Atʋloa 37 - Chahta Holisso Holitopa 1886

Atʋloa Lewi ʋt ikbi tok.

¹ Nan ik achukmo yʋmihchi ʋhleha hatuk mak o̱ chik ile nukhubelacho kashke; nan ik ʋlhpeso yʋmihchi ʋhleha ha̱ chik i̱ putʋnno kashke.

² Hʋsshuk a̱ chohmit chekosih ʋlmokmʋt, haiyu̱kpulo okcha̱ki chohmit bʋsshit taha chi̱ hoka̱.

³ Chihowa hak o̱ ish anukchieto cha, nanah achukma kak o̱ ish yʋmihchashke; yʋmohmi hosh yakni ya̱ ish ai a̱ha̱tta cha, nan isht im a̱hli ka̱ ish ai i̱hi̱mpashke.

⁴ Micha Chihowa hak o̱ isht ish ilai yokpashke, mikma̱ chi chu̱kʋsh nan asi̱hi̱lhha kak o̱ chima chi̱ hoke.

⁵ Ish ata̱ya ya̱ Chihowa ha̱ ish im issa cha, yʋmmak o̱ ish anukchietashke; mikma̱ yʋmmʋt ai a̱hlicha hi oke.

⁶ Micha nana kʋt a chimmih ʋlhpesa ka̱ tohwikeli chomihchit, nanah chimmi ha he ʋlhpesa ka̱ hʋshi tʋbokoli chomihchit hayakʋcha chi̱ hoke.

⁷ Chihowa ha̱ ish i̱ lumma cha, ik kʋniomihchí, ahnit ish a̱ha̱ttashke; hʋttak ʋt ata̱ya ya̱ im ai a̱hli cha, lumʋt nan anukfi̱hi̱lli tuk ʋt ai a̱hlichi kak o̱ chik ile nukhubelacho kashke.

⁸ Nukoa kʋt ish issa cha, nukhubela ya̱ ish i̱ filʋmmashke; nan ik achukmo kak illa ho̱ ish yʋmihcha hinla hokʋt, chik ile nukhubelacho kashke.

⁹ Nan ik achukmo yʋmihchi ʋhleha hʋt hukofa chi̱ hoka̱: amba Chihowa ha̱ ho̱ho̱yo ʋhleha hʋto yakni ya̱ isha hi oke.

¹⁰ Yohmi ka̱ chekosi itti̱ta̱kla ka̱ hʋttak ik ʋlhpeso ʋt ont aksha chi̱ hoke; mikma̱ ai a̱ha̱tta ya̱ anukfillit ish pi̱hi̱sa hoh kia, iksho ka chi̱ hoke.

¹¹ Amba chu̱kʋsh akka̱losi ʋhleha hʋto yakni ya̱ iesha hi oke; micha nanah isht im ai achukma i̱ la̱wa kak osh isht ila yokpa hi oke.

¹² Hʋttak ik ʋlhpeso ʋt ai ʋlhpiesa ya̱ im asʋnalit lumʋt nan anukfi̱hi̱lli cha, in nuti ya̱ isht o̱ killisli̱hi̱chi hoke.

¹³ Nan i̱ Shahli ʋt i̱ yukpa hoke; i̱ nittak ʋt ʋla chi̱ ka̱ pi̱sa hokʋt.

¹⁴ Ilbʋssha micha nan ik im iksho ya̱ akʋccha chi̱ kʋt, ai ʋpissalit a̱ya ʋhleha ha̱ ʋba chi̱ kʋt, hʋttak ik ʋlhpeso ʋhleha hʋt bʋshpo fʋlaya ya̱ shu̱ffikmʋt, im iti tʋnampo ya̱ bichulli tuk kia,

¹⁵ I̱ bʋshpo fʋlaya yʋt ilap chu̱kʋsh ak o̱ chukkoakma̱, im iti tʋnampo ʋt kubahla chi̱ hoke.

¹⁶ Ai ʋlhpiesa yʋt nan im a̱sha kʋt kʋnomosi hoh kia, achukma kʋt, hʋttak ik ʋlhpeso lawah imi̱ la̱yak chito ya̱ i̱ shahli hoke.

¹⁷ Hʋttak ik ʋlhpeso ʋhlehah shakba yokʋt kubahla hi oka̱: amba Chihowa hak osh ai ʋlhpiesa ʋhleha hokʋno hʋllʋlli hoke.

¹⁸ Chihowa hʋt ai a̱hli ʋhlehah i̱ nittak putta ka̱ ithaiyana hoke; micha nan immi hʋt a̱sha na billia hi oke.

¹⁹ Nittak ik achukmoh kia, hufahya he keyuh; micha a hohchʋfo nittak putta ka̱ fihopa hi oke.

²⁰ Amba hʋttak ik ʋlhpeso ʋhleha hʋto aiokpuloka he, mikma̱ Chihowa i̱ tʋnʋp putta kʋt oktak pisah ayukli yosh luʋt taha kʋt shubulli ho̱ tobʋt taha kak o̱ chiyuhma hi oke.

²¹ Hʋttak ik ʋlhpeso ʋt po̱ho̱ta tuk kia, atobba he keyu hoke, amba ai ʋlhpiesa yʋto i̱ nukhaklo cha, i̱hi̱ma hoke.

²² Chihowa hʋt yokpali tuk a̱ ʋhleha hokʋto yakni ya̱ iesha chi̱h, amba kʋlakshichi tuk a̱ ʋhleha hokʋto hukofa chi̱ hoka̱.

²³ Hʋttak a no̱ho̱wa ya̱ Chihowa hʋt im ʋpesa tuk mak osh, im ata̱ya ya̱ isht a yokpa hoke.

²⁴ Akkʋma hoh kia, ittulʋt ʋmmohma he keyu hoke; Chihowa hak osh ibbak a̱ hʋla̱lli hoka̱.

²⁵ Ʋlla sia hʋttok osh sʋ sepuknit taha hak inlishke; yohmih kia hʋttak ai ʋlhpiesa ya̱ kanchih ma̱, ʋnonti im ishtatiaka yʋt pʋska asi̱hi̱lhha ka̱ ak pesoshke.

²⁶ Nittak momah i̱ nukha̱klot i̱ po̱ho̱ta hoke; micha im ishtatiaka yʋt yokpalit na̱ yo̱ho̱kpa yoke.

²⁷ Nan ik achukmo ka̱ ish i̱ filʋmmi cha, nanah achukma kak o̱ ish yʋmihchashke, mikmʋt ish a̱ha̱tta na billiashke.

²⁸ Chihowa hʋt ai ʋlhpiesa yʋmihchi kak o̱ ahninchi yoka̱: micha i̱ hulittopa ʋhleha ha̱ kancha he keyu hoke; hʋllʋlli na billia yoke; amba hʋttak ik ʋlhpeso ʋhlehah im ishtatiaka yokʋto hukofʋt kʋnia hi oke.

²⁹ Ai ʋlhpiesa ʋhleha hʋt yakni ya̱ ieshi cha, ai aha̱shwa na billia hi oke.

³⁰ Ai ʋlhpiesa itih hʋt ʋnnumpah hopoyuksa yo̱ ʋnumpulikma̱, isunlʋsh ʋt ai ʋlhpiesa ʋnumpuli hoke.

³¹ I̱ Chitokaka i̱ nan ʋlhpisa yʋt chu̱kʋsh a̱ a foiyukka hatuk o̱ a no̱ho̱wa yʋt shʋnayoa he keyu hoke.

³² Hʋttak ik ʋlhpeso ʋt ai ʋlhpiesa ya̱ ʋpesa̱ha̱chi kʋt, ʋba he ahni hosh ho̱ho̱yo hoke.

³³ Chihowa hʋt issʋt ibbak fohka he keyuh; micha nan isht im a̱shakma, ʋnnumpah onuccha he keyu hoke.

³⁴ Chihowa ha̱ ho̱ho̱yot i̱ hina ya̱ foiyukkʋt ish ma̱ha̱yashke; mikma̱ chi wakayachi na, yakni ya̱ ish iesha chi̱ hoke; hʋttak ik ʋlhpeso ʋhleha ha̱ ishit kanchi ka̱ na̱ yokpʋt ish pisa hi oke.

³⁵ Hʋttak ik ʋlhpeso ʋt pʋllʋmmih fehnʋt, iti okcha̱ki yosh a hikia imoma chohmit ʋwatʋlit ile chitoli ho̱ pisa li tok.

³⁶ Atuk ak osh ant a̱yʋt kʋnia cha, yakeh, iksho ki tok; mihma̱ hoyo lih kia, ik hayako ki tok.

³⁷ Hʋttak ai a̱hli ya̱ ʋcchukmalit anukfillíh, micha ai ʋpissali ya̱ ish pisashke; itti̱ nanaiya hʋttak ʋt tikba nan achukma kʋt awet im a̱sha hoka̱.

³⁸ Amba nan ʋlhpisa kubʋffi ʋhleha hokʋto ittibaiokpulokʋt kʋnia hoke; hʋttak ik ʋlhpeso ʋhleha hʋt tikba nan achukma kʋt awet im a̱sha he tuk ʋt i̱ hukofa hoke.

³⁹ Amba ai ʋlhpiesa ai okcha̱ya yʋt Chihowa hak o̱ a minti hokeh; ai ilbʋssha nittakma̱ yʋmmak osh i̱ hulihta kʋllo yoke.

⁴⁰ Chihowa hʋt ʋpelʋt hlʋkuffichih chatuk okʋt: yʋmmak o̱ ai ʋtukko hatuk o̱, hʋttak ik ʋlhpeso ʋhleha ha̱ im ai ishit hlʋkuffechi cha, okchalincha hi oke.