Atʋloa 42 - Chahta Holisso Holitopa 1886

Tʋloa pehlichi ʋt a tʋloa chi̱ ho̱, nan ithʋnanchi atʋloa Kolah ushi ʋhleha hʋt ikbi tok.

¹ Issi yosh oka yʋnʋlli yo̱ bʋnnah fehna kak o̱ chohmit, ʋmish shilombish ʋt chi hoyoh fehna hoke, Chitokaka ma.

² Ʋmish shilombish ʋt itukshi̱hi̱lʋt Chitokaka, Chitokaka okcha̱ya ya̱ ho̱ho̱yoshke; kʋtiohmikmak o̱ Chitokaka im itikba ile hayakʋchit ona la hinlah choh?

³ Nittak moma ka̱, “Chi̱ Chitokaka mʋto?” a̱ha̱chih ma̱, nittak micha ninak aiena ka̱ sʋ nishkin okchi ʋt ʋm ilhpak atuk oke.

⁴ Oklah chito iba no̱ho̱wa likmʋt, na̱ yokpʋt ayokpa̱ha̱chit chitolit tʋlo̱ho̱wa hosh oklah chito kʋt nittak hulittopa hulittobli̱hi̱chi ka̱ pehlichit Chitokaka im ʋboha ona lih beka tok ʋt, ilʋppa̱ putta ka̱ ithaiyana likmʋt, sʋ chu̱kʋsh ʋt ʋluttoʋshke.

⁵ Ʋmish shilombish ma, nantihmi ho̱ iellit chi akkama cha, ish hi̱hi̱hah choh? Chitokaka yak o̱ ish anukchietashke; yʋmma̱ nʋsshuka yʋt si okchalinchi yatuk o̱ himakma̱ ayokpa̱ha̱chi la chi̱ hoka̱.

⁶ A̱ Chitokaka ma, ʋmish shilombish si anukfoiyukka kʋt iellit akkʋmʋshke. Yʋmohmi hokʋt Chatʋn yakni, micha Hʋmon nʋnih foka, nʋnih Misa ya̱ ʋttʋt pit chithaiyana lishke.

⁷ Chim oka chopa putta kʋt kifiha̱ha̱chih ma̱, oka chito ʋt oka chito ya̱ itti̱ pa̱ha̱yʋshke; chim oka bʋnʋtha okʋlhi o̱ fohokʋchi moma kʋt si ʋbanʋblishke.

⁸ Nittak okma̱ Chihowa hʋt im isht i̱ hullo ya̱ isht ʋm ʋpehi̱sah beka tok oke; mikma̱ ninak okma̱ Chitokaka ʋm ai okcha̱ya ya̱ im ʋlhtʋloak, ʋnnumpah ilbʋssha isht ayokpa̱ha̱chi lih beka tok oke.

⁹ Chitokaka a̱ tʋli chito ya̱, “Nantah kʋtiohmi ho̱ is sʋm ihaksih choh? Nantihmi ho̱ a̱ tʋnʋp ʋt sʋlbʋsshali na tʋbashit hikiki̱ya lih choh?”

¹⁰ “Sʋf foni putta ka̱ bushullichit kanchi chiyuhmit, a̱ tʋnampi ʋhleha hʋt nittak moma ka̱ na̱ sʋ mehʋchi kʋt, Chi̱ Chitokaka mʋto? ʋm a̱ha̱chishke,” im achi lashke.

¹¹ Ʋmish shilombish ma, nantihmi ho̱ iellit chi akkʋmah choh? micha nantihmi ho̱ ish hi̱hi̱hah choh? Chitokaka yak o̱ ish anukchietashke; sʋ nʋsshuka ʋpelʋchi micha a̱ Chitokaka ya̱ himakma̱ ayokpa̱ha̱chi la chi̱ hoka̱.