Atʋloa 28 - Chahta Holisso Holitopa 1886

Atʋloa Lewi ʋt ikbi tok.

¹ Chihowa ma, chishno ak o̱ chi̱ pa̱ha̱ya lashke; a̱ Tʋli Chito ma, lummʋt chik sa̱ binilo kashke; ʋnnumpah fʋlama chik samo ki̱, yakni kula ona ʋhleha hak o̱ chohmi lin náh.

² Chi̱ pa̱ha̱ya lih, ahulittopa ish ai ʋnumpuli ya̱ sʋbbak pit wieli li ka̱, nan asi̱hi̱lhha li ʋnnumpa ha̱ ish haklashke.

³ Hʋttak haksi ʋhlehah, micha nan ik ʋlhpeso yʋmihchi ʋhleha hosh, nan ik achukmo kʋt chu̱kʋsh a̱ foiyukkah kia, hʋttak bi̱ka ʋhleha ha̱ i̱ nanaiyʋt im ʋnumpuli ka̱ ai ibafo̱kkit isht is sʋ kanchin náh.

⁴ Nanah yʋmihchi tuk mak o̱, micha nan ik achukmo a kʋnio̱ho̱mi tuk mak o̱ ish emashke; ibbak atoksʋli tuk mak o̱ ish emashke; inla ya̱ na̱ kʋniomihchi tuk a̱ omihchit ish i̱ fʋlʋmmichashke.

⁵ Chihowa nanah yʋmi̱hi̱chi, micha ibbak ʋt nanah a toksa̱ha̱li tuk a̱ nan isht anukfilla he keyu hoka̱, yulhit akkakohli cha, ik hilecho kashke.

⁶ Nan asi̱hi̱lhha li ʋnnumpa ha̱ sʋ haklo hokʋt, Chihowa hʋt hulittopashke.

⁷ Chihowa hʋt ʋmi lhampko, micha a̱ telihpa yoke: yʋmmak o̱ sʋ chu̱kʋsh ʋt anukchietoh ma̱ si ʋpi̱hi̱la hatuk o̱, sʋ chu̱kʋsh ʋt na̱ yokpa hokʋt, ʋm ʋlhtʋloak a̱ isht ayokpa̱ha̱chi la chi̱ hoke.

⁸ Chihowa hʋt im oklah imi lhampko yoke, micha nan ʋhamʋt im ʋlhtoka ya̱ i̱ hulihta kʋllo ai okcha̱ya yoke.

⁹ Chim okla ha̱ ish okchalinchi cha, chimmi hatuk ʋt ish yokpalashke, micha chukfʋlhpoba chomihchit ʋpesʋchit isht ish a̱ya na billiashke.