Atʋloa 17 - Chahta Holisso Holitopa 1886

Ʋnnumpah ilbʋssha Lewi ʋt ikbi tok.

¹ Chihowa ma, ai ʋlhpiesa ka̱ ish haklashke; pa̱ha̱ya li ka̱ ish haiyaklashke; nan ilahobbi keyu ittiʋlbi yo̱ ʋm ʋnnumpah ilbʋssha yʋt a kohcha ka̱ ish hʋponaklashke.

² Nan ai ʋlhpiesa ʋm ʋlhpisa kʋt chi tikba yak o̱ a mintashke; chi̱ holhpunnayo hʋt ai ʋlhpiesa yak o̱ onuttulashke.

³ Sʋ chu̱kʋsh a̱ imomaka pisʋt, ninak ma̱ ʋm a̱yʋt, si ʋfanalichit ish hlupulli hoh kia, nana ka̱ ish ʋhayucha he keyuh; sʋtih hʋt ai ʋlhpiesa ont ik iyo ka chi̱ ho̱ ʋm anukfilʋshke.

⁴ Hʋttak atoksʋli yokʋno, chittiʋlbi im ʋnnumpa hak atuk mak o̱ nan okpʋni i̱ hina ya̱ ʋno yak okʋto ahah ahnit ak ʋhʋllayo ke tuk oke.

⁵ A no̱ho̱wa li kʋt chi̱ hina ya̱ kʋllochit ieshi ho̱, saiyi ʋt ik kʋnʋllo ke tuk oke.

⁶ Ʋno ʋt chi̱ pa̱ya lishke; is sʋ hakla chi̱ hoka̱, Chitokaka ma: chi haksubish a̱ et a̱ welit, nan a̱ha̱chi li ka̱ ish haklashke.

⁷ I̱ sʋnalit wʋkaya ʋhleha ha̱, chi ai ʋtukko ʋhleha ha̱ chibbak ishtimpakimma isht im a hlʋkuffichi chia hʋt isht ish i̱ hullo putta ka̱ ish ottʋninchih fehnashke.

^8-9 Nishkin nihi chomihchit is sʋ hʋllʋllashke; hʋttak haksi ʋhleha hʋt si okpʋninchi ya̱, a̱ tʋnʋp chilita ʋhleha hʋt a̱ sʋnalit si ʋpakfoiyupa ka̱, a kucchit chis sʋnahchi nuta yak o̱ is si a luhmashke.

¹⁰ Imi chu̱kʋsh a̱ i̱ kʋmalih mʋt, ile fehnʋchit itih ha̱ isht ʋnumpo̱ho̱li hoke.

¹¹ Il ai ittʋnowa ka̱ himonasi ka̱ pi ʋfullublishkeh; yakni ya̱ pi akʋccha chi̱ kʋt, nishkin a̱ isht ayokchifelit a hopo̱ko̱ho̱yoshke.

¹² Nanah holba kʋt koi chito yosh niblit tahlih bʋnna ka̱ chohmi hoke; micha koi himitta yosh aluma putta ka̱ binnili ka̱ chohmi hoke.

¹³ Wʋkayáh, Chihowa ma; iʋt ont ʋfamʋt ish akʋcchashke; ʋmish shilombish a̱ hʋttak haksi im ai ishit, chi̱ bʋshpo fʋlaya isht is sʋ hlakuffichashke.

¹⁴ Hʋttak ʋhleha ha̱ im ai ishit, Chihowa ma, yakni anukchieto hʋttak ʋhleha ha̱ im ai ishit chibbak a̱ isht is sʋ hlakuffichashke: nan immi hʋt okcha̱ya ilʋppak illah, mikma̱ ikfoka ya̱ nanah chimmi isht ish im ʋlotuli hoke; ushi ʋhleha hʋt i̱ lawa kʋt im ʋlhpesakmʋt, nan im atampa kʋto in ʋlla ʋhleha ha̱ im ʋshachi hoke.

¹⁵ Ʋno ʋto ai ʋlhpiesa hosh chi nʋshshuka ya̱ pisa hi a̱ ahni li hoke; si okchakmʋt, ish haiyakakma̱ isht ʋm ʋlhpesashke.