Atʋloa 31 - Chahta Holisso Holitopa 1886

Tʋloa pehlichi ʋt a tʋloa chi̱ ho̱, atʋloa Lewi ʋt ikbi tok.

¹ Chihowa ma, chishno ak o̱ chi ai ʋtukko li hokʋt, ik sʋ hofahyo ho̱ billiashke; chi ai ʋlhpiesa kak osh is sʋ hlakuffichashke.

² Chi haksubish a̱ awet is sa̱ wielashke; tu̱shpʋt is sʋ hlakuffichashke; is si okchalincha chi̱ hosh tʋli chito kʋllo, hulihta kʋllo chukka ya̱ is sa̱ tubashke.

³ A̱ tʋli chito micha a̱ hulihta kʋllo chia hokʋt, chi hohchifoh pulla hatuk mak o̱ hʋllʋllit isht is si a̱yashke.

⁴ Ishit hukli ya̱ luhmit a̱ tʋlali tuk a̱ is si a kohchichashke; ʋm akʋllo chia hokʋt.

⁵ Ʋmish shilombish a̱ chibbak pit fohki lishke; ai a̱hli Chitokaka Chihowa ma, fʋlʋmmichit is sʋ hlakuffichi tuk oka̱.

⁶ Nanah keyu hulabi puttah hulittobli ʋhleha ha̱ ak ahniecho hoke; amba ʋno ʋto Chihowa hak o̱ anukchieto li hoke.

^7-8 Sʋlbʋssha ka̱ is sʋ pesah mʋt, ʋmish shilombish nan isht im a pʋlʋmmi ka̱ ish ithana cha, a̱ tʋnʋp ibbak a̱ fohkit chik sʋm okhishto hosh, amba saiyi ya̱ ai o̱ hikia ʋwata ho̱ ish o̱ hilechi tuk oka̱, nan isht ish i̱ hullo yak o̱ isht a sʋ yokpah fehna chi̱ hoke.

⁹ Nanah pʋlʋmmi kʋt si onuttoiyula hoka̱, is sa̱ nukha̱klashke, Chihowa ma; sʋ nukha̱klo kak o̱ sʋ nishkin, ʋmish shilombish, micha sʋ haknip aiena kʋt iellit tahʋshke.

¹⁰ Sʋ nukha̱klo kak osh ʋm ilhfiopak ʋt tahah ma̱, hi̱hi̱ha li kak o̱ ʋm afʋmmi hʋt taha hokʋt: nan ʋsshʋche li ak atuk mak o̱ ʋmi lhampko hʋt kʋniʋshke, micha sʋf foni ʋt tushbit tahʋshkeh.

¹¹ Sʋlbʋsshali ʋhlehah momah pulla hatuk mak o̱ hʋttak ʋt a̱ hufahya hoke; a̱ chukkapanta ʋhleha hokak heto yʋmohmih fehnʋshke; mikma̱ ittithana li ʋhleha hʋt a̱ nukshopa hoke; kucha ya̱ a sʋ pesakmʋt, a̱ yihli̱hi̱pa hoke.

¹² Hʋttak illi yo̱ chomihchit im anukfila ha̱ isht ik sʋthanoshke; ampo koa yak o̱ i̱ sʋ chiyuhmi hoke.

¹³ Lawa hosh na̱ sʋ mehʋchi kʋt, “Nukshopah bat ʋlotʋshke,” a̱ha̱chi na ha̱ha̱klo li kak okʋt: ʋm a sʋnalit ittibaiachʋffʋt isht ittim ʋnumpuli kʋt, ʋm ilhfiopak a̱ isha chi̱ hosh ittim ʋpesʋshke.

¹⁴ Amba ʋno ʋto chi anukchieto lishke, Chihowa ma; “A Chitokaka chia hoke,” achi lishke.

¹⁵ A̱ nittak putta kʋt chibbak foiyukka hoke; a̱ tʋnʋp ʋhlehah ibbak, micha sʋlbʋsshali ʋhlehah aiena ka̱ im ai ishit is sʋ hlakuffichashke.

¹⁶ Chi̱ tishu ha̱ chi nʋsshuka ish o̱ tohwikelichashke; nan i̱ hullo chia hokʋt, is si okchalinchashke.

¹⁷ Chihowa ma, chi̱ pa̱ha̱ya li hokʋt, ik sʋ hofahyo kashke; hʋttak haksi ʋhleha hak osh hufahyashke, illi aiasha yak o̱ ont a chullosashke.

¹⁸ Ai ʋlhpiesa yoka̱ a sʋnalit ilefehnʋchit shittilemʋt nukwa̱yah iksho hosh ʋnumpuli ittiʋlbi hulabi ʋt ʋlhkʋmashke.

¹⁹ A chi achukma yʋt, yʋmma̱ chi̱ nukshoiyupa ʋhleha ha̱ luhmit ish im ieshi tuk osh, chi ai ʋtukko ʋhleha ha̱ hʋttak ʋhlehah itikba ya̱ ish im a yʋmi̱hi̱chi kʋt chintoshke.

²⁰ Hʋttak ʋt im anukfilah ittibaiachʋffa putta ka̱ im ai ishit, chim itikba a luma ya̱ ish a luhmi hoke; isunlʋsh putta kʋt na̱ mihachi ya̱ a kohchit ai ʋtukko ya̱ ish a luhmi hoke.

²¹ Hulihta kʋllo tʋmahah a̱ha̱tta lih ma̱, a̱ hullo kʋt ʋm ottʋninchih fehna tuk okʋt, Chihowa hʋt hulittopashke.

²² Yohmi hokak o̱ ʋno yokʋto sʋ kummuntah mʋt, “Chi nishkin itikba ya̱ ai ishit sʋ kanchishke,” achi le tuk ʋttok oke; yohmih kia chi̱ pa̱ha̱ya lih ma̱, nan asi̱hi̱lhha li ʋnnumpa ha̱ ish haklo tuk oke.

²³ I̱ hulittopa moma kʋt Chihowa ha̱ hʋsh i̱ hullashke; Chihowa hʋt ai a̱hli ʋhleha ha̱ hʋllʋlli yoke, amba ilefehnʋchi yʋno lawachi hosh im atobbi yoke.

²⁴ Hʋsh kʋllashke, mikma̱ hʋchi chu̱kʋsh a̱ hlampkocha hinla hoke, Chihowa ho̱ho̱yo hʋsh moiyumah ma.