Atʋloa 19 - Chahta Holisso Holitopa 1886

Tʋloa pehlichi ʋt a tʋloa chi̱ ho̱, atʋloa Lewi ʋt ikbi tok.

¹ Chitokaka im aholittopa ya̱ ʋba yʋt ʋno̱ho̱li hoke, mikma̱ shutik ʋt ibbak nan ʋtahli ya̱ hayakʋchi hoke.

² Nittak osh nittak a̱ nan im a̱ha̱chi hoke; micha ninak osh ninak a̱ nan ithʋna̱ha̱chi hoke.

³ Nanah achi kʋt ikshoh, ʋnnumpa hʋt ikshoh; itih hʋt ola na haklo ka̱ iksho kʋmmohmishke:

⁴ Yʋmohmih kia ola hʋt kucchʋt yakni moma ka̱ hlupulli yoke, micha yakni ont atahaka ya̱ im ʋnnumpah putta kʋt ona hoke. Yʋmmak o̱ hʋshi ya̱ ʋlhtipo ai i̱ tʋlali tok o̱,

⁵ Yʋmmʋt hʋttak ohoyoh ittʋwaya tuk osh im ʋboha a nusi ya̱ kohcha kak o̱ chohmi hosh, hʋttak kʋllo yo̱ chohmit im ata̱ya ya̱ a chʋfa chi̱ kʋt na̱ yokpa hoke.

⁶ Ʋba shutik ai ʋlhih ʋttʋt kohchʋt ia hosh, fullotʋt ʋlhih i̱ tʋnnʋp ona hoke; yohmi ka̱ im alʋshpaka ya̱ i̱ luma kʋt ikshoshke.

⁷ Chihowa i̱ nan ʋlhpisa yʋt ʋlhtahah achukma yosh, shilombish a̱ fʋlʋmmichit okchʋli yoke: Chihowa isht im ʋtukkoa yʋt aiya̱hlih kʋllo yosh, ik hopoyukso ya̱ hopoyuksʋli yoke.

⁸ Chihowa i̱ nan ʋlhpisa putta kʋt ai ʋpissali yosh, chu̱kʋsh yokpali yoke: Chihowa im ʋnnumpah ʋlhpisa yʋt kʋsshofa hosh, nishkin a̱ tohwikelichi yoke.

⁹ Chihowa ai im a nukshopa yʋt kʋsshofa hosh, tʋkkali na billia yoke: Chihowa nan ʋpehi̱sa putta kʋt ai a̱hlih, micha ai ʋlhpiesah bieka hoke.

¹⁰ Yohmi ka̱ bʋnna he ʋlhpesa kʋt tʋli hulisso lakna, tʋli hulisso lakna hulittopa lawah kia i̱ shaiyahli hoke; micha champuli kʋt, foi bila, micha foi bila hakshup a ho̱ho̱iya ka̱ i̱ shahli hoke.

¹¹ Chi̱ tishu hak kia isht i̱ tohwikeli hoke; yʋmma̱ hulittobli kʋt isht im ʋlhtobah chito yoke.

¹² Ilap na̱ yusho̱ho̱ba kʋto kʋta hosh ʋkostinincha hinlah choh? na̱ yushoba luma putta ka̱ is sa̱ kʋshuffashke.

¹³ Mikmʋt chi̱ tishu ha̱ ilap ak pu̱llʋt ʋssha̱ha̱chi aiena ka̱ ish i̱ kʋtʋblashke; ik sʋm aiyo kashke: yohmi ho̱ ai ʋlhpiesa lih achukma hosh, nan ai ʋsshʋchi la̱wa ka̱ ʋm a kʋshofa chi̱ hoke.

¹⁴ Chi tikba ya̱ sʋtih ʋnumpo̱ho̱li kʋt, micha sʋ chu̱kʋsh anukfi̱hi̱lli kʋt a hulittopashke, a̱ tʋli chito, micha si okchalinchi Chihowa ma.