Atʋloa 38 - Chahta Holisso Holitopa 1886

Isht a nukfohka chi̱ ho̱, atʋloa Lewi ʋt ikbi tok.

¹ Chihowa ma, chi nukhubela hosh chik sʋm ʋlamo kashke, micha chi nuklibesha hosh na̱ huttupa chik si onuccho kashke.

² Chim uskinʋki putta kʋt akket sʋ chukkoakma̱, chibbak ʋt ʋba mintit wekit si onuttoiyula hoka̱.

³ Chi nokuah pulla kak o̱ sʋn nipi a̱ ayuba̱ka kʋt ikshoshke; nan ʋsshʋche lih pulla kak o̱ sʋf foni ya̱ a nuktaiyala yʋt ikshoshke.

⁴ Nan a yusho̱ho̱ba li yʋt sʋ nushkubo ha̱ ʋbanʋbli hoka̱: na̱ shapoh weki chiyuhmi hosh, weki kʋt ʋm atʋpʋshke.

⁵ Ik sʋ hopoyukso kak o̱ a sʋ fama yʋt shuʋt yʋnʋllishke.

⁶ Tubunnoʋt ʋkahchunnolit kʋnnia lishke, nittak moma ka̱ tʋbashi ohmit a̱ya lishke.

⁷ Sʋkfiksa yʋt yʋnhah ʋluttoah ma̱, sʋn nipi ʋt ayuba̱ka kʋt iksho hoka̱.

⁸ Nipi illit sʋ letua kʋt atampʋshke; sʋ chu̱kʋsh ʋt hi̱ha kak o̱ kiffa̱ha̱ha li hoke.

⁹ A̱ Shahlih ma, nanah a sʋ bʋnna moma kʋt chi tikba tʋkkali hoke; mikma̱ hi̱hi̱ha li kʋt chi̱ lumah keyushke.

¹⁰ Sʋ chu̱kʋsh ʋt timi̱ka̱ha̱chishke; ʋmi lhampko hʋt a̱ kʋniʋshke; mikma̱ sʋ nishkin ak kia i̱ tohwikeli hʋt ik sʋm ikshoshke.

¹¹ Sʋ holittobli ʋhlehah, micha a̱ kana ʋhleha hʋt na̱ huttupa si onuttula ka̱ a̱ filʋmmit hielih, micha a̱ kʋnomih ʋhleha hʋt a̱ hupakichit hielishke.

¹² Mikma̱ ʋm ilhfiopak a̱ hoyo ʋhleha hʋt isht ʋlbi ya̱ a̱ tʋlalishke; micha a sʋttupa he hoyo ʋhleha hʋt nanah okpulo ho̱ ʋnumpo̱ho̱lishke; micha nittak moiyuma ka̱ na̱ haksichi anukfi̱hi̱lli hoke.

¹³ Mihma̱ ʋno ʋto ik hʋponaklo yo̱ chohmit haklo la he keyuh, micha ik ʋnumpolo yosh itih ik wʋkʋmmo kak o̱ chohmi lishke.

¹⁴ Micha hʋttak ik hʋponaklo yosh ʋnnumpah isht a sʋnali nanah kia itih ha̱ a foiyukkah keyu yak o̱ chohmi lishke.

¹⁵ Chi ho̱ho̱yo li hoka̱, chishno ak osh is sʋ haklashke, a̱ Shahli, a̱ Chitokaka ma.

¹⁶ “Ʋno yak atuk pulla kak o̱ oklah yokpʋn náh; a̱hlíh, saiyi ʋt shʋkkʋlʋllikma̱, a̱ sʋnalit oklah ile chitolin náh,” achi li hoka̱.

¹⁷ Sʋttula he fehnah ma̱, nan ishit sʋ nukha̱klo ʋt sʋ tikba tʋkkali na billia hoka̱.

¹⁸ Nan a yushoba li ya̱ ottʋninchi la chi̱ hoka̱: nan ʋm ʋsshʋchi pulla kak o̱ ʋm anukfila hʋt isht okpoiyula chi̱ hoke.

¹⁹ Amba a̱ tʋnʋp ʋhleha hʋto okchʋt kʋniʋt hlampkoshke; micha nanihmih keyu ho̱ a̱ nukkilli ʋhleha hʋt ʋpaknʋshke.

²⁰ Micha nanah achukma ka̱ nan ik achukmo kak o̱ isht ʋtobbi ʋhleha hʋt, achukma ka̱ iakkaya li kak o̱, oklah ʋm a sʋnali hoke.

²¹ Is sʋ kanchin náh, Chihowa ma; a̱ Chitokaka ma, is sa̱ mishema̱hchin náh.

²² Tu̱shpʋt ant is si ʋpelashke, a̱ Shahli, si okchalinchi ma.