Atʋloa 50 - Chahta Holisso Holitopa 1886

Atʋloa Asaf ʋt ikbi tok.

¹ Nan oklu̱hah i̱ Shahli, Chitokaka Chihowa hʋt ʋnumpulit hʋshakucchaka ʋttʋt ia hosh ont ai okʋttula ont ʋlhi ka̱ yakni ya̱ ittʋnahlishke.

² Chitokaka yʋt ayukli a̱hli Saion a̱ et a tohwikelishke.

³ Pi̱ Chitokaka yʋt ʋlakmʋt, ik sʋmma̱to kashke; itikba ya̱ luak osh hukmit tahlih ma̱, ʋpakfoiyupa ka̱ mahlih chintoh fehnʋshke.

⁴ Im okla ha̱ nan im ʋpesa chi̱ kʋt, ʋba shutik micha yakni ya̱ ittʋnahli hoke.

⁵ “Nan ittim ʋpesa li ya̱ ʋbit isht ayokpʋchi yo̱ isht a̱hlichi tuk, a̱ hulittopa ʋhleha ha̱ hʋs sʋm ittʋnahlashke,” achishke.

⁶ Yohmi ka̱ Chitokaka yʋt ilap inli hosh nan ʋpesa ya he im ai ʋlhpiesa ka̱ ʋba yʋt ʋno̱ho̱lishke. [Yukopa.

⁷ Ʋm oklah ma, hʋsh ha̱klo na ʋnumpule lashke; Islael ma, mikma̱ chi ʋtukkolit ʋnoli lashke. Chitokaka, hʋchi̱ Chitokaka sia hoke.

⁸ Ʋbit isht is si ayokpʋchi pulla hatuk mak o̱ isht chim olʋbe lih keyushke; yohmi ka̱ na̱ hukmit isht ayokpʋchi yokʋto sʋ tikba a̱ha̱la na billiʋshke.

⁹ Chi̱ chukka ya̱ wak hobʋk, micha ʋlhpoa chipinta chim aiasha ya̱ issikusoma nakni ai ishe la he keyu hoke.

¹⁰ Na̱ poa puttah kowih anu̱ka aiyasha, micha nan ʋlhpoa nʋnih tʋhlepah sipokni ho̱ aiyasha kʋt momʋt ʋmmi hokʋt.

¹¹ Nʋnih puttah hushi aiyasha moma ka̱ ithana li hoke, micha na̱ poa yakni hayaka ai ittʋno̱ho̱wa kʋt sʋ tikba aiyasha hoke.

¹² Sʋ hohchʋfo hoh kia, chishno a̱ chim ʋnoli la he keyuh; yakni micha nanah isht ai ʋluttoa aiena kʋt ʋmmi hoka̱.

¹³ Wak nipi ya̱ ʋpa la hinlah choh? mikmʋt issikusoma issish a̱ ishko la hinlah choh?

¹⁴ Chitokaka yak o̱ yakoke ahnit isht ayokpʋchi ish im issashke; micha ʋnnumpah ish il ono̱ho̱cchi tuk ʋt Chaha i̱ Shahli ak o̱ ish im ʋtobbashke.

¹⁵ Micha nan a pʋllʋmmi nittak a̱ is sa̱ pa̱yashke; a chi kucchi likma̱, is sʋ holittobla hi oke.

^16-17 Amba hʋttak ik ʋlhpeso yʋno Chitokaka yʋt im achi kʋt, “Chishno yokʋto nan ʋlbʋchi ya̱ ish shittilema cha, ʋm ʋnnumpa ha̱ chim a̱shaka pit ish kanchi hokak osh, nantah isht chi ʋhʋllaya hosh a̱ nan ʋlhpisa ya̱ ish ʋnoli cha, nan ittim ʋpesa li ya̱ chitih ish foiyukkih choh?

¹⁸ “Hu̱kopa ish pisa hokmʋt, ish ibaiachʋffa kʋt chim achukmah, mikmʋt itti̱ luma̱ka putta ka̱ ish ibaiachʋffah chatuk.

¹⁹ “Micha chitih ha̱ nan ik achukmo ak o̱ ish im issa hatuk o̱, chi sunlʋsh ʋt na̱ haksichi ya̱ ʋpesa hoke.

²⁰ “Binilit chittibapishi ha̱ i̱ sʋnalit ish ʋnumpulikmʋt, chishki fiehna ushi ya̱ nan ish mihachi hoke.

²¹ “Ilʋppa̱ putta ka̱ ish yʋmihchih kia, nan ak achoh ma̱, chishno ak inlih chiyuhmi li ka̱ chim ʋhoba tuk oke. Nan isht chim olʋbe likmʋt, nana ka̱ chi nishkin itikba tʋkaliche la chi̱ hoke.

²² “Intah! ilʋppa̱ anukfillit hʋsh pisashke, Chitokaka im ʋhaksi ʋhlehah ma; keyukma̱ hlʋkuffichi ʋt iksho ho̱ hʋchi niblit tahli lin náh.

²³ “Kʋna hosh yakoke aiyahnit si ayokpʋchikmʋt, sʋ holittobli hoke; micha im ata̱ya ya̱ ʋpissʋlechikma̱, Chitokaka im ai okcha̱ya ya̱ pisachi la chi̱ hoke,” achishke.