Atʋloa 49 - Chahta Holisso Holitopa 1886

Tʋloa pehlichi ʋt a tʋloa chi̱ ho̱, atʋloa Kolah ushi ʋhleha hʋt ikbi tok.

¹ Ilʋppa̱ hʋsh haklashke, oklah puttah ma; hʋsh hʋponaklashke, yakni aiyashah moiyumah,

² Hʋttak huletumpa keyu, hʋttak huletumpa, nan i̱ lawa, micha nan ik im iksho ai ittʋpeha ma.

³ Sʋtih hʋt na̱ hupoyuksa ho̱ ʋnumpula chi̱ hoke, micha sʋ chu̱kʋsh nan anukfi̱hi̱lli kʋt nan ʋkostininchi ya chi̱ hoke.

⁴ Nan isht ʋlhpisa ya̱ sʋ haksubish pit wieli la chi̱ hoke; ʋm ʋnnumpah luma ya̱ hap o̱ ishit tiwwiche la chi̱ hoke.

⁵ Nan ik achukmo nittakma̱, sʋ silhhi ʋhlehah isht okpʋni yʋt si ʋpakfulluplikma̱, nantihmi ho̱ sʋ nukshopa hinlah choh?

⁶ Nan i̱ lawa oklah anukchieto, micha im i̱la̱yak lawa kak o̱ oklah isht ilefehnʋchih kia,

⁷ Kʋna hoh mák osh chumpʋt itti hlakufficha himmah keyu hoke; Chitokaka ya̱ ʋlhtoba im onʋcha he keyu hoke.

^8-9 Yohmi ka̱ im ilhfiopak ʋlhtoba yʋt hulittopa hoke; yohmi ka̱ okcha̱yah im abillia cha, ahulloppi ya̱ ik peso ka he nittak ʋto ant a̱ya tok osh ai ʋlhih abillia hoke.

¹⁰ Pisa chi̱h bieka hoke; hupoyuksa ʋhleha hʋt illi hoke; ik hupoyukso micha im anukfilah iksho ittʋpi̱hʋt aiokpuloka cha, nan immi atuk a̱ inla im ʋshachi hoke.

¹¹ Im anukfila kʋt, i̱ chukka putta kʋt tʋllaya na billia chi̱h, micha aiasha yʋt isht ai unchululi putta ka̱ onʋt ma̱ha̱ya chi̱h, aiyahni hosh, i̱ yakni putta ka̱ ilap hohchifo ha̱ ʋhochifochi hoke.

¹² Yohmih kia hʋttak ʋt hulittopah pulla kak osh a̱ha̱tta he keyu hoke; nan ʋlhpoa yosh illit okpo̱ho̱loh chatuk ak o̱ chiyuhmi hoke.

¹³ I̱ hina ilʋppak o̱ yimmi hosh ma̱ha̱yʋt ishit haksi hoke; yohmih kia iakkaya ʋhleha hʋt im ʋnnumpah putta ka̱ ayokpanchi hoke. [Yukopa.

¹⁴ Nan ʋlhpoa chipinta yo̱ chomihchit aiillika ya̱ pit yulhi na, nan illi hak osh pehliecha chi̱ hoke; onnahinlikma̱ ai ʋpissali ʋhleha hʋt im aiyah pulla chi̱ hoka̱: mikma̱ haknip a̱ aiillika yosh lushummit tahli na, ai a̱ha̱tta yʋt ik im iksho ka chi̱ hoke.

¹⁵ Amba Chitokaka yak osh ʋmish shilombish a̱ aiillika ibbak a̱ a kohchit hlʋkuffichih pulla chi̱ hoke; ant sʋsht ia chi̱ hokʋt. [Yukopa.

¹⁶ Hʋttak ʋt nan i̱ lawʋt ishit ma̱ha̱yakma̱, i̱ chukka isht a hulittopa yʋt i̱ shahlit isht iah kia, chik i̱ nukshopo kashke.

¹⁷ Illikmʋt, nanah kia isht ia he keyu kʋmmohmi hoka̱: isht im a hulittopa yʋt iaka̱yʋt ia he keyu hoke.

¹⁸ Okcha̱yʋt a̱ha̱ttah ta̱kla kʋt, imish shilombish a̱ yokpalikma̱, nanah achukma ish ile yʋmi̱hi̱chi ka̱ hʋttak ʋt chim ayokpanchi tuk kia,

¹⁹ I̱ki ʋhlehah okla hʋt tohwikeli ha̱ ik peso kʋmmohmi ho̱ billia chi̱ ka̱ iakkayʋt ia chi̱ hoke.

²⁰ Hʋttak ʋt hulittopa hosh a̱ha̱ttah kia ik akostinincho kʋt nan ʋlhpoa yosh illit kʋnniah chatuk ak o̱ chiyuhmi hoke.