Atʋloa 144 - Chahta Holisso Holitopa 1886

Atʋloa Lewi ʋt ikbi tok.

^1-2 A̱ Tʋli Chito, yʋmmak osh sʋbbak a̱ ittibih im ponnʋche tuk, sʋbbakushi a̱ tʋnampih im ponnʋche tuk, a̱ hullo micha a̱ hulihta kʋllo, ʋm ahlʋkuffi chaha micha sʋ hlakuffichi, a̱ telihpa micha ai ʋtukko li, ʋm okla ha̱ a̱ nutakʋchi, Chihowa hʋt hulittopashke.

³ Chihowa ma, hʋttak ʋt nanta hatuk o̱ ish ithanah choh? hʋttak ushi ʋt nanta hatuk o̱ nan isht ish anukfi̱hi̱llih choh?

⁴ Hʋttak okʋt nanah keyu kak o̱ ohmi hoke; i̱ nittak putta kʋt hushontih hikʋt ant ihya kak o̱ chohmi hoke.

⁵ Chihowa ma, chi̱ shutik a̱ ish bichulli cha, ish akkoashke; nʋnih chaha putta ka̱ ish putoli na, shubullashke.

⁶ Hʋsshukmʋlli ha̱ ish mʋlʋthachi cha, ish ittʋfimmashke; chim uskinʋki putta ka̱ ish pela cha, ish kumuntʋchashke.

⁷ Chibbak a̱ achahaka awet ish wielashke; is sʋ mokuffi cha, oka chito ya̱ si a kohchit oklah inla ibbak a̱ is si a kohchichashke.

⁸ Yʋmma̱ itih hʋt nan ik a̱hlo yo̱ ʋnumpuli hoka̱, micha ibbak ishtimpakimma yʋt hulabi im ishtimpakimma yoke.

^9-10 Chitokaka ma, mi̱ko ʋhlehah hlʋkuffichi, i̱ tishuh Lewi ya̱ bʋshpo fʋlaya ik achukmo i̱ kʋnʋllichi chia ha̱, atʋloa himona yo̱ isht chi̱ tʋloa lashke; ʋhlepah ishit tʋllakchi pukoli a̱sha yo̱ isht ulachit chi ayokpʋche lashke.

¹¹ Oklah inla, yʋmma̱ itih hʋt nan ik a̱hlo yo̱ ʋnumpulikma̱, ibbak ishtimpakimma yʋt hulabi im ishtimpakimma yoka̱, ibbak a̱ im ai ishit is si a kohchichashke.

¹² Yʋmohmi ka̱ pisoh ʋhleha hʋt nan uffo ak o̱ chohmit, himittah momʋt huchitokma̱, pisohtek ʋhleha hʋt chukka chukbi imit tonni̱k osh ʋboha hulittopa yʋt kʋniohmit ʋlhtahah chatuk ak o̱ ohmi hosh i̱ chu̱wʋt ʋlhtaha chohmikma̱,

¹³ Pi̱ kanchak ʋt ʋluttoa kʋt, na̱ waya ilaiyukali ho̱ pi̱hi̱makma̱, pi̱ nan ʋlhpoa chipinta yʋt tʋhlepah sipokni, ʋnonti tʋhlepah sipokni pukoli kʋnnohmih kia hayaka a chi̱hi̱likma̱,

¹⁴ Pi̱ wak toksʋli putta kʋt shapulikma̱, tʋmahah hulihta kinafa yʋt ikshokma̱, tʋnʋp i̱ nutaka hosh kohchʋt ia kʋt ikshokma̱, pim ai ittʋnowa ya̱ yaya kʋt iksho kak ashke.

¹⁵ Oklah nana ho̱ nana kʋt i̱ yakohmi hosh aiyasha hokmʋt, na̱ yokpa hoke; oklah nana ho̱ Chihowa hak osh i̱ Chitokaka yokma̱, yʋmmak osh na̱ yokpa hoke.