Atʋloa 147 - Chahta Holisso Holitopa 1886

¹ Chihowa ha̱ hu holittoblichíh; pi̱ Chitokaka ya̱ nan ulachit ayokpʋchi ka̱ achukma hoka̱: hulittoblichi kʋt im achukmah micha ai ʋlhpiesah aiena hoka̱.

² Chelusalem i̱hi̱kbi Chihowa hak osh Islael ai ittʋfemimpa ʋhleha ha̱ hot ittʋhobbi hoke.

³ Yʋmmak osh chu̱kʋsh nukha̱klo ʋhleha ha̱ hlʋkuffechi cha, i̱ na̱ huttupa putta ka̱ ʋfohli mak oke.

⁴ Fuchik puttah holhtina ka̱ ʋnoli cha, yʋmma̱ moma hohchifo ha̱ huchifo hoke.

⁵ Pi̱ Shahli yʋt chintoh, micha nan isht im ai a̱hli ʋt chintoh fehna hoke; nan ai ʋkostininchi ya̱ kʋna hosh hutihna he keyu hoke.

⁶ Chihowa hʋt chu̱kʋsh akka̱losi ʋhleha ha̱ wʋkayʋchi, amba hʋttak haksi ʋhleha ha̱ akka fehna isht ona yoke.

⁷ Chihowa ha̱ yakoke im aiyahni hosh hʋsh i̱ tʋloashke; pi̱ Chitokaka ya̱ hap ulachit ishit hʋsh ayokpʋchashke.

⁸ Yʋmmak osh shutik a̱ hushontih isht ompohomo mak oke; yakni ya̱ umbah im ʋtahli mak oke; nʋnih chaha putta ka̱ hʋsshuk ai uffochechi mak oke.

⁹ Nan ʋlhpoa ya̱, micha fʋlashtushi putta kʋt ya̱ha̱yakma̱, im ilhpak ipeta yoke.

¹⁰ Issubah imi lhampko ha̱ im ai achukmah keyuh, hʋttak hʋnali ha̱ isht a yokpah keyu hoke.

¹¹ I̱ nukshopa cha im isht i̱ hullo anukchieto ʋhleha hak o̱ Chihowa hʋt isht a yokpa yoke.

¹² Chelusalem ma, Chihowa ha̱ ish ayokpa̱ha̱chashke; Saion ma, chi̱ Chitokaka ya̱ ish hulittoblichashke.

¹³ Chi̱ huliht okhisa isht ʋlhkʋma putta ka̱ kʋllochikmʋt, chim ʋlla ʋhlehah chim itti̱takla aiyasha ka̱ yokpali hoka̱.

¹⁴ Yʋmmʋt yakni chim ai ʋlhi ya̱ itti̱ nanaiya ikbi yoke; onush nia i̱ shahli yak o̱ ishit chi fehubli hoke.

¹⁵ Nanah miha kʋt yakni ya̱ awet pila hoke; im ʋnnumpa hʋt mʋlli kʋt shinimpah fehna hoke.

¹⁶ Yʋmmak osh okti pushi ya̱ chukfi hishi chomihchit et ima hoke; okti hʋta ya̱ hittuk chubi chomihchit fimmi hoke.

¹⁷ Im okti ya̱ pʋska bushulli chomihchit awet pila yoke; i̱ kʋpʋssa itikba ya̱ kʋta hosh hikkia hinlah choh?

¹⁸ Im ʋnnumpa ha̱ awet pila hosh, yʋmma̱ putta ka̱ bileli hoke; i̱ mahli ha̱ mahlechi na, oka yosh yʋnʋlli hoke.

¹⁹ Im ʋnnumpa ha̱ Chekob a̱ im ʋnoli cha, i̱ nan ʋlhpisa puttah, micha nan ʋpehi̱sa tuk putta ka̱ Islael a̱ im ottʋninchi yoke.

²⁰ Amba oklushi nanah kia ik i̱ yʋmihchoshke; yohmi hatuk o̱ nan ʋpehi̱sa yatuk a̱ oklah ik ithanoshke. Chihowa ha̱ hu holittoblichíh.