Atʋloa 20 - Chahta Holisso Holitopa 1886

Tʋloa pehlichi ʋt a tʋloa chi̱ ho̱, atʋloa Lewi ʋt ikbi tok.

¹ A chilbʋsshah nittakma̱ Chihowa hʋt chi haklo hokbano; Chekob i̱ Chitokaka hohchifo hʋt chahʋchit chi benilechi hokbano;

² Ahulittopa ya̱ et a chi ʋpela cha̱, Saion a̱ et chi a hʋllʋllikbano;

³ Ilhpak isht ish ayokpʋchi moma ka̱ ithaiyana cha, na̱ hukmit isht ish ayokpʋchi ya̱ ayokpʋchikbano; [Yukopa.

⁴ Chi chu̱kʋsh nan ahni kak o̱ chema cha, chim anukfilah moma ka̱ chim ai a̱hlichikbano.

⁵ Nan isht ish hlʋkuffichi ya̱ isht e shʋkapa cha, pi̱ Chitokaka hohchifo ha̱ shʋpha e tʋkalichashke: nan ish ʋsilhhah moma ka̱ Chihowa hʋt chim ai a̱hlichikbano.

⁶ Chihowa hʋt nan ʋhamʋt im ʋlhtoka ya̱ okchalinchi ka̱ himak a̱ ithana lishke: ʋba hulittopa ya̱ et a haiyaklo cha, ibbak ishtimpakimma hlampko hak o̱ isht okchalinchi hoke.

⁷ Kʋnimi kʋt tʋnʋp iti chʋnaha isht ilawʋtakma̱, inla kʋt issuba hak o̱ isht ilawʋta hoke; amba pishno yokʋto pi̱ Chitokaka Chihowa hohchifo hak o̱ isht il ilawʋta hoke.

⁸ Yʋmmak okʋto ʋkahchunolit akkakohʋshke; amba pishno yokʋto wʋkayʋt ʋpissʋt e hielishke.

⁹ Chihowa ma, okchalinchih: e pa̱ha̱yah nittakma̱, Mi̱ko ʋt pi haklashke.