Atʋloa 146 - Chahta Holisso Holitopa 1886

¹ Chihowa ha̱ hu holittoblichíh. Ʋmish shilombish ma, Chihowa ha̱ ish hulittoblichashke.

² Si okcha̱yah ta̱kla kʋt Chihowa ha̱ hulittobliche la chi̱ hoke; a̱ha̱tta lih ai ʋlhi kʋt a̱ Chitokaka ya̱ nan ulachit ayokpʋche la chi̱ hoke.

³ Huchitoka, hʋttak ushi, yʋmmak okʋt isht okchalincha hinla kʋt ik im iksho hoka̱, hʋchik anukchieto kashke.

⁴ Im ilhfiopak ʋt kohchʋt kʋniakma̱, fʋlamʋt lukfi a̱ ona hoke; nittak yʋmmak o̱ nan ahni yatuk ʋt ont akshot kʋnihyʋshke.

⁵ Chekob i̱ Chitokaka yak osh ʋpelʋchi ka̱, i̱ Chitokaka Chihowa hak o̱ anukchieto yʋt na̱ yokpa yoke.

⁶ Yʋmmak osh ʋba micha yakni, okhʋtah micha nana hosh yʋmma̱ aiyasha momah aiena ka̱ ikbi tok osh, aia̱hlika ieshi na billia yak oke.

⁷ Ilbʋsshaka ʋhleha ha̱ ai ʋlhpiesa im apesa, hohchʋfo ʋhleha ha̱ ilhpak ipeta yoke; Chihowa hʋt tʋllakchi ʋhleha ha̱ i̱ hutuffi yoke.

⁸ Chihowa hʋt nishkin lʋpa ʋhleha ha̱ i̱ fʋtummi yoke; Chihowa hʋt ʋkahchunnoli ʋhleha ha̱ ʋkahchʋkalichi yoke; Chihowa hʋt ai ʋlhpiesa ʋhleha ha̱ i̱ hullo yoke.

⁹ Chihowa hʋt oklah inla ʋhleha ha̱ hʋllʋlli yoke; ʋlla ʋlhtakla micha ohoyoh i̱ hʋttak illi aiena ka̱ ʋpelʋchi hoke; amba hʋttak haksi ʋhlehah i̱ hina ya̱ okpʋnit kanchi hoke.

¹⁰ Chihowa hʋt mi̱kot binnili na abillia chi̱ hoke; Saion ma, chi̱ Chitokaka yʋt mi̱kot binnili kʋt isht ai unchululi poiyutta ka̱ ma̱ha̱ya he mak oke. Chihowa ha̱ hu holittoblichíh.