Atʋloa 148 - Chahta Holisso Holitopa 1886

¹ Chihowa ha̱ hu holittoblichíh. Ʋba ya̱ Chihowa ha̱ awet hʋsh a hulittoblichashke; achahaka putta ka̱ hʋsh a hulittoblichashke.

² Im enchel moma kʋt hʋsh hulittoblichashke; immih hʋchia hʋt momʋt hʋsh hulittoblichashke.

³ Hʋshi micha hʋshninaka̱ya yʋt hʋsh hulittoblichashke; fuchik tohwikelichi hʋchia hʋt momʋt hʋsh hulittoblichashke.

⁴ Ʋba shutik puttah im ʋba shutik, micha shutik paknaka oka aiyasha kʋt hʋsh hulittoblichashke.

⁵ Yʋmma̱ putta kʋt Chihowa hohchifo ha̱ hulittoblichashke; yʋmmak osh im apesah ma̱, tuba tok oka̱.

⁶ Mihmʋt tʋkohliechi tok o̱ tʋkkali na billiʋt billia hoke; nan ʋlhpisa im apesa tok o̱, yʋmmʋt a kʋnia he keyu hoke.

⁷ Yakni aiyashʋt pit hʋsh a hulittoblichi kʋt, na̱poa huchito okhʋtah aiyasha, micha ahufobi puttah momah,

⁸ Luak micha hʋta̱ffo, okti pushi micha oktohbi, mahlih kʋllo im ʋnnumpah ai a̱hlichi,

⁹ Nʋnih chaha puttah micha nʋnih chipinta momah, iti nan ʋni puttah micha chuahla momah,

¹⁰ Nampoa micha nan ʋlhpoa momah, na̱ bʋlali micha hushi sʋnahchi a̱sha,

¹¹ Yakni mi̱ko ʋhlehah micha oklah puttah momah, pehlichi ʋhlehah micha yakni nan ʋpesa aiyasha momah,

¹² Hʋttak himithoa micha ohoyoh himithoa, hʋttak sipokni ʋhlehah, ʋlla ai ittʋppeha kʋt Chihowa ha̱ hʋsh hulittoblichashke.

¹³ Ilʋppa̱ putta kʋt Chihowa hohchifo ha̱ huletublichashke; yʋmma̱ hohchifoh illa hosh huletumpa hoka̱: im ahulittopa yʋt yakni micha ʋba aiena ka̱ i̱ shaiyahli hoke.

¹⁴ Micha im okla ha̱ lʋpish wʋkayʋchit i̱ hilechi tuk oka̱, i̱ hulittopa ʋhlehah moma, Islael im ʋlla ʋhleha i̱ bili̱ka aiyasha okla hokʋt huletublicha hi ʋt im ai ʋlhpiesa hoke. Chihowa ha̱ hu holittoblichíh.