Atʋloa 44 - Chahta Holisso Holitopa 1886

Tʋloa pehlichi ʋt a tʋloa chi̱ ho̱, nan ithʋnanchi atʋloa Kolah ushi ʋhleha hʋt ikbi tok.

¹ Chitokaka ma, i̱ nittak, nittak cha̱shpo ka̱, na̱ toksʋli ish toksa̱ha̱li tok a̱ pi̱ki ʋhleha hʋt ʋnoli na, pi haksubish a̱ isht e hakloh chatuk oke.

² Chishno ak osh oklushi putta ka̱ chibbak isht olʋbit ish im eshi cha, pi̱ki ʋhleha ha̱ ish ai o̱ binohlichi tok oke; oklah putta ka̱ ish musholichih kia, yʋmmak okʋno ish ai o̱ pʋttali tok oke.

³ Yakni ya̱ ilap i̱ bʋshpo fʋlaya yak o̱ isht ʋsittʋbit ishi tok keyu hoka̱, micha ilap shakba yak inli hosh im aiyʋchi tok keyu hoke; amba chibbak ishtimpakimma, chish shakba, micha chi nʋsshuka tohwikeli aiena kak ʋttok oke; ish i̱ kana hʋttok okʋt.

⁴ Chitokaka ma, chishno ak osh a̱ mi̱ko chia hoke; Chekob ahlʋkuffi putta ka̱ ish ʋpesashke.

⁵ Chishno pulla kak o̱ pi̱ tʋnampi ʋhleha ha̱ toblit il akkakohlicha chi̱ hoke; chi hohchifoh pulla kak o̱ pi̱ sʋnalit wʋkaya ʋhleha ha̱ il ʋhʋlhicha chi̱ hoke.

⁶ Yohmi ka̱ ʋm iti tʋnampo ya̱ anukcheto la he keyuh, micha a̱ bʋshpo fʋlaya mʋt sʋ hlakufficha he keyu hoka̱.

⁷ Pi̱ tʋnampi ʋhleha ha̱ im ai ishit ish pi hlakuffechi cha, pi̱ nukkilli ʋhleha ha̱ ish hufahyalih chatuk oka̱.

⁸ Chitokaka yak o̱ nittak moma ka̱ isht il ilawʋta yoke; micha chi hohchifo hak o̱ il ayokpa̱ha̱chi na billia chi̱ hoke. [Yukopa.

⁹ Yohmi tuk kia kanchit ish pi hofahyali hak inlishke, micha pi̱ tʋshka chipota ʋhleha ha̱ awant kohchʋt ish ia he keyushke.

¹⁰ Pi̱ tʋnampi itikba ya̱ i̱ filʋmmichit ish pi tehli̱hi̱li hoke; mikma̱ pi̱ nukkilli ʋhleha hʋt pi wehpulih chatuk oke.

¹¹ Nan ʋpa chukfʋlhpoa yak o̱ ittillawwechit ish pikbi hoke, micha oklushi puttah im ai itti̱takla ish pi fimmishke.

¹² Chim okla ha̱ ish kanchi kʋt, nan isht chik ʋhayocho hoke, micha yʋmma̱ isht ʋlhtoba yatuk a̱ nan isht chi̱ lawah keyushke.

¹³ Oklushi pi̱ bili̱ka aiyasha ya̱ i̱ nan isht ik ai ʋhobalo pikbit, pi ʋfullubli kʋt kʋlakshichit ai i̱ yukpa, micha isht a yopula ish pikbi hoke.

¹⁴ Oklushi putta kʋt nan isht ittʋpesa, micha oklah putta kʋt nushkoboh o̱ fahli ish pikbi hoke.

^15-16 Ik ʋhobalot ʋnumpuli micha hufahyalit ʋnumpuli, tʋnʋp micha ilaiukhah bʋnna aiena kak atuk mak o̱, nittak moma ka̱ nan ishit sʋ hofahya yʋt sʋ tikba tʋkkali hoke, micha hufahya yosh sʋ nʋsshuka ya̱ ompoholmo hoke.

¹⁷ Ilʋppa̱ moma kʋt pi onuttula tuk oke; yohmih kia chishno ya̱ ik pim ʋhakso ke tuk oke, micha chi̱ nan ittim ʋlhpisa ya̱ kil im ai a̱hlo tuk keyushke.

¹⁸ Pi chu̱kʋsh ʋt fʋlama tuk keyuh, micha il a no̱ho̱wa yʋt chi̱ hina ya̱ i̱ filʋmmi tuk keyushke.

¹⁹ Yohmi kʋt na̱ poa okpulo ai asha ya̱ ish pi aiokpʋninchi cha, ai illi aiokhlileka isht ish pi ompohomo hokak o̱, pi yʋmohmishke.

²⁰ Pi̱ Chitokaka hohchifo ha̱ pim ʋhaksi cha, chitokaka inla ho̱ pibbak isht il im ʋshatʋpa hatuk okma̱,

²¹ Ilʋppa̱ Chitokaka yʋt silhhit ʋhayucha hinlah keyuh choh? yʋmmak osh chu̱kʋsh ai ʋloma̱ka putta ka̱ ithana yokʋt.

²² Yʋmmak het a̱sha na, chishno pulla kak o̱ nittak moma ka̱ pi̱hi̱llishke; chukfʋlhpoa yosh illa chi̱ kak o̱ il ittʋlhpisa hoke.

²³ Ish okchashke; nantihmi ho̱ chi nosih choh, a̱ Shahlih ma? ish il okchʋlashke; pi kanchit chik billiyo kashke.

²⁴ Nantihmi ho̱ chi nʋsshuka ya̱ luhmit, pilbʋssha ka̱, micha pi̱ pʋllʋmmechi ka̱ chim ʋhaksih choh?

²⁵ Pimish shilombish ʋt ʋkahchunnolit hittuk chubi ya̱ ona hoka̱: pikfuka yʋt yakni ya̱ ʋkʋlloshke.

²⁶ Ish wʋkaya cha, pi ʋpela chia hashke, micha nan isht ish i̱ hullo pulla hatuk mak osh ish pi hlakuffichashke.