Atʋloa 2 - Chahta Holisso Holitopa 1886

¹ Nantihmi ho̱ oklushi putta kʋt nukoah ma̱, ʋnonti oklah putta kʋt nana ho̱ keyu ka̱ anukfillih choh?

² Chihowa micha im ʋlhtokʋt ʋhama ya̱ yakni i̱ mi̱ko ʋhleha hʋt i̱ sʋnalit hiohlih ma̱, pehlichi ʋhleha hʋt ʋnnumpah isht ittibai ʋchʋffʋt im asʋnnalishke.

³ “Im ishit tʋllakchi putta ka̱ keho tʋbli cha, im asetah putta ka̱ kʋnimma eho pelashke,” achishke.

⁴ Ʋba binnili ʋt kʋlakshichi hosh i̱ yukpʋshke; nan i̱ Shahli ʋt ik ʋhobalot hubachishke.

⁵ Yohmih mʋt i̱ nukkilli hosh im ʋnumpoli cha, i̱ nukhubela hosh kumuntʋchih mʋt,

⁶ “Yohmih kia ʋno ʋto a̱ mi̱ko ya̱ a̱ nʋnih hulittopa Saion a̱ o̱ binnila hi a̱ ʋtokule li tuk oke,” achishke.

⁷ Nan ʋlhpisa ya̱ ʋnoli lashke: Chihowa hʋt, “Sʋsoh chia hoke; ʋno ak osh himak nittak a̱ chi tobʋche lishke.

⁸ “Is sʋm asilhhakma̱, oklushi putta ka̱ chima likmʋt, yakni ont ʋlhih fullota ka̱ chimmi ikbi lashke.

⁹ “Tʋli tʋbi yo̱ isht ish kolikmʋt, shuti ampo yo̱ chomihchit kolit ish kancha chi̱ hoke,” ʋm achi tuk oke.

¹⁰ Yʋmohmi hoka̱ himak a̱, mi̱ko ʋhlehah ma, hʋsh hopoyuksashke: pehlichika yakni hʋsh aiyasha ma, ahah hʋsh ahnashke.

¹¹ Chihowa ha̱ i̱ nukshopa hosh hʋsh im antiashke, micha wʋnni̱hi̱chi hosh hʋchi yokpashke.

¹² Ushi ya̱ i̱ nutaka hosh hʋsh i̱ su̱ksoashke; nukhubela na, hina takla ya̱ hʋchi aiokpulokah yobʋn náh; im anukhubela yʋt chekosikma̱ libba hinla hoka̱. Yʋmma̱ ai ʋtukko hokʋto momʋt na̱ yokpa hoke.