Atʋloa 22 - Chahta Holisso Holitopa 1886

Tʋloa pehlichi ʋt Aiyalelh Hʋsshaha a tʋloa chi̱ ho̱, atʋloa Lewi ʋt ikbi tok.

¹ A̱ Chitokaka ma, a̱ Chitokaka ma, nantah kʋtiohmi ho̱ is sʋ kanchih choh? Nantah kʋtiohmi ho̱ kiffa̱ha̱hʋt ʋnumpule li ka̱ si okchalincha hi atuk ʋt a̱ hupakih choh?

² A̱ Chitokaka ma, nittak atukma̱ tahpa̱ha̱li lih kia, chik sʋ hakloshke; micha ninak ak oh kia a nuktaiyala ik sʋm ikshoshke.

³ Yohmih kia Islael okla hʋt a chi holittobli̱hi̱chi ya̱ binnili chia hʋt chi holittopa hoke.

⁴ Chishno ak o̱ pi̱ tikba ʋhleha hʋt chi anukchieto tok oke; oklah chi anukchietoh ma̱, ish hlʋkuffi̱hi̱chi tok oke.

⁵ Chishno ak o̱ chi̱ pa̱ha̱yah mʋt, hlʋkuffi tok; chi anukchietoh mʋt, ik hufahyo ki tok oke.

⁶ Amba ʋno ʋto shu̱shi sia hosh, hʋttak siah keyushke; hʋttak ʋt ik ʋhobalo, micha okla hʋt shittilema yo̱ sia hoke.

⁷ Sʋ pesa kʋt momʋt kʋlakshichit a̱ yukpa hoke, ittiʋlbi ya̱ itʋkliwelichi hoke, nushkubo ha̱ fahli hoke.

⁸ “Chihowa ha̱ anukchieto tuk oke; ik hlʋkuffichí: isht a yokpa hokʋt, ik kohchichí,” achi hoke.

⁹ A̱hlíh, ikfuka ya̱ isht is sʋ kohchi tok chia hosh, hʋshki ipi̱shik a tʋkkali lih ma̱, nuktaiyala is si anukfohki tok chia hoke.

¹⁰ Im ushʋto a kohcha li tok taiyaklah mʋt, chibbak a̱ foiyukka lih chatuk oke; hʋshki ikfoka kohcha li tok taiyaklah ma̱, a̱ Chitokaka chia hoke.

¹¹ Nan a pʋlʋmmi ʋt a̱ bili̱kasih ma̱, si ʋpela yʋt iksho hoka̱, is sa̱ mishema̱hchin náh.

¹² Wak nakni lawa kʋt si ʋfullublishke, Beshan aiyasha kʋllo putta kʋt si ʋpakfoiyupʋshke.

¹³ Koi chito na̱ nibli micha kili̱hi̱ha yo̱ choiyuhmi hosh ʋm a sʋnalit itʋkpʋshalishke.

¹⁴ Oka yo̱ chohmit sʋ hlatʋpʋshke; mikma̱ sʋf foni poiyutta kʋt tʋhlohlishke; sʋ chu̱kʋsh ʋt foi akmo yo̱ chohmit sʋkfoka iklʋnna ya̱ a bilʋshke.

¹⁵ Ʋmi lhampko hʋt shila kʋt shuti koa tushafa yo̱ chohmishke, mikma̱ sʋsunlʋsh ʋt sʋ nutakfa ya̱ ʋkʋlloshke; mihma̱ nan illi lukfi yoka̱ isht is si ona̱hosishke.

¹⁶ Ofi putta kʋt si ʋpakfoiyupa hoka̱: nan ik achukmo yʋmihchi ittʋnaha yosh si ʋfulluplit, sʋbbak micha saiyi ya̱ bahlishke.

¹⁷ Sʋf foni moma ka̱ hutihna la hinlah itti̱takla ka̱ yʋmmʋto aiokchiffelit sʋ pi̱hi̱sʋshke.

¹⁸ A̱ na̱fohka puttah oklah ittʋkʋshkoʋshke, micha ʋm anchi ya̱ na̱ shoelishke.

¹⁹ Yohmih kia Chihowa chiah ma, is sa̱ hupakichin náh; ʋmi lhampko ma, tu̱shpʋt ant is si ʋpelashke.

²⁰ Ʋm ilhfiopak a̱ bʋshpo fʋlaya ya̱ ish ai i̱ hlʋkuffichikmʋt, yʋmmak a̱ bieka hatuk oka̱, ofi ibbak a̱ is si a hlukuffichashke.

²¹ Koi chito itih ha̱ is si a hlʋkuffichikmʋt, is sʋ haiyaklo cha, yʋnʋsh puttah lʋpish a̱ ai ishit is sʋ hlakuffichih pullashkeh.

²² Yohmikma̱ chi hohchifo ha̱ ittibapishi lih ʋhleha ha̱ im ʋno̱ho̱li lashke; ittʋnaha im ai itti̱takla ya̱ a chi holittobliche lashke.

²³ Chihowa i̱ nuksho̱ho̱pa ʋhleha hʋt hʋsh hulittoblichashke; Chekob ishtatiaka moma kʋt hʋsh hulittoblashke; micha Islael ishtatiaka moma kʋt hʋsh i̱ nukwiashke.

²⁴ Ilbʋssha yʋt nan i̱ pʋllʋmmi ka̱ ik shittilemo hosh ik i̱ yuwalo hoka̱: mikmʋt nʋsshuka ya̱ i̱ luhmih keyu hoke; amba i̱ tahpa̱ha̱la ka̱ haklo hoke.

²⁵ Chishno pulla kak o̱ ittʋnaha chito ya̱ a chi holittobliche li hoke; ʋnnumpah il ono̱ho̱cchi le tuk ʋt i̱ nukshopa ʋhlehah im itikba ya̱ ai ʋtobbi la chi̱ hoke.

²⁶ Chu̱kʋsh akka̱losi ʋhleha hʋt impa cha, im ʋlhpesashke; Chihowa ha̱ hoyo ʋhleha hʋt hulittoblichashke; hʋchí chu̱kʋsh ʋt okcha̱ya na billia hokbano.

²⁷ Yakni ont atahaka moma kʋt ithana cha, Chihowa ha̱ i̱ fʋlamashke, micha oklushi puttah ai achʋffa moma kʋt chi tikba ya̱ ayokpʋchashke.

²⁸ Apehlichika yʋt Chihowa immi yoke; yohmi hosh oklushi putta ka̱ pehlichi yoke.

²⁹ Yakni paknaka nia ʋhlehah moma kʋt impa cha, ayokpʋchih pulla hi oke; akka o̱ho̱na kʋt kʋnioht ilap inlit il okchalincha he keyu moma kʋt itikba ai ʋkahchunola hi oke.

³⁰ Ishtatiaka yʋt im antia chi̱ hoke; nan i̱ Shahli ʋt isht ai unchululi himmak mi̱hinti ka̱ im ʋnno̱ho̱wa hi oke.

³¹ Ilʋppak o̱ ʋtahli kʋt ai ʋlhpiesa hosh yʋmohmi tuk a̱, oklah aiyasha chi̱ ka̱ oklah ona cha, im ʋno̱ho̱la hi oke.