Atʋloa 3 - Chahta Holisso Holitopa 1886

Ushi Absalom a̱ i̱ mʋlelih mʋt, atʋloa Lewi ʋt ikbi tok.

¹ Chihowa ma, a̱ tʋnampi ʋhleha hʋt lawʋt tahʋshke; lawa hosh wʋkayʋt a̱ sʋnalishke.

² Lawa hosh ʋmish shilombish a̱, “Chitokaka ya̱ ahlʋkuffi ʋt ik im ikshoshkeh,” achi hoke. [Yukopa.

³ Amba Chihowah mah, chishno ʋto a̱ telihpa si ʋpakfoiyupa, ishit sʋ holittopa, micha sʋ nushkobo ha̱ ʋbahchʋkalichi chia hoke.

⁴ Chihowa hʋt i̱ nʋnih hulittopa ya̱ et ʋm a hʋponakloh pulla chi̱ hoka̱, sʋtih ha̱ isht i̱ pa̱ha̱ya lishke. [Yukopa.

⁵ Chihowa hak osh sʋ hʋllʋlla he bano hatuk o̱, ʋno yokʋto ittoiyulʋt sʋ nu̱si tuk osh si okchʋshke.

⁶ Oklah tʋhlepah sipokni pokoli kʋnnohmi hosh a̱ sʋnalit si ʋpakfoiyupʋt hieli hoh kia, i̱ sʋ nukshopa he keyu hoke.

⁷ Chihowa ma, ish wʋkayashke; a̱ Chitokaka ma, is sʋ hlakuffichashke: a̱ tʋnʋp ʋhlehah moma ka̱ ittisukpi ya̱ ish issokmʋt, hʋttak haksi ʋhlehah in nuti putta ka̱ ish tilohlichih chatuk okʋt.

⁸ Ahlʋkuffi ʋt Chihowa hak o̱ immi hokeh: nan ishit chim ilayukpa yʋt chim okla ha̱ onuttoiyulashkeh. [Yukopa.