Atʋloa 33 - Chahta Holisso Holitopa 1886

¹ Ai ʋlhpiesa ʋhlehah ma, Chihowa ha̱ yokpa hosh hʋsh i̱ tʋloashke; ai ʋpissali ʋhleha hokʋto hulittoblichi kak osh isht im ʋlhpesa hoka̱.

² Hap o̱ Chihowa ha̱ yakoke isht hʋsh im a̱ha̱chashke; ai olachi ishit tʋllakchi pukkoli yo̱ olachit hʋsh ayokpʋchashke.

³ Atʋloa himona yo̱ isht hʋsh i̱ tʋloashke; im punnʋt chitoli hosh hʋsh olachashke.

⁴ Chihowa im ʋnnumpa hʋt ʋpissalih, micha nanah yʋmihchi moma kʋt ai a̱hlih bano ho̱ ʋtahli hoka̱.

⁵ Ai ʋlhpiesa micha ʋtukkoah nan im ʋpesa yak o̱ im ai achukma yoke; Chihowa im isht i̱ hullo yʋt yakni ya̱ ʋluttoa hoke.

⁶ Chihowa im ʋnnumpa ho̱ ʋba yʋt tubah ma̱, itih fiopa ho̱ nanah puttah momah ai asha kʋt tuba tok.

⁷ Okhʋtah oka ya̱ ittʋnahahchi omihchit ittʋhobbit, oka hufobi putta ka̱ ʋlhpoyak aiasha yo̱ chomihchit ʋshachi yoke.

⁸ Yakni moma kʋt Chihowa ha̱ i̱ nukshopashke; yakni ai asha moma kʋt i̱ nukwiashke.

⁹ Yʋmmak osh mihah ma̱, tuba tok oka̱: yʋmmak osh im ʋpesah ma̱, ʋlhtahʋt tʋllaya tok oke.

¹⁰ Chihowa hʋt oklushi puttah im anukfila ya̱ kubʋffih chatuk; oklah puttah nan ahni tuk a̱ akshuchih chatuk oke.

¹¹ Chihowa im anukfila hʋto tʋkkali na abillia yoke; chu̱kʋsh nan ai ahni tuk putta kʋt isht ai unchululi ma̱ha̱ya ka̱ i̱ tʋkkali hoke.

¹² Oklushi yokʋt Chihowa hak osh i̱ Chitokaka yosh ilap ak o̱ immi hachi̱ hosh ʋtokule tuk a̱, na̱ yokpa hoke.

¹³ Ʋba yak o̱ Chihowa hʋt et a hopo̱koyo yosh hʋttak moma ka̱ pi̱hi̱sʋshke.

¹⁴ Ilap ai a̱ha̱tta ya̱ binnilit yakni ai asha moma ka̱ o̱ hopo̱ko̱ho̱yoshke.

¹⁵ Chu̱kʋsh aiyukali im ikbi tok osh nanah a kʋniohmi putta ka̱ ʋpesa̱ha̱chi yoke.

¹⁶ Mi̱ko ʋt tʋshka chipota i̱ lawa kak osh isht im aiya kʋt ikshoshke; hʋttak kʋllo ʋt imi lhampko chinto kak o̱ isht a hlʋkuffa he keyu hoke.

¹⁷ Issuba hʋt ai okcha̱ya a̱hlih keyu hoke, micha imi lhampko chito kak osh hlʋkufficha he keyu hoke.

¹⁸ Yakeh, i̱ nukshopa ʋhlehah, isht i̱ hullo ho̱ho̱yo ʋhleha ha̱ Chihowa nishkin ʋt onuttoiyula kʋt,

¹⁹ Imish shilombish a̱ aiilli a kohchicha chi̱h, micha hohchʋfoh chintoh kia ai okchalincha chi̱ kak oke.

²⁰ Pimish shilombish ʋt Chihowa hak o̱ ho̱ho̱yoshke; yʋmmak osh pi ʋpela micha pi̱ telihpa yoke.

²¹ Yohmi hoka̱ hohchifoh hulittopa yak o̱ il anukchieto hatuk osh, yʋmmak o̱ pi chu̱kʋsh ʋt a yokpa chi̱ hoke.

²² E chi ho̱ho̱yo hatuk pullah mak o̱, chim isht i̱ hullo yʋt pi onuttoiyulashke, Chihowa ma.