Atʋloa 48 - Chahta Holisso Holitopa 1886

Hulittoblichit atʋloa Kolah ushi ʋhleha hʋt ikbi tok.

¹ Chihowa hʋt chinto hoke; micha pi̱ Chitokaka i̱ tʋmahah chito, i̱ nʋnih hulittopa ya̱ a hulittopah fehna he ʋlhpesa hoke.

² Saion nʋnih hʋt, mi̱ko chito i̱ tʋmahah chito yʋt achahaka ayukli yosh, yakni momah, fʋlʋmmih pilla hoh kia nan isht a yokpa yoke.

³ Ʋboha hulittopa a tʋloha ka̱ Chitokaka yʋt a̱ha̱tta kʋt ahlʋkuffi chaha yosh ottʋni hoke.

⁴ Yakeh, mi̱ko ʋhleha hʋt ittʋfama tuk osh ittʋpi̱hʋt tʋmoa tuk oka̱.

⁵ Yʋmmʋt pisah mak inli hosh, oklah nukhlʋkancha tuk; kumuntʋt yihlepa tuk oke.

⁶ Wʋnni̱hi̱chi yosh, nukhʋma kʋt ʋlla esha chi̱ kak o̱ chiyuhmi hosh, yʋmma̱ ai onuttula tuk oke.

⁷ Mahlih hʋshakuchaka minti ho̱ Tashish i̱ peni huchito ya̱ isht ittiteʋblit ish kanchi hoke.

⁸ Nan u̱ha i̱ Chihowa i̱ tʋmahah chito ya̱, pi̱ Chitokaka i̱ tʋmahah chito ya̱ nanah e ha̱ha̱kloh chatuk mak osh il a pi̱hi̱sʋshke; Chitokaka yʋt kʋllochit tʋllali na a billia chi̱ hoke. [Yukopa.

⁹ Chitokaka ma, nan isht ish i̱ hullo yʋt chi̱ tempel anu̱kaka ittoiyula ka̱ il anukfi̱hi̱llishke.

¹⁰ Chitokaka ma, chi hohchifo hak inli ho̱ chiyuhmit, chi hulittoblichi kʋt yakni ont ʋlhi putta ka̱ onʋshke; chim ishtimpakimma yʋt ai ʋlhpiesa yosh ʋlota hoke.

¹¹ Nan ish ai ʋpehi̱sa pulla kak o̱ Saion nʋnih hʋt na̱ yokpashke, Chutah ushetik putta kʋt yokpashke.

¹² Saion a̱ ʋhekiki̱yʋt hʋsh ʋpakfohlichashke; im ʋboha kʋllo chaha putta ka̱ hʋsh hutihnashke.

¹³ Isht ai unchululi minti ka̱ hʋsh im ʋnola hi ʋt, i̱ hulihta kʋllo ya̱ anukfillit hʋsh pisashke, im ʋboha huletupa putta ka̱ ʋfanalichit hʋsh pisashke.

¹⁴ Ilʋppak osh Chitokaka yosh pi̱ Chitokaka billiʋt billia yoke; yʋmmak osh pi pehliechit nan illi ha̱ ishit pi ona hi oke.