Atʋloa 25 - Chahta Holisso Holitopa 1886

Atʋloa Lewi ʋt ikbi tok.

¹ Chihowa ma, chishno ak o̱ ʋmish shilombish a̱ isht chim ona lishke.

² A̱ Chitokaka ma, chishno ak o̱ chi anukchieto lishke; ik sʋ hofahyo kashke; a̱ tʋnʋp ʋhleha hʋt ik sʋm ilawato kashke.

³ Micha chi ho̱ho̱yo moma kʋt hufahya he keyu hoke; na kʋnihmih keyu ho̱ chi kanchi ʋhleha hak osh hufahya chi̱ hoke.

⁴ Chihowa ma, chi̱ hina putta ka̱ is sʋthʋnanchashke; ata̱ya la he ish ahni putta kʋt is sʋm abʋchashke.

⁵ Chim ʋnnumpah a̱hli ya̱ is si a nowʋchashke, micha is sʋm abʋchashke; ʋm ai okcha̱ya Chitokaka chia hatuk o̱, nittak moma ka̱ chi ho̱ho̱yo li hoka̱.

⁶ Chihowa ma, nan isht ish i̱ nukha̱ha̱kloh, micha isht ish i̱ hu̱hu̱lloh chatuk ʋt ish ithaiyanashke; yʋmmʋt abillia yoka̱.

⁷ Sʋ hemi̱ttah mʋt nan ʋssha̱ha̱chi li tok, micha nan ʋlhpisa kuba̱ha̱ffi li tok a̱ chik ithaiyano kashke; nan ish i̱ hulloh pulla hosh, chi achukmah pullah mak osh, chishno ʋt is sʋthaiyanashke, Chihowa ma.

⁸ Chihowa hʋt achukma micha ai ʋpissali yoke; yohmi hokʋt nan ʋsshʋchi ʋhleha ha̱ ata̱ya ya̱ im abʋchi hoke.

⁹ Chu̱kʋsh akka̱losi ʋhleha ha̱ ai ʋlhpiesa a nowʋchi hokbano; micha chu̱kʋsh akka̱losi ʋhleha ha̱ i̱ hina im abʋchi hokbano.

¹⁰ I̱ nan ittim ʋlhpisa, micha nan isht im ai ʋlhtukkoa putta ka̱ hulittobli ʋhleha ha̱ Chihowa hʋt nan a kʋniohmi kʋt momʋt nan i̱ hullo micha ʋnnumpah ai a̱hli mak oke.

¹¹ Chihowa ma, nan ik si ai ʋlhpieso yʋt chito hokak o̱, chi hohchifoh pulla hatuk mak o̱ is sa̱ kʋshuffashke.

¹² Hʋttak kʋta hosh Chihowa ha̱ i̱ nukshopa yoh choh? ata̱ya he ʋlhpesa ʋhayuchit isha chi̱ ka̱ im abʋcha chi̱ hoke.

¹³ Imish shilombish ʋt ai achukma ho̱ a̱ha̱tta hi oke, mikma̱ im ishtatiaka yʋt yakni ya̱ iesha hi oke.

¹⁴ Chihowa ai ittʋchʋffa yʋt i̱ nukshopa putta ka̱ ibafoiyukka hoke; yohmi kʋt nan ittim ʋpesa tuk ʋt ithʋnancha he ak oke.

¹⁵ Sʋ nishkin ʋt Chihowa hak o̱ pit o̱ tʋllaya na billia hoke: saiyi ya̱ ishit hukli ya̱ ishit kuccha hi ak oka̱.

¹⁶ Et is sa̱ filema cha, is sa̱ nukha̱klashke; ʋno sʋ bieka cha, sʋlbʋssha hoka̱.

¹⁷ Sʋ chu̱kʋsh ik im ai achukmo putta kʋt chitot tahʋshke; nan ʋm a pʋllʋmmi putta ka̱ is si a kohchashke.

¹⁸ A sʋlbʋssha micha nan isht si ʋtaklʋma ya̱ ish pesa cha, nan ʋsshʋche li moma ka̱ is sa̱ kʋshuffashke.

¹⁹ A̱ tʋnʋp ʋhleha ha̱ ish pisashke; lawa cha, a̱ nukkillih ataiyapa hosh a̱ nukkilli hoka̱.

²⁰ Ʋm ilhfiopak a̱ ish hʋllʋlli cha, is sʋ hlakuffichashke; chi ai ʋtukko li hokʋt, ik sʋ hofahyo kashke.

²¹ Chi ho̱ho̱yo li hoka̱, ai a̱hli micha ai ʋpissali yʋt sʋ hʋllʋllashke.

²² Islael oka̱ nan isht ai ilbʋssha mominchit ish kohchashke, Chitokaka ma.