Atʋloa 36 - Chahta Holisso Holitopa 1886

Tʋloa pehlichi ʋt a tʋloa chi̱ ho̱, Chihowa i̱ tishuh Lewi ʋt ikbi tok.

¹ Hʋttak ik ʋlhpeso ʋt nan ʋlhpisa kubʋffi kak osh sʋ chu̱kʋsh anu̱ka̱ka ya̱ ai ʋnumpuli kʋt, “Ilap nishkin itikba yʋno Chitokaka isht ai i̱ nukshopa hi ʋt ikshoshke,” achih.

² Ilap nishkin itikba ya̱ nan isht il a hupohlʋli kʋt nan ʋssha̱ha̱chih chatuk ʋt ottani na, nan isht im ʋlhpisa he keyuh, ahni kak okʋt.

³ Ilap itih im ʋnnumpa hʋt nan ik ʋlhpeso micha na̱ haksichi bano yoke; hupoyuksa, nanah achukma yʋmohma he tuk ʋt issa tuk oke.

⁴ I̱ tupah ittoiyulakmʋt, nan ik ʋlhpeso ak o̱ anukfi̱hi̱lli hoke; hina achukmah keyu kak o̱ ile hillechi hoke, nan ik achukmo ka̱ shittilemah keyu hoke.

⁵ Chihowa ma, nan isht ish i̱ hullo ʋt ʋba ya̱ ona hoke, micha nan isht ish ai a̱hlichi ʋt shutik a̱ ona hoke.

⁶ Chim ai ʋlhpiesa yʋt Chitokaka i̱ nʋnih huchito putta ka̱ chohmishke; nan ish ai ʋpehi̱sa yʋt okhʋtah chito ohmi hoke; hʋttak micha nan ʋlhpoa aiena ka̱ ish okchalinchi hoke, Chihowa ma.

⁷ Nan isht ish i̱ hullo ʋt hulittopah fehnʋshke, Chitokaka ma; yʋmohmi kak o̱ hʋttak putta kʋt chimis sʋnahchi nutaka yak o̱ ai ʋtukko hoke.

⁸ Chim ʋboha nanah achukma aiyasha ka̱ ai ishkot fihopa hoke, nan isht ish yokpa̱ha̱li okhina ya̱ ish ishkochechi hoke.

⁹ Ai okcha̱ya a minti ʋt chishno yak oka̱: chim atohwikeli ak o̱ tohwikeli e pisa hoke.

¹⁰ Chithaiyana ʋhleha ha̱ ish i̱ hulloh chatuk ʋt, micha chu̱kʋsh ai ʋpissali ʋhleha ha̱ isht ish im ai ʋlhpiesah chatuk ʋt ish immomashke.

¹¹ Ilefehnʋchi iyi yʋt ik sʋm alo kashke; mikma̱ hʋttak ik ʋlhpeso ʋhlehah ibbak ʋt kʋnimma pit ik sʋ chʋffecho kashke.

¹² Yakeh, nan ik ʋlhpeso yʋmihchi ʋhleha hʋt akkakohʋshke; tobli na akkakohah mʋt, wʋkaya he keyushke.