Atʋloa 51 - Chahta Holisso Holitopa 1886

Balhsheba ya̱ iba chukkoa hayatuk o̱, hupayi Nehlan ʋt ont pisa tuk o̱, tʋloa pehlichi ʋt a tʋloa chi̱ ho, atʋloa Lewi ʋt ikbi tok.

¹ Chitokaka ma, nan isht ish i̱ hullo pulla hatuk mak osh is sa̱ nukha̱klashke; nan isht ish i̱ nukha̱klo chi̱ la̱wah pulla hatuk mak osh nan ʋlhpisa kubʋffi lih putta ka̱ is sa̱ kʋshuffashke.

² Na̱ sʋ yoshuba ya̱ is si achefah fehna cha, nan ʋsshʋche li ya̱ is si a kʋshuffashke.

³ Nan ʋlhpisa kubʋffi lih putta kʋt ʋno ʋt ʋm ai a̱hli kʋt ithana lih fehna hoke; yohmikma̱ nan ʋsshʋche li yʋt sʋ tikba tʋkkali na billia hoke.

⁴ Chishno, chishno ak illa ho̱ chim ʋsshachi lish, chi nishkin itikba ya̱ nan ik achukmo ya̱ yʋmihchi le tuk oke; yohmi hoka̱ ish ʋnumpulikmʋt, chim ai ʋlhpiesah, micha nan ish ʋpesakmʋt, ʋnnumpah chi̱ kʋshofa hoke.

⁵ Yakeh, yushoba yosh ʋtta li tok, mikma̱ nan ʋsshʋche li yo̱ hʋshki ʋt sʋ shali tok oke.

⁶ Yakeh, chu̱kʋsh a̱ ai a̱hli ak o̱ ish ahni hatuk osh, ʋm anukfila ha̱ hupoyuksa yak o̱ is sʋthʋnanchi hokbano.

⁷ Hissʋp a̱ isht is sʋ kashuffi na, sʋ kashufashke; is si achefakma̱, tohbi kʋt okti pushi ya̱ i̱ shahli lashke.

⁸ Na̱ yokpah micha yukpah fehna ka̱ is sʋ haklochi na, ish litoli tuk foni putta kʋt yokpashke.

⁹ Nan ʋm ʋsshʋchi putta ka̱ chi nʋsshuka ish i̱ luhmashke, micha na̱ sʋ yoshuba moma ka̱ is sa̱ kʋshuffashke.

¹⁰ Chitokaka ma, chu̱kʋsh kʋshofa is sʋm ikbi cha, im anukfilah ʋpissali yo̱ himonʋchit is sʋ nukfohkashke.

¹¹ Chi tikba i̱ filʋmmichit chik sʋ kancho kashke; micha chimish Shilombish Hulittopa ya̱ chik sʋm esho kashke.

¹² Chim ai okcha̱ya isht a yokpa ya̱ is sa̱ fʋlʋmminchi cha, im anukfilah ayokpanchi yo̱ isht is sʋ hʋllʋllashke.

¹³ Yohmikma̱ nan ʋlhpisa kubʋffi ʋhleha ha̱ chim ata̱ya putta ka̱ im abʋche la chi̱ hoke; mikma̱ nan ʋsshʋchi ʋhleha hʋt fʋlamʋt chim ai ona chi̱ hoke.

¹⁴ Chitokaka, ʋm ai okcha̱ya Chitokaka ma, issish a̱ is sʋm a kʋshuffashke; sʋ sunlʋsh ʋt isht chim ai ʋlhpiesa ya̱ chitoli hosh ishit tʋloashke.

¹⁵ A̱ Shahlih ma, sʋttiʋlbi ya̱ ish wʋkʋmmashke; mikma̱ sʋtih hʋt chim ahulittopa ya̱ ʋno̱ho̱la chi̱ hoke.

¹⁶ Ʋbit isht ayokpʋchi ak okʋno ish ahnih keyushke; yʋmmak atuk okmʋno, chima la he tuk oke; hukmit isht ayokpʋchi yak oh kia isht ish a yokpah keyushke.

¹⁷ Chitokaka nan isht ayokpʋchi yak okʋto im anukfilah kubafa yak oke; chu̱kʋsh kubafʋt ilbʋssha yokʋno ish shittilema he keyu hoke, Chitokaka ma.

¹⁸ Ish i̱ kana kak osh Saion a̱ nan achukma ho̱ ish i̱ yʋmihchashke; Chelusalem ʋholihta ya̱ ish ikbashke.

¹⁹ Yʋmohmikmʋt ʋbit isht ayokpʋchi ai ʋlhpiesa, hukmit isht ayokpʋchi, micha mominchit hukmit isht ayokpʋchi yo̱ isht ish yokpa hi oke; yohmikma wak hobʋk a̱ chim alta o̱ kahpulit, oklah chim i̱hi̱ssa hi oke.