Atʋloa 4 - Chahta Holisso Holitopa 1886

Tʋloa pehlichi ʋt ʋhlepah isht a tʋloa chi̱ ho̱, atʋloa Lewi ʋt ikbi tok.

¹ Chi̱ pa̱ya li ka̱ is sa̱ hʋponaklashke, a̱ Chitokaka ai ʋlhpiesa ma; nan ʋm a pʋllʋmmikma̱, is si ʋpelʋchih chatuk okʋt: is sa̱ nukha̱klo cha, ʋm ʋnnumpah ilbʋssha ya̱ ish haklashke.

² Hʋttak ushi ʋhlehah ma, hupakih kʋtiohmih fokka ho̱ ʋm ahulittopa yʋt ahufahya to̱ho̱ba chi̱ ka̱, nana ho̱ keyu ka̱ im ai achukmʋt nan ik a̱hlo ya̱ hʋsh hoya chi̱h choh? [Yukopa.

³ Yohmih kia Chihowa hʋt‐i̱ hulittopa ya̱ isht ilai ʋtokuli tuk a̱ hʋsh ithaiyanashke: i̱ pa̱ya likma̱, Chihowa hʋt hakla chi̱ hoke.

⁴ Nuksho̱ho̱pʋt hʋchik ʋsshacho kashke: hʋchi̱ tupa ha̱ onuttoiyulʋt hʋchi chu̱kʋsh a̱ hʋsh ittim ʋnumpo̱ho̱li cha, hʋsh chullosashke. [Yukopa.

⁵ Nan ai ʋlhpiesa nan im issa poiyutta ka̱ im issʋt, Chihowa ha̱ hʋsh anukchietashke.

⁶ Lawa kʋt, “Kʋta hosh nan achukma ka̱ pi pesʋcha hinlah choh?” a̱ha̱chishke: chi nʋsshuka tohwikeli ha̱ ish pi onucchashke, Chihowa ma.

⁷ Tanchi micha oka pa̱kki himona aiena kʋt i̱ lawakmʋt na̱ yokpah chatuk a̱ i̱ shʋlihchi hosh sʋ chu̱kʋsh a̱ is sʋ nukfohki tuk oke.

⁸ Nuktaiyalʋt tʋshki lih mak inli hosh sʋ nosa chi̱ hoke: Chihowa chia hak osh ʋno bieka hoh kia is si ʋpohtikecha chi̱ hoka̱.