹ Hʋttak kʋllo ʋt nantihmi ho̱ nan ik achukmo ka̱ isht ish ilawʋtah choh? Chitokaka nan isht i̱ hullo ʋt abillia yoke.

² Nan okpʋni ish anukfilli kak o̱ chi sunlʋsh ʋt miha kʋt, nutakhish ishit sha̱fa shuahchi yak o̱ chohmit na̱ haksichi ya̱ yʋmi̱hi̱chi hoke.

³ Nan ik achukmo ak o̱ nan achukma ka̱ i̱ shʋlihchit, hulabi ak o̱ nan ai ʋlhpiesa ʋnumpuli ka̱ i̱ shʋlihchit ish ahninchishke. [Yukopa.

⁴ Ʋnnumpah nan isht okpʋni moma kak o̱ ish ahninchi hoke, isunlʋsh na̱ haksichi ma.

⁵ Chitokaka yak kia aiokpʋninchit chi kanchit abillia hak inlashke; hʋlat ʋlhtipo ya̱ chi kohchi cha, yakni ai okcha̱ya ya̱ a kohchit ti̱ffit chi kanchashke. [Yukopa.

⁶ Mikma̱ ai ʋlhpiesa ʋhleha hʋt pesa cha nukshompakmʋt, i̱ yukpashke.

⁷ Hʋttak ʋt Chitokaka yak o̱ ilap i̱ hulihta kʋllo ikba he keyu hosh, amba nan immi la̱wa kak o̱ anukchieto kʋt ilap nan ik ai ʋlhpieso yak o̱ a kʋlloh bʋnna ka̱ hu pesáh.

⁸ Amba ʋno yak okʋto alif iti hishi okcha̱ki yo̱ chohmi li hosh, Chitokaka im ʋboha hikkia li hoke; Chitokaka im isht i̱ hullo ak o̱ anukchieto li̱ billiʋt billiʋshke.

⁹ Ish yʋmihchi tuk oka̱, chi ayokpa̱ha̱chi li̱ billia chi̱ hoke; micha chi hohchifo hʋt achukma hoka̱, chi̱ hulittopa ʋhlehah itikba ya̱ anukchieto la chi̱ hoke.