Atʋloa 27 - Chahta Holisso Holitopa 1886

Atʋloa Lewi ʋt ikbi tok.

¹ Chihowa hak osh a̱ tohwikelika micha ʋm ai okcha̱ya yoke; kʋta ho̱ i̱ sʋ nukshopa hinlah choh? Chihowa hʋt ʋm ilhfiopak i̱ hulihta kʋllo yoke; kʋta ho̱ i̱ sʋ komuta hinlah choh?

² Nan ik achukmo yʋmihchi ʋhleha hʋt sʋn nipi a̱ ʋpʋt tahla chi̱ hosh, ʋm a sʋnali ʋhlehah, micha a̱ tʋnʋp ʋhlehah aiena kʋt a̱ sʋnalit a̱ bili̱ka ʋlah kia, ilap ak osh ibetʋblit akkakohah chatuk oke.

³ Tʋshka chipota lawa hosh a̱ sʋnalit si ʋbenʋchit si ʋpakfoiyupah kia, sʋ chu̱kʋsh ʋt nukshopa he keyu hoke; tʋnʋp osh a̱ sʋnalit wʋkayah kia, ilʋppak oh kia, sʋ nuktaiyala hoke.

⁴ Nan achʋffa ho̱ Chihowa ha̱ im asi̱hi̱lhha li kʋt, yʋmmak o̱ ho̱ho̱yo la chi̱ hoke: yʋmmʋt si okcha̱yah ta̱kla kʋt, Chihowa im ʋboha a̱ha̱ttʋt Chihowa ayukli ya̱ pi̱hi̱sa la he, micha i̱ tempel a̱ ai ʋsilhha̱ha̱chi la he ak oke.

⁵ Nan ik achukmo nittakma̱ im ai ʋtukko yak o̱ a sʋ luhma hi oka̱: im ʋlhtipo ai ʋloma̱ka yak o̱ a sʋ luhma hi oke; chahʋchit tʋli chito yak o̱ si o̱ binilicha hi oke.

⁶ Yohmi ka̱ himak a̱ sʋ nushkubo hʋt chahʋt a̱ tʋnʋp si ʋfullublit aiyasha ka̱ i̱ shahla chi̱ hoke; mikma̱ na̱ yokpʋt shʋkapʋt isht ayokpʋchi putta ka̱ im ʋlhtipo anu̱kaka ya̱ ai im issa lashke; Chihowa ha̱ i̱ tʋloʋt nan ulachit ayokpʋche lashke.

⁷ Tahpʋlʋt chi̱ pa̱ha̱ya li ka̱ ish haklashke, Chihowa ma; micha is sa̱ nukha̱klo cha, is sʋ haklashke.

⁸ “Sʋ nʋsshuka ya̱ ho hoyóh,” ish achi hoka̱, “Chihowa ma, chi nʋsshuka ya̱ hoyo la chi̱ hoke,” sʋ chu̱kʋsh ʋt chim achishke.

⁹ Chi nʋsshuka ya̱ chik sa̱ luhmo kashke; nukhubela hosh chi̱ tishu ha̱ naksika chik hilecho kashke; si ʋpelʋchi chia hokʋt, sʋ kanchit is sʋssʋn náh, Chitokaka si okchalinchi ma.

¹⁰ A̱ki micha hʋshki aiena kʋt sʋ kanchih kia, Chihowa hʋt sʋsha hi oke.

¹¹ Chi̱ hina ya̱ is sʋm abʋchashke, Chihowa ma; micha sʋlbʋsshali ʋhlehah pulla hatuk mak o̱ hina ittilawwi ya̱ fohkit sʋsht ish a̱yashke.

¹² A̱ tʋnʋp nan ahni ka̱ ibbak chik sʋ fohko kashke; na̱ hulabi isht ʋtukkoli ʋhlehah, micha nan ilbʋsshali fiopʋt ko̱ho̱cchi yʋt a̱ sʋnalit wʋkaya hoka̱.

¹³ Ai okcha̱ya yakni ya̱ Chihowa ai achukma ka̱ pi̱hi̱sa la hi ʋt, ai a̱hli hosh sʋ yimmishke.

¹⁴ Chihowa ha̱ ish hoyashke; ish kʋllashke; mikma̱ chi chu̱kʋsh a̱ hlampkocha hinla hokeh: yohmi hoka̱ Chihowa ha̱ ish ho̱ho̱yashke.