Atʋloa 26 - Chahta Holisso Holitopa 1886

Atʋloa Lewi ʋt ikbi tok.

¹ Ʋno ak osh ai ʋpissali hosh no̱ho̱wa li hoka̱, nan is sʋm ʋpesashke, Chihowa ma; mikma̱ Chihowa ha̱ anukchieto li kʋt shʋnayoa lih keyu hoke.

² Ʋcchukmalit is sʋ pesa cha, is si ʋkostininchashke, Chihowa ma; ʋm anukfilah micha sʋ chu̱kʋsh aiena ka̱ imomaka ish pisashke.

³ Isht ish i̱ hullo yʋt sʋ nishkin itikba ya̱ tʋkkali hoka̱ mikma̱ chim ʋnnumpah a̱hli ak o̱ a no̱ho̱wa li hoke.

⁴ Hʋttak hulabi ʋhleha ha̱ ta̱kla binnili lih keyuh, micha nan ilahobbi ʋhleha ha̱ iba chukkoa la he keyu hoke.

⁵ Nan ik achukmo isht asha ittʋnaha ya̱ ak ahniecho hoke; micha hʋttak haksi ʋhleha ha̱ takla binnili la he keyu hoke.

⁶ Nan okpʋni keyu yosh sʋbbak a̱ ʋchefa lish, chim alta ya̱ ʋpakfoiyupa lashke, Chihowa ma,

⁷ Yʋmohmit, yakoke ahnit ʋnnumpah ishit haklochit, na̱ fehna ish yʋmi̱hi̱chi moma ka̱ ʋno̱ho̱li lashke.

⁸ Chihowa ma, ish ai a̱ha̱tta chukka ya̱, micha chim ahulittopa a foiyukka ya̱ hulittobli li hoke.

⁹ Ʋmish shilombish a̱ nan ʋsshʋchi ʋhlehah aieninchit, micha ʋm ilhfiopak a̱ issish hlʋtʋbli hʋttak ʋhlehah aieninchit isht chik kancho kashke.

¹⁰ Yʋmma̱ ibbak a̱ nan okpʋni ʋt a foiyukkah, micha ibbak ishtimpakimma yʋt nan iʋlli yo̱ isht ʋluttoa hoke.

¹¹ Amba ʋno yokʋto ai a̱hli hosh a̱ya li hoke; is sʋ hlakuffechi cha, is sa̱ nukha̱klashke.

¹² Ai ittilawwi achukma ya̱ saiyi yʋt o̱ hikkia kak osh, ai ittʋnaha putta ka̱ a̱ha̱ttʋt Chihowa ha̱ ayokpʋche la chi̱ hoke.