Atʋloa 5 - Chahta Holisso Holitopa 1886

Uskulah puttah ai ulachit a tʋloa yo̱ tʋloa pehlichi a̱ Lewi ʋt im ikbi tok atʋloa yoke.

¹ Nan a̱ha̱chi li ka̱ ish hʋponaklashke, Chihowa ma; nan anukfi̱hi̱lli li ka̱ is sʋm akostininchashke.

² Pa̱ha̱ya li ka̱ ish haiyaklashke, a̱ Mi̱ko micha a̱ Chitokaka ma; chishno ak o̱ chim ilbʋsshʋt ʋnumpo̱ho̱li li hoka̱.

³ Chihowa ma, onnahinlikma̱ ʋm ʋnnumpa ha̱ ish ha̱ha̱kla chi̱ hoke; onnahinlikma̱ pit chi̱ bohli lish, ho̱ho̱yo la chi̱ hoke.

⁴ Nan okpulo im ai achukma Chitokaka chiah keyu hatuk o̱, nan ik achukmo ʋt chi takla a̱ha̱tta he keyu hoke.

⁵ Ilefehnʋchi ʋhleha hʋt chi tikba hiela he keyushke: nan ai ʋlhpesa keyu yʋmihchi moma ka̱ ish i̱ nukkilli hoke.

⁶ Ʋnnumpah hulabi ʋnumpuli ʋhleha ha̱ isht ish kanchi yoke: issish hlʋtʋbli micha na̱ haksichi hʋttak a̱ Chihowa hʋt ik ayokpacho yoke.

⁷ Amba ʋno ʋto isht i̱ hullo chi̱ laiyawa pulla hatuk mak o̱ chim ʋboha ya̱ ona la chi̱ hoke; micha chi̱ nukshopa hosh chi̱ tempel hulittopa pila ha̱ pit hlippiʋt chi ayokpa̱ha̱chi la chi̱ hoke.

⁸ Chihowa ma, sʋlbʋsshali ʋhlehah pulla hatuk mak o̱ isht chim ai ʋlhpiesa ya̱ isht is sʋ hʋllʋllashke: chi̱ hina ya̱ sʋ tikba is sʋm ai ittilawwichashke.

⁹ Itih ha̱ nan ai a̱hli kʋt iksho hoka̱: chu̱kʋsh ʋt nan okpulo yoke; i̱ nʋlʋpi ʋt ahulluppi tiwa yoke; isunlʋsh a̱ hʋlʋsbichi hoke.

¹⁰ Ʋnnumpah ish onucchashke, Chitokaka ma; ilap im ʋnnumpa hak inli kak o̱ isht akkʋkohashke; nan ʋsshʋchi i̱ lawa kak o̱ ish kanchashke; chi̱ filʋmmit chi̱ sʋnali hoka̱.

¹¹ Amba chi ai ʋtukko putta kʋt na̱ yokpashke; na̱ yokpa hosh tʋlo̱ho̱wa na billiashke: mikma̱ ish ʋpihpoa̱ha̱chi na, chi hohchifo ha̱ hulittobli ʋhleha hʋt momʋt isht chi ʋlawʋtashke.

¹² Chishno ak osh ai ʋlhpiesa ya̱ ish yokpali yoka̱, Chihowa ma; nan isht i̱ kana ya̱ telihpa chomihchi hosh isht ish ʋpakfoiyubla chi̱ hoke.