Atʋloa 46 - Chahta Holisso Holitopa 1886

Ohoyoh himithoa yosh tʋloa chi̱ ho̱, hulittoblichi Kolah ushi ʋhleha hʋt tʋloa pehlichi ya̱ im ikbi tok.

¹ Chitokaka yak osh il ai ʋtukko, micha pi̱ hulihta kʋllo yoke; ai ilbʋssha putta ka̱ ʋpelʋchi yosh oktʋnih fehna hoke.

² Yʋmohmi hoka̱ yakni ʋt ik ai inla hoh mák o̱, micha nʋnih chaha putta kʋt fayoka̱ha̱chit okhʋtah iklʋnna pit ik okakaha hoh mák o̱, pi nukshopa he keyu hoke.

³ Oka yʋt fopʋt ik pukpukí, oka bʋnʋtba̱ya ka̱ nʋnih chaha putta kʋt ik oka wʋnni̱hi̱chí; [Yukopa.

⁴ Okhina yʋt bʋcchayʋshke; yʋmma̱ ayʋnʋlli putta ka̱ oka yʋt a yʋnʋlli hosh Chaha i̱ Shahli ʋt ai a̱ha̱tta hulittopa, Chitokaka i̱ tʋmahah chito ya̱ yokpali hoke.

⁵ Chitokaka yʋt im aiiklʋna ya̱ a̱ha̱tta kak o̱, yʋmmʋt kʋnʋlla he keyu hoke; onnʋt mintikma̱, Chitokaka yʋt ʋpelʋchih pulla chi̱ hoke.

⁶ Oklushi putta kʋt fo̱ho̱pʋshke; apehlichika putta kʋt ittʋfetihkʋchishke; Chihowa hʋt ʋnumpulih ma̱, yakni ʋt bilʋshke.

⁷ Nan u̱ha i̱ Chihowa yosh pibafoiyukka hoke; Chekob i̱ Chitokaka yak osh pim ahlʋkuffi chaha yoke. [Yukopa.

⁸ Intah! Chihowa hʋt nan ʋtahli tuk a̱ hu pesáh; yʋmmak osh aiokpulokʋt taha ka̱ yakni ya̱ ai ono̱ho̱cchi hoke.

⁹ Yohmi kʋt yakni ont ai ʋlhi ka̱ tʋnʋp putta ka̱ yukobli̱hi̱chi kʋt, iti tʋnampo ya̱ kubʋffikmʋt, tʋli hʋluppa ya̱ chant hukuffi hoke; tʋnʋp itichʋnʋlli putta ka̱ luak ishit hukmi hoke.

¹⁰ Hʋsh issa cha, ʋno ʋt Chitokaka sia hatuk a̱ hʋsh ithaiyanashke; oklushi puttah im ai itti̱takla ka̱ sʋ holittopa chi̱ hoke; yakni ya̱ a sʋ holittopa chi̱ hoke.

¹¹ Nan u̱ha i̱ Chihowa yosh pibafoiyukka hoke; Chekob i̱ Chitokaka yak osh pim ahlʋkuffi chaha yoke. [Yukopa.